ଖଇରା, ୧୬।୧(ଡି.ଏନ.ଏ.): ବାଲେଶ୍ୱର ଜିଲା ଅଧୀନ ଖଇରା ଏକ ସମ୍ବେଦଦନଶୀଳ ଥାନା ହୋଇଥିବା ବେଳେ ବହୁବିଧ ସମସ୍ୟା ସାଧାରଣ ଲେକଙ୍କୁ ନ୍ୟାୟ ପ୍ରଦାନରେ ବାଧକ ସାଜିଛି। କର୍ମଚାରୀ ସାଙ୍ଗକୁ ଗାଡି ଅଭାବ ଓ ନୂତନ ଗୃହ ନିର୍ମାଣରେ ବିଳମ୍ବ କେବଳ କର୍ମଚାରୀଙ୍କ ମନୋବଳକୁ କାର୍ଯ୍ୟ କରିବାରେ ଅନ୍ତରାୟ ହେଉନାହିଁ ବରଂ ଥାନା ଉପରୁ ସାଧାରଣ ଲୋକଙ୍କ ଭରସାକୁ ଏହା ପ୍ରଭାବିତ କରୁଛି। ତୁରନ୍ତ ସମସ୍ୟାର ସମାଧାନ ପାଇଁ ବୁଦ୍ଧିଜୀବୀ ଶିକ୍ଷାବିତ୍ ତଥା ବିଭିନ୍ନ ନାଗରିକ ସଙ୍ଗଠନ ପକ୍ଷରୁ ଦାବି କରାଯାଇଛି।
ଥାନା ସ୍ବାଧୀନତା ପୂର୍ବରୁ ପ୍ରତିଷ୍ଠା ଲାଭ କରିଥିବା ବେଳେ ଏହା ଅଧୀନରେ ୨୯ ପଞ୍ଚାୟତ ରହିଛି। ୫ବର୍ଷର ରିପୋର୍ଟକୁ ଅନୁଧ୍ୟାନ କଲେ ବର୍ଷକୁ ହାରାହାରି ୨୮୦ ମାମଲା ରୁଜୁ କରାଯାଇଥାଏ। ଆବଶ୍ୟକ କର୍ମଚାରୀ ଓ ଗାଡି ଅଭାବରୁ ପୋଲିସକୁ ସମୟୋଚିତ ପଦକ୍ଷେପ ଦେବା ମୁସ୍କିଲ ହୋଇପଡୁଛି। ୬ ଏଏସ୍ଆଇ ପଦବୀ ଥିବା ବେଳେ ବର୍ତ୍ତମାନ ଥାନାରେ ଜଣେ ହେଲେ ଏଏସ୍ଆଇ ନାହାନ୍ତି। ସେହିଭଳି ହାବିଲଦାର ପଦବୀଗୁଡିକ ମଧ୍ୟ ଖାଲିପଡିଛି। ୨ବର୍ଷ ତଳେ ଖଇରା ଥାନାର ନିଜସ୍ବ ବୋଲେରୋ ଦୁର୍ଘଟଣାରେ ଭାଙ୍ଗିରୁଜି ନଷ୍ଟ ହୋଇପଡିଥିବା ବେଳେ ଏ ପର୍ଯ୍ୟନ୍ତ ନୂଆଗାଡି ବ୍ୟବସ୍ଥା କରାଯାଉନାହିଁ। କିଛିଦିନ ତଳେ ଥାନାକୁ ଦିଆଯାଇଥିବା ଏକ ଦଦରା ଗାଡି ପ୍ରତ୍ୟେକ ଦିନ କିଛି ନା କିଛି ମରାମତି ଆବଶ୍ୟକ କରୁଛି। ନୂତନ ଗୃହ ନିର୍ମାଣକୁ ନେଇ ସାଧାରଣରେ ଅସନ୍ତୋଷ ବଢି ବଢି ଚାଲିଛି। ଗୃହ ନିର୍ମାଣ ଅବଧି ସରିବାକୁ ଆଉ ମାତ୍ର କିଛି ମାସ ବାକିଥିବା ବେଳେ ଏ ପର୍ଯ୍ୟନ୍ତ ୪୦ ଭାଗ କାର୍ଯ୍ୟ ମଧ୍ୟ ସରିନାହିଁ।
ବୋରିଂଗୁଡିକ ୮ମିଟର କରାଯିବାର ନିୟମ ଥିବା ବେଳେ ଏହାଠାରୁ ଯଥେଷ୍ଟ କମ୍ କରାଯିବା ଏବଂ ବ୍ୟବହୃତ କଞ୍ଚାମାଲ ବିଶେଷ କରି ବାଲି ଅତ୍ୟନ୍ତ ନିମ୍ନମାନର ହୋଇଥିବାରୁ ଘରର ସ୍ଥାୟିତ୍ୱ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏ ସମ୍ପର୍କରେ କନିଷ୍ଠଯନ୍ତ୍ରୀ ନରହରି ବେହେରାଙ୍କୁ ଯୋଗାଯୋଗ କରାଯିବାରେ ମାଟି ଖରାପ ଯୋଗୁ ଏଷ୍ଟିମେଟରେ କିଛିଟା ପରିବର୍ତ୍ତନ କରାଯାଇଥିବା କହିଛନ୍ତି।
ଖଇରା ଥାନା ଅଧିକାରୀ ସୁବ୍ରତ ବେହେରାଙ୍କୁ ପଚାରିବାରେ ଅଭାବ ଅସୁବିଧା ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଅବଗତ କରାଯାଉଥିବା କହିଛନ୍ତି।
