ବ୍ରହ୍ମପୁର,୭।୬(ସୁବାସ ଚନ୍ଦ୍ର ପାଢ଼ୀ): ମୋ ପୁଅକୁ ତା’ ସ୍ତ୍ରୀ ଓ ସମ୍ପର୍କୀୟମାନେ ଦେହରେ ପେଟ୍ରୋଲ ଢାଳି ନିଆଁ ଲଗାଇ ହତ୍ୟା କରିବାକୁ ଉଦ୍ୟମ କରିଛନ୍ତି ବୋଲି ପୋଡ଼ିହୋଇ ଗୁରୁତର ଅବସ୍ଥାରେ ଏମ୍କେସିଜିରେ ଚିକିତ୍ସାଧୀନ ଥିବା କନ୍ଷ୍ଟେବଲ ଆଶୁତୋଷ ମୃଡଙ୍ଗୟା (୩୨)ଙ୍କ ମା’ ଅଭିଯୋଗ କରିଛନ୍ତି। ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ସେ ଦାବି କରିଛନ୍ତି। ଅନ୍ୟପକ୍ଷରେ ଘଟଣା ପରେ ଶୁକ୍ରବାର ରାତିରେ ହିଁ ପୋଲିସ ଏମ୍କେସିଜିରେ ପହଞ୍ଚତ୍ ଆଶୁତୋଷଙ୍କ ଜମାନବନ୍ଦୀ ରେକର୍ଡ କରିଛି। ସ୍ତ୍ରୀ ଓ ଶଳା ତାଙ୍କ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଛନ୍ତି ବୋଲି ସେ ପ୍ରକାଶ କରିଛନ୍ତି। ତାଙ୍କ ଶରୀରର ୭୫ ପ୍ରତିଶତ ପୋଡ଼ିଯାଇଛି। ରାତିରେ ତାଙ୍କୁ ଭୁବନେଶ୍ୱରସ୍ଥିତ ଏମ୍ସକୁ ସ୍ଥାନାନ୍ତର କରାଯାଇଛି।
ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣା ସ୍ଥଳରେ ପହଞ୍ଚତ୍ ଶନିବାର ଦହନଶୀଳ ସାମଗ୍ରୀ ଜବତ କରି ସବୁ ଦିଗକୁ ଗୁରୁତ୍ୱ ଦେଇ ତଦନ୍ତ ଜାରି ରଖିଛି। ବ୍ରହ୍ମପୁର ଏସପି ଡା.ସର୍ବଣା ବିବେକ ଏମ୍. ଘଟଣାସ୍ଥଳ ପରିଦର୍ଶନ କରି ଏମ୍କେସିଜିରେ ଶୁକ୍ରବାର ଗୁରୁତରଙ୍କୁ ଭେଟିଥିଲେ। ଆଶୁତୋଷଙ୍କ ଭଉଣୀ ନିବେଦିତା ପାତ୍ରଙ୍କ ଅଭିଯୋଗକୁ ଭିତ୍ତିକରି ଟାଉନ ଥାନା ପୋଲିସ ୨୪୭/୨୬ରେ ଏକ ମାମଲା ରୁଜୁ କରିଛି। ବିଭିନ୍ନ ଦିଗକୁ ନେଇ ଏହାର ତଦନ୍ତ କରାଯାଉଛି ବୋଲି ଏସ୍ପି କହିଛନ୍ତି। ଶୁକ୍ରବାର ରାତିରେ ଟାଉନ ଥାନା ଅନ୍ତର୍ଗତ ବିଜିପୁରରେ ଥିବା ପୋଲିସ କ୍ୱାର୍ଟର୍ସରେ ଏପରି ଦୁଃଖଦ ଘଟଣା ଘଟିଥିଲା।
ଖବରରୁ ପ୍ରକାଶ, ଜୟଦେବ ମୃଡଙ୍ଗୟାଙ୍କ ପୁଅ ଆଶୁତୋଷ ଛତ୍ରପୁରସ୍ଥିତ ଓଏମ୍ଭିଡିରେ କନ୍ଷ୍ଟେବଲ ରୂପେ କାର୍ଯ୍ୟ କରୁଥିଲେ। ସେ ୨୦୨୫ ଫେବୃଆରୀରେ ସନ୍ଧ୍ୟା ନାୟକ (୩୧)ଙ୍କୁ ପ୍ରେମ ବିବାହ କରିଥିଲେ। ସନ୍ଧ୍ୟା ଆମ୍ବପୁଆସ୍ଥିତ ରିଜର୍ଭରେ କାର୍ଯ୍ୟ କରୁଥିଲେ। ଉଭୟେ ବିଜିପୁରରେ ସନ୍ଧ୍ୟା ପାଇଥିବା କ୍ୱାର୍ଟର୍ସରେ ରହୁଥିଲେ। ତେବେ ତାଙ୍କୁ ଅଧିକ ଯୌତୁକ ଦାବିକରି ହତ୍ୟା ଉଦ୍ୟମ କରାଯାଉଛି ବୋଲି ସନ୍ଧ୍ୟା ମହିଳା ଥାନାରେ ଅଭିଯୋଗ କରିବା ପରେ ପୋଲିସ ଆଶୁତୋଷଙ୍କୁ ୧୮ା୫ା୨୬ରେ ଗିରଫ କରି ମାମଲା(ନଂ.