ବ୍ରୁସେଲ୍ସ, ୨ା୩: ଇରାନ ଉପରେ ଆମେରିକା ଓ ଇସ୍ରାଏଲ୍ର ମିଳିତ ଆକ୍ରମଣ ଏବଂ ଇରାନ ସୁପ୍ରିମ ଲିଡର ଆୟାତୋଲ୍ଲା ଅଲି ଖାମେନେଇଙ୍କ ମୃତ୍ୟୁକୁ ନେଇ ବିଶ୍ୱନେତାମାନେ ମାପିଚୁପି ପ୍ରତିକ୍ରିୟା ଦେଇଛନ୍ତି। ଆମେରିକାର ଆକ୍ରମଣକୁ ଅଷ୍ଟ୍ରେଲିଆ ଏବଂ କାନାଡା ଖୋଲା ସମର୍ଥନ କରିଥିବାବେଳେ ଚାଇନା ଏବଂ ରୁଷିଆ ଏହାକୁ ସମାଲୋଚନା କରିଛନ୍ତି। ବ୍ରିଟିଶ ପ୍ରଧାନମନ୍ତ୍ରୀ କେଇର ଷ୍ଟାର୍ମର, ଫ୍ରାନ୍ସ ରାଷ୍ଟ୍ରପତି ଏମାନୁଏଲ୍ ମାକ୍ରଁ ଏବଂ ଜର୍ମାନ ଚାନ୍ସେଲର ଫ୍ରେଡରିକ୍ ମେର୍ଜ ଆମେରିକା ଏବଂ ଇରାନକୁ ପୁନର୍ବାର ଆଲୋଚନାକୁ ଫେରିବା ପାଇଁ ଆହ୍ବାନ ଦେଇଛନ୍ତି। ଆପୋସ ସମାଧାନକୁ ସେମାନେ ସମର୍ଥନ କରିଛନ୍ତି। ସେମାନଙ୍କ ଦେଶ ଇରାନ ଆକ୍ରମଣରେ ଭାଗ ନେଇନାହିଁ କିନ୍ତୁ ଆମେରିକା, ଇସ୍ରାଏଲ୍ ଓ ଉକ୍ତ ଅଞ୍ଚଳର ସହଯୋଗୀମାନଙ୍କ ସହ ଯୋଗାଯୋଗରେ ରହିଛି। ଇରାନର ଆଣବିକ କାର୍ଯ୍ୟକ୍ରମ ଉପରେ ସମାଧାନରେ ପହଞ୍ଚତ୍ବାକୁ ଉକ୍ତ ୩ ଦେଶ ଉଦ୍ୟମ କରିଛନ୍ତି। ଇରାନ ମଧ୍ୟପ୍ରାଚ୍ୟର ଦେଶଗୁଡ଼ିକ ଉପରେ ଆକ୍ରମଣ ଜାରି ରଖିଥିବାରୁ ସେମାନେ ଏହାକୁ ନିନ୍ଦା କରିଛନ୍ତି। ଇରାନ ଅବିଚାରିତ ସାମରିକ କାର୍ଯ୍ୟାନୁଷ୍ଠାନରୁ ବିରତ ରହୁ। ଇରାନୀୟମାନଙ୍କୁ ସେମାନଙ୍କ ଭବିଷ୍ୟତ ସମ୍ପର୍କରେ ନିଷ୍ପତ୍ତି ନେବା ଲାଗି ଅନୁମତି ମିଳିବା ଜରୁରୀ ବୋଲି ସେମାନେ କହିଛନ୍ତି।
