ନୂଆଦିଲ୍ଲୀ, ୬।୭: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବ୍ରାଜିଲର ରିଓ ଡି ଜାନେରୋରେ ଅନୁଷ୍ଠିତ ୧୭ତମ ବ୍ରିକ୍ସ ସମ୍ମିଳନୀରେ ଭାଷଣ ଦେଇ ଗ୍ଲୋବାଲ୍ ସାଉଥ୍ର ମହତ୍ୱ ଉପରେ ଗୁରୁତ୍ୱାରୋପ କରିଛନ୍ତି। ସେ କହିଛନ୍ତି ଯେ, ଗ୍ଲୋବାଲ୍ ସାଉଥ୍ ବିନା ବିଶ୍ୱ ସଂସ୍ଥାଗୁଡ଼ିକ ମୋବାଇଲରେ ନେଟୱାର୍କ ବିନା SIM କାର୍ଡ ପରି, ଯାହା କୌଣସି କାର୍ଯ୍ୟ କରିପାରେ ନାହିଁ। ସେ ଜାତିସଂଘ ସୁରକ୍ଷା ପରିଷଦ, ବିଶ୍ୱ ବାଣିଜ୍ୟ ସଂଗଠନ (WTO) ଏବଂ ବହୁପାକ୍ଷିକ ବିକାଶ ବ୍ୟାଙ୍କ ଭଳି ସଂସ୍ଥାଗୁଡ଼ିକରେ ସଂସ୍କାରର ଆବଶ୍ୟକତା ଉପରେ ଜୋର ଦେଇଛନ୍ତି।
ପ୍ରଧାନମନ୍ତ୍ରୀ ମୋଦି କହିଛନ୍ତି, “୨୦ତମ ଶତାବ୍ଦୀରେ ଗଠିତ ବିଶ୍ୱ ସଂସ୍ଥାଗୁଡ଼ିକ ଆଜି ପର୍ଯ୍ୟନ୍ତ ବିଶ୍ୱର ଦୁଇ-ତୃତୀୟାଂଶ ଜନସଂଖ୍ୟାକୁ ଉପଯୁକ୍ତ ପ୍ରତିନିଧିତ୍ୱ ଦେଇପାରି ନାହାନ୍ତି। ବିଶ୍ୱ ଅର୍ଥନୀତିରେ ଗୁରୁତ୍ୱପୂର୍ଣ୍ଣ ଯୋଗଦାନ ଦେଉଥିବା ଦେଶମାନଙ୍କୁ ନିଷ୍ପତ୍ତି ଗ୍ରହଣର ମଞ୍ଚରେ ସ୍ଥାନ ମିଳିନାହିଁ।” ସେ ଗ୍ଲୋବାଲ୍ ସାଉଥ୍ର ଦେଶଗୁଡ଼ିକ ଦ୍ୱୈତ ମାନଦଣ୍ଡର ଶିକାର ହୋଇଥିବା ଏବଂ ସେମାନଙ୍କର ସ୍ୱାର୍ଥକୁ ଅଗ୍ରାଧିକାର ଦିଆଯାଇ ନଥିବା ଉଲ୍ଲେଖ କରିଛନ୍ତି।
ମୋଦି ବ୍ରିକ୍ସର ସମ୍ପ୍ରସାରଣକୁ ଏକ ସକାରାତ୍ମକ ପରିବର୍ତ୍ତନର ଉଦାହରଣ ଭାବେ ବର୍ଣ୍ଣନା କରି ଇଣ୍ଡୋନେସିଆର ନୂଆ ସଦସ୍ୟତାକୁ ସ୍ୱାଗତ କରିଛନ୍ତି। ସେ କହିଛନ୍ତି, “ବ୍ରିକ୍ସର ସମ୍ପ୍ରସାରଣ ଏହାର ପ୍ରମାଣ ଯେ ଏହି ସଂଗଠନ ସମୟ ଅନୁଯାୟୀ ନିଜକୁ ପରିବର୍ତ୍ତନ କରିବାର କ୍ଷମତା ରଖିଛି।” ସେ ଇଣ୍ଡୋନେସିଆର ରାଷ୍ଟ୍ରପତି ପ୍ରାବୋୱୋ ସୁବିଆନ୍ତୋଙ୍କୁ ବ୍ରିକ୍ସ ପରିବାରରେ ଯୋଗଦେବା ପାଇଁ ଅଭିନନ୍ଦନ ଜଣାଇଛନ୍ତି।
ବ୍ରିକ୍ସ ସମ୍ମିଳନୀର ମୁଖ୍ୟ ବିଷୟ “ଗ୍ଲୋବାଲ୍ ସାଉଥ୍ ସହଯୋଗ ଜରିଆରେ ସମାବେଶୀ ଓ ସ୍ଥାୟୀ ଶାସନ” ଉପରେ ଆଧାରିତ। ଏହି ସମ୍ମିଳନୀରେ ଗ୍ଲୋବାଲ୍ ଶାସନ ସଂସ୍କାର, শାନ୍ତି ଓ ସୁରକ୍ଷା, ଜଳବାୟୁ ପରିବର୍ତ୍ତନ, କୃତ୍ରିମ ବୁଦ୍ଧିମତ୍ତା ଏବଂ ବିଶ୍ୱ ସ୍ୱାସ୍ଥ୍ୟ ଭଳି ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା ହୋଇଛି।
ପ୍ରଧାନମନ୍ତ୍ରୀ ମୋଦି ଭାରତର ବିଶ୍ୱ କଲ୍ୟାଣ ପ୍ରତି ପ୍ରତିବଦ୍ଧତା ଉପରେ ଜୋର ଦେଇ କହିଛନ୍ତି, “ଭାରତ ସବୁବେଳେ ନିଜର ସ୍ୱାର୍ଥକୁ ଅତିକ୍ରମ କରି ମାନବଜାତିର ସ୍ୱାର୍ଥ ପାଇଁ କାର୍ଯ୍ୟ କରିବାକୁ ନିଜର ଦାୟିତ୍ୱ ବିବେଚନା କରିଛି। ଆମେ ବ୍ରିକ୍ସ ଦେଶମାନଙ୍କ ସହ ସମସ୍ତ ବିଷୟରେ ରଚନାତ୍ମକ ଯୋଗଦାନ ପାଇଁ ସମ୍ପୂର୍ଣ୍ଣ ପ୍ରତିବଦ୍ଧ।”