୪୯/୨୦୨୬)ରେ କୋର୍ଟ ଚାଲାଣ କରିଥିଲା। ଜେଲ ଯିବା ପରେ ଆଶୁତୋଷଙ୍କୁ ଚାକିରିରୁ ନିଲମ୍ବନ କରାଯାଇଥିଲା। ତେବେ ତିନି ଦିନ ତଳେ ସେ ଜାମିନରେ ଆସିଥିଲେ। ଶୁକ୍ରବାର ରାତିରେ ସନ୍ଧ୍ୟାଙ୍କ କ୍ୱାର୍ଟର୍ସକୁ ଆଶୁତୋଷ ଯାଇଥିଲେ। ଏହାର କିଛି ସମୟ ପରେ ଆଶୁତୋଷ ଜଳୁଥିବା ଅବସ୍ଥାରେ ଶିଡ଼ିରେ ତଳକୁ ଓହ୍ଲାଇ ଜୀବନ ବଞ୍ଚାଇବାକୁ ସେହି କଲୋନୀରେ ରହୁଥିବା ହାବିଲଦାର ଗୋପାଳ ନାୟକଙ୍କ ଘରେ ପଶିଯାଇଥିଲେ । ତାଙ୍କ ଦେହରୁ ନିଆଁ ଲାଗି ଗୋପାଳଙ୍କ ଘରର ବିଭିନ୍ନ ଆସବାବପତ୍ର ମଧ୍ୟ ପୋଡିଯାଇଛି। ଏପରି କି ଆଶୁତୋଷଙ୍କୁ ବଞ୍ଚାଇବାକୁ ଚେଷ୍ଟା କରି ଗୋପାଳଙ୍କ ହାତ ମଧ୍ୟ ପୋଡ଼ିଯାଇଥିବା ଜଣାପଡିଛି। ସଙ୍କଟାପନ୍ନ ଅବସ୍ଥାରେ କେତେଜଣ ପୋଲିସ କର୍ମଚାରୀ ଏବଂ କଲୋନୀ ଲୋକେ ଆଶୁତୋଷଙ୍କୁ ଏମ୍କେସିଜିରେ ଭର୍ତ୍ତି କରିଥିଲେ। ଖବରପାଇ ତାଙ୍କ ମା’ ପହଞ୍ଚତ୍ ପୁଅକୁ ତା’ ସ୍ତ୍ରୀ ଓ ସମ୍ପର୍କୀୟମାନେ ହତ୍ୟା କରିବାକୁ ଉଦ୍ୟମ କରିଛନ୍ତି ବୋଲି ଅଭିଯୋଗ ଆଣିଛନ୍ତି। ଶୁକ୍ରବାର ରାତିରେ ଡାକ୍ତରଙ୍କ ଉପସ୍ଥିତିରେ ପୋଲିସ ତାଙ୍କର ଜମାନବନ୍ଦୀ ରେକର୍ଡ କରିଛି। ସେ ଉପରୋକ୍ତ ମତ ଦେଇଛନ୍ତି। ଅବସ୍ଥା ସଙ୍କଟାପନ୍ନ ଥିବାରୁ ଆଶୁତୋଷଙ୍କୁ ଶୁକ୍ରବାର ରାତିରେ ହିଁ ଏମ୍ସ ସ୍ଥାନାନ୍ତର କରାଯାଇଥିଲା। ସ୍ତ୍ରୀ ସ୍ବାମୀଙ୍କ ମଧ୍ୟରେ କଳିରୁ ଏପରି ଘଟଣା ଘଟିଥିବା ପୋଲିସ ଅନୁମାନ କରୁଛି। ଅନ୍ୟପକ୍ଷରେ ଭାଇଙ୍କ ସହ ଏମ୍କେସିଜିରୁ ଏମ୍ସକୁ ଆସିଥିବା ଭଊଣୀ ନିବେଦିତାଙ୍କୁ ଏ ସମ୍ପର୍କରେ ପଚାରିବାରୁ ସେ କହିଲେ ଏମ୍ସରେ ମୁଁ ଓ ବାପା ଅଛୁ। ଭାଇ ଭଲ ହୋଇଯିବାକୁ ଭଗବାନଙ୍କ ନିକଟରେ ପ୍ରାର୍ଥନା କରୁଛୁ ବୋଲି ନିବେଦିତା କହିଛନ୍ତି।