ଆକ୍ରମଣ ବିଭିନ୍ନ ଦେଶର ସାର୍ବଭୌମତ୍ୱର ଘୋର ଉଲ୍ଲଂଘନ ବୋଲି ଆରବ ଲିଗ୍ର ୨୨ଟି ଦେଶ କହିଛନ୍ତି। ସେମାନେ ଶାନ୍ତି ଓ ସ୍ଥିରତା ଫେରିବା ସପକ୍ଷରେ ମତ ଦେଇଛନ୍ତି। ଇସ୍ରାଏଲ୍ ଇ ଆମେରିକାର ଆକ୍ରମଣକୁ ଉକ୍ତ ଦେଶୁଡ଼ିକ ନିନ୍ଦା କରିଛନ୍ତି। ସେମାନଙ୍କ ଆକ୍ରଣ ଆଞ୍ଚଳିକ ଅସ୍ଥିରତା ସୃଷ୍ଟି କରିବ ବୋଲି ଆରବ ରାଷ୍ଟ୍ରଗୁଡ଼ିକ କହିଛନ୍ତି। କୁଏଟ୍, ବାହରିନ୍, କାତାର ଏବଂ ଏମିରେଟ୍ସରେ ଥିବା ଆମେରିକୀୟ ସାମରିକ ଘାଟି ଉପରେ ଇରାନ ଆକ୍ରମଣକୁ ମରକ୍କୋ, ଜୋର୍ଡାନ, ସିରିଆ ଏବଂ ୟୁନାଇଟେଡ୍ ଆରବ ଏମିରେଟ୍ସ ନିନ୍ଦା କରିଛନ୍ତି। ୟୁରୋପ ଏବଂ ମଧ୍ୟପ୍ରାଚ୍ୟ ଦେଶଗୁଡ଼ିକ ଆମେରିକାର ଏକପାଖିଆ କାର୍ଯ୍ୟାନୁଷ୍ଠାନକୁ ସମର୍ଥନ କିମ୍ବା ସିଧାସଳଖ ନିନ୍ଦା ନ କରି ମାପିଚୁପି ପ୍ରତିକ୍ରିୟା ଦେଇଛନ୍ତି। ଆମେରିକା ଏବଂ ଇସ୍ରାଏଲ୍ର ଆକ୍ରମଣକୁ ରୁଷିଆ ବହିର୍ବ୍ୟାପାର ମନ୍ତ୍ରଣାଳୟ ପୂର୍ବପ୍ରସ୍ତୁତ ଯୋଜନା ଏବଂ ଏକ ସାର୍ବଭୌମ ତଥା ନିରପେକ୍ଷ ଜାତିସଂଘ ସଦସ୍ୟ ରାଷ୍ଟ୍ର ବିରୋଧରେ ଅକାରଣ ସଶସ୍ତ୍ର ଆକ୍ରମଣ। ଇରାନ ଆଣବିକ କାର୍ଯ୍ୟକ୍ରମଜନିତକୁ ନେଇ ଓ୍ବାଶିଂଟନ ଏବଂ ତେଲ୍ ଆଭିଭ୍ର ଲୋକଦେଖାଣିଆ ଉଦ୍ବେଗ ପ୍ରକାଶ କରୁଥିବାବେଳେ ବାସ୍ତବରେ ସେଠାର ଶାସନ ବଦଳାଇବାକୁ ଚାହୁଁଛି ବୋଲି ରୁଷିଆ ବହିର୍ବ୍ୟାପାର ମନ୍ତ୍ରଣାଳୟ କହିଛି। ସେହିପରି ଇରାନ ଉପରେ ଇସ୍ରାଏଲ୍ ଓ ଆମେରିକାର ଆକ୍ରମଣକୁ ନେଇ ଚାଇନା ସରକାର ଗଭୀର ଚିନ୍ତାବ୍ୟକ୍ତ କରିଛନ୍ତି। ତୁରନ୍ତ ସାମରିକ କାର୍ଯ୍ୟାନୁଷ୍ଠାନ ବନ୍ଦ କରି ବୁଝାମଣାକୁ ଫେରିବା ପାଇଁ ଚାଇନା ବହିର୍ବ୍ୟାପାର ମନ୍ତ୍ରଣାଳୟ ଏକ ବିବୃତିରେ କହିଛି। ଇରାନର ସାର୍ବଭୌମତ୍ୱ, ସୁରକ୍ଷା ଓ ଆଞ୍ଚଳିକ ଅଖଣ୍ଡତାକୁ ସମ୍ମାନ ଦିଆଯିବା ଆବଶ୍ୟକ ବୋଲି ବେଜିଂ କହିଛି।
