ବର୍ଲିନ, ୯।୧୨: ଜର୍ମାନୀ ପାର୍ଲାମେଣ୍ଟ ବୁଧବାର ଓଲଫ୍ ସ୍କୋଲ୍ଜଙ୍କୁ ନୂଆ ଚାନ୍ସେଲର ନିର୍ବାଚିତ କରିଛି। ଏଥିସହିତ ଜର୍ମାନୀରେ ଆଞ୍ଜେଲା ମର୍କେଲଙ୍କ ଶାସନ ଶେଷ ହୋଇଛି। ୨୦୦୫ ନଭେମ୍ବର ୨୨ରେ ମର୍କେଲ ଜର୍ମାନୀର ପ୍ରଥମ ମହିଳା ଚାନ୍ସେଲର ହେବା ପରେ ୧୬ ବର୍ଷ ଧରି ଦେଶକୁ ଶାସନ କରିଆସୁଥିଲେ। ସ୍କୋଲ୍ଜଙ୍କ ନେତୃତ୍ୱାଧୀନ ସରକାର ଜମାନୀର ଆଧୁନିକୀକରଣ ଏବଂ ଜଳବାୟୁ ପରିବର୍ତ୍ତନର ମୁକାବିଲା କରିବା ଭଳି ବଡ଼ ଆଶା ନେଇ କ୍ଷମତାକୁ ଆସିଛି। ତେବେ କରୋନା ସଂକ୍ରମଣ ବଢ଼ୁଥିବାରୁ ସରକାରଙ୍କୁ ପ୍ରଥମରୁ ବଡ଼ ଚ୍ୟାଲେଞ୍ଜର ସମ୍ମୁଖୀନ ହେବାକୁ ପଡ଼ିବ।
ଆସନ ବିଶିଷ୍ଟ ଜର୍ମାନୀ ପାର୍ଲାମେଣ୍ଟର ନିମ୍ନ ସଦନରେ ସ୍କୋଲ୍୍ଜଙ୍କ ନେତୃତ୍ୱାଧୀନ ୩ ଦଳୀୟ ମେଣ୍ଟ ପାଖରେ ୪୧୬ ଆସନ ରହିଛି। ଚାନ୍ସେଲର ନିର୍ବାଚନରେ ସ୍କୋଲ୍ଜଙ୍କ ସପକ୍ଷରେ ୩୯୫ ଓ ବିରୋଧରେ ୩୦୩ ଭୋଟ ପଡ଼ିଥିଲା। ରାଷ୍ଟ୍ରପତି ତାଙ୍କୁ ଆନୁଷ୍ଠାନିକ ଭାବେ ଚାନ୍ସେଲର ଘୋଷଣା କରିବା ସହ ବାଚସ୍ପତି ତାଙ୍କୁ ଶପଥ ପାଠ କରାଇଛନ୍ତି। ପାର୍ଲାମେଣ୍ଟର ସଦସ୍ୟ ନ ଥିବା ମର୍କେଲ ଭୋଟ ସମୟରେ ଦର୍ଶକ ଗ୍ୟାଲେରିରେ ଉପସ୍ଥିତ ଥିଲେ। ଅଧିବେଶନ ଆରମ୍ଭରେ ସଦସ୍ୟମାନେ ଛିଡ଼ାହୋଇ ତାଙ୍କୁ ଅଭିବାଦନ ଜଣାଇଥିଲେ।
ପୂର୍ବତନ ମେୟର ୬୩ ବର୍ଷୀୟ ସ୍କୋଲ୍ଜ ୨୦୧୮ରୁ ଦେଶର ଭାଇସ୍ ଚାନ୍ସେଲର ସହ ଅର୍ଥମନ୍ତ୍ରୀ ରହିଥିଲେ। ତାଙ୍କ ଦଳ ସୋସିଆଲ୍ ଡେମୋକ୍ରାଟ୍ସ ସହ ପରିବେଶ ସପକ୍ଷବାଦୀ ଗ୍ରୀନ୍ ପାର୍ଟି ଏବଂ ଫ୍ରି ଡେମୋକ୍ରାଟ୍ସ ଦଳକୁ ନେଇ ମେଣ୍ଟ କରାଇବାରେ ସେ ସଫଳ ହୋଇଛନ୍ତି। ଏହି ମେଣ୍ଟ ଦେଶକୁ ନୂଆ ଶକ୍ତି ଆଣିଦେବା ଲାଗି ଆଶା ରଖିଛି। ସ୍କୋଲ୍ଜଙ୍କ ନେତୃତ୍ୱରେ ୧୭ ଜଣିଆ ମନ୍ତ୍ରିମଣ୍ଡଳ ଗଢ଼ାଯାଇଛି। ଏଥିରେ ୯ ପୁରୁଷ ଓ ୮ ମହିଳା ମନ୍ତ୍ରୀ ଅଛନ୍ତି।
