ନୂଆଦିଲ୍ଲୀ,୨୯।୧(ପି.ଟି.): ୨୦୨୨ରେ ମହିଳା ଏସିଆନ କପ୍ ଫୁଟବଲ ଭାରତରେ ଆୟୋଜନ ହେବ। ଏହି ମେଗା ଇଭେଣ୍ଟ ଜାନୁୟାରୀ ୨୦ ତାରିଖରୁ ଆରମ୍ଭ ହୋଇ ଫେବୃୟାରୀ ୬ ତାରିଖରେ ଶେଷ ହେବ ବୋଲି ଏସିଆନ ଫୁଟବଲ କନ୍ଫେଡେରେଶନ (ଏଏଫ୍ସି) ତରଫରୁ ସୂଚନା ଦିଆଯାଇଛି। ଟୁର୍ନାମେଣ୍ଟରେ ମୋଟ ୧୨ଟି ଦଳ ଅଂଶଗ୍ରହଣ କରିବେ। ଗତ ସଂସ୍କରଣରେ ୮ଟି ଦଳ ଅଂଶଗ୍ରହଣ କରିଥିଲେ। ଏଥର ଆଉ ୪ଟି ଦଳକୁ ସାମିଲ କରାଯାଇଛି। ଦଳଗୁଡିକୁ ୩ଟି ଗ୍ରୁପ୍ରେ ବିଭକ୍ତ କରାଯାଇଛି। ୧୮ ଦିନ ମଧ୍ୟରେ ଟୁର୍ନାମେଣ୍ଟରେ ମୋଟ ୨୫ଟି ମ୍ୟାଚ ଖେଳାଯିବ। ୮ଟି ଦଳ ନୂଆକରି ଆରମ୍ଭ କରାଯାଇଥିବା କ୍ୱାର୍ଟରଫାଇନାଲକୁ ଉନ୍ନୀତ ହେବେ।
୨୦୨୩ ଫିଫା ମହିଳା ବିଶ୍ୱକପ୍ ପାଇଁ ଏହି ଟୁର୍ନାମେଣ୍ଟ କ୍ୱାଲିଫାଇଙ୍ଗ୍ ଇଭେଣ୍ଟ ଭାବେ ପରିଗଣିତ ହେବ। ବିଶ୍ୱକପ୍ରେ ଏଥର ଅଷ୍ଟ୍ରେଲିଆକୁ ବାଦ୍ ଦେଲେ ୫ଟି ଏସୀୟ ଦଳ ସାମିଲ ରହିବେ। ବିଶ୍ୱକପ୍ରେ ମୋଟ ଉପରେ ୩୨ଟି ଦଳ ଅଂଶଗ୍ରହଣ କରିବେ। ୨୦୨୨ ଏଏଫ୍ସି ମହିଳା ଏସିଆନ୍ କପ୍ ପାଇଁ ସେପ୍ଟେମ୍ବର ୧୩ରୁ ୨୫ ତାରିଖ ମଧ୍ୟରେ କ୍ୱାଲିଫାୟର୍ସ ଟୁର୍ନାମେଣ୍ଟ ଖେଳାଯିବ। ଗତ ସଂସ୍କରଣରେ ଶୀର୍ଷରେ ଥିବା ପ୍ରଥମ ୩ଟି ଦଳ (ଜାପାନ, ଅଷ୍ଟ୍ରେଲିଆ ଓ ଚାଇନା) , ଆୟୋଜକ ଭାରତ ବ୍ୟତୀତ ଆଉ ୮ଟି ଦଳ ଟୁର୍ନାମେଣ୍ଟରେ ଭାଗ ନେବେ। ଆୟୋଜକ ହିସାବରେ ଭାରତ ସିଧାସଳଖ ଏହି ଟୁର୍ନାମେଣ୍ଟ ଖେଳିବ। ଏହି ଟୁର୍ନାମେଣ୍ଟକୁ ବାଦ୍ ଦେଲେ ଭାରତ ଆସନ୍ତାବର୍ଷ ଫିଫା ୧୭ ବର୍ଷରୁ କମ୍ ବିଶ୍ୱକପ୍ ମଧ୍ୟ ଖେଳାଯିବାର କାର୍ଯ୍ୟକ୍ରମ ରହିଛି। ଭାରତ ମଧ୍ୟ ପୂର୍ବରୁ ୨୦୧୬ରେ ଏଏଫ୍ସି ୧୬ ବର୍ଷରୁକମ୍ ଚାମ୍ପିୟନଶିପ୍ ଓ ଫିଫା ୧୭ ବର୍ଷରୁ କମ୍ ବିଶ୍ୱକପ୍ ୨୦୧୭ରେ ସଫଳତାର ସହ ଆୟୋଜନ କରିଛି।
