ଢେଙ୍କାନାଳ ଅଫିସ,୧୭।୫ ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟ ପରିସରରେ ସୋମବାର ଭିଡିଓ କନଫରେନି୍ସଂ ଜରିଆରେ ଜାତୀୟ ଡେଙ୍ଗୁ ଦିବସ ପାଳିତ ହୋଇଯାଇଛି। ଏଥିରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ଅଶୋକ କୁମାର ଦାଶ ଅଧ୍ୟକ୍ଷତା କରି କହିଲେ ଯେ, ଢେଙ୍କାନାଳ ଜିଲାରେ ଡେଙ୍ଗୁ ରୋଗ ବହୁ ପରିମାଣରେ କମିଛି। ସମସ୍ତେ ମିଳିମିଶି କାମକଲେ ଏହି ରୋଗକୁ ରୋକାଯାଇପାରିବ। ସମସ୍ତ ଜିଲାସ୍ତରୀୟ ଅଧିକାରୀ, ଶିଳ୍ପସଂସ୍ଥା, ଆଶା, ଅଙ୍ଗନୱାଡି, ସ୍ବାସ୍ଥ୍ୟକର୍ମୀ, ବେସରକାରୀ ଅନୁଷ୍ଠାନ ଓ ସ୍ବେଚ୍ଛାସେବୀମାନେ ଆଗେଇ ଆସି ରୋଗ ଚିହ୍ନଟ, ପ୍ରତିକାର, ଘର ଚାରିପାଖ ସଫାସୁତରା ରଖିବା ଦିଗରେ ସଚେତନତା ସୃଷ୍ଟି କରିବାକୁ ପରାମର୍ଶ ଦେଇଥିଲେ। ଜିଲାରେ ୨୦୧୩ ବର୍ଷରେ ୪୧୬ ଜଣ, ୨୦୧୪ରେ ୨୭୪ ଜଣ, ୨୦୧୫ରେ ୪୪ଜଣ, ୨୦୧୬ରେ ୧୧୭ଜଣ, ୨୦୧୭ରେ ୫୧, ୨୦୧୮ରେ ୬୧, ୨୦୧୯ରେ ୯୬, ୨୦୨୦ରେ ୬, ୨୦୨୧ରେ ୫୧ ଓ ୨୦୨୨ରେ ବର୍ତ୍ତମାନ ସୁଦ୍ଧା ୪ଜଣ ଡେଙ୍ଗୁ ରୋଗୀ ତ୍ଚିହ୍ନଟ ହୋଇଛନ୍ତି। ତେବେ ଏହି ରୋଗରେ କାହାରି ମୃତ୍ୟୁ ହୋଇନାହିଁ। ଜଲା ମୁଖ୍ୟ ଚିକିତ୍ସାଳୟ ତୃତୀୟ ମହଲାର ୯୩ନଂ କୋଠରୀରେ ଏହି ରୋଗର ଚିକିତ୍ସା ବିନା ମୂଲ୍ୟରେ କରାଯାଉଛି ବୋଲି ସୂଚନା ଦିଆଯାଇଥିଲା। ଜିଲା ଭେକ୍ଟର ବାହିତ ପରାମର୍ଶଦାତା ତପନ କୁମାର ସାହୁ ଡେଙ୍ଗୁ ରୋଗର ଲକ୍ଷଣ ଓ ପ୍ରତିକାର ବିଷୟରେ ବିବରଣୀ ରଖିଥିଲେ। ଜିଲା ଜନସ୍ବାସ୍ଥ୍ୟ ଅଧିକାରୀ ଡା. ଜ୍ୟୋତିଷ ଚନ୍ଦ୍ର ମହାପାତ୍ର ପାଣି ରଖିଥିବା ଟାଙ୍କି, କୁଲର ଓ ପାତ୍ରକୁ ୩ଦିନରେ ଥରେ ବଦଳାଇବା ଉଚିତ ବୋଲି କହିଥିଲେ। ଜିଲା ଭେକ୍ଟର ବାହିତ ରୋଗ ଅଧିକାରୀ ଡା. ହିମାଂଶୁ ଶେଖର ହେମ୍ବ୍ରମ୍ ଏହି ରୋଗର ପ୍ରତିଷେଧକ ଟିକା ନାହିଁ ବୋଲି କହିଥିଲେ। ଅନ୍ୟମାନଙ୍କ ମଧ୍ୟରେ ଜିଲା ମୁଖ୍ୟ ଚିକିତ୍ସାଳୟର ଲାବୋରେଟୋରି ପରୀକ୍ଷକ ଏସ୍ଏସ୍ ରହିମ, ହିସାବ ରକ୍ଷକ ସୁଶାନ୍ତ କୁମାର ଚାନ୍ଦ, ଅମିୟ ରଞ୍ଜନ ରାଉତ ପ୍ରମୁଖ ଉପସ୍ଥିତ ଥିଲେ। ବ୍ଲକ ଓ ଜିଲାସ୍ତରର ସମସ୍ତ ଅଧିକାରୀ ଓ କର୍ମକର୍ତ୍ତା ଭିଡିଓ କନଫରେନ୍ସରେ ଯୋଗ ଦେଇଥିଲେ।
