ନୂଆଦିଲ୍ଲୀ,୧।୧୨(ପି.ଟି.): ପାର୍ଲାମେଣ୍ଟର ଶୀତ ଅଧିବେଶନ ସୋମବାରଠାରୁ ଆରମ୍ଭ ହେବାକୁ ଯାଉଥିବାବେଳେ ଏହାର ଦିନକ ପୂର୍ବରୁ କେନ୍ଦ୍ର ସରକାର ସର୍ବଦଳୀୟ ବୈଠକ ଡାକିଥିଲେ। ଭୋଟର ତାଲିକାର ଏସ୍ଆଇଆର୍ ଉପରେ ଆଲୋଚନା ପାଇଁ ବିରୋଧୀ ଦଳଗୁଡ଼ିକ ଦାବି କରିଛନ୍ତି। ସର୍ବଦଳୀୟ ବୈଠକରେ ସଂସଦୀୟ ବ୍ୟାପାର ମନ୍ତ୍ରୀ କିରେନ୍ ରିଜିଜୁ କହିଥିଲେ, ଗୃହକାର୍ଯ୍ୟ ସୁରୁଖୁରୁରେ ଚଳାଇବା ପାଇଁ ସୁଯୋଗ ମିଳିବା ଆବଶ୍ୟକ। ଏଥିପାଇଁ ସେ ସବୁ ଦଳର ସହଯୋଗ ଲୋଡ଼ିଥିଲେ। କଂଗ୍ରେସର ସାଧାରଣ ସମ୍ପାଦକ ଜୟରାମ ରମେଶ ଶୀତ ଅଧିବେଶନ କାର୍ଯ୍ୟସୂଚୀ ସମ୍ପର୍କରେ ସର୍ବଦଳୀୟ ବୈଠକରେ
ବିରୋଧୀଙ୍କ ଟାର୍ଗେଟ୍ରେ …
ଆଲୋଚନା କରାଯିବା ଏକ ସାଧାରଣ ଔପଚାରିକତା ବୋଲି କହିଥିଲେ। ବିରୋଧୀ ଦଳଗୁଡ଼ିକ ସହ ବିନା ପରାମର୍ଶରେ ସଂକ୍ଷିପ୍ତ ଆଲୋଚନା ଜରିଆରେ ବିଷୟବସ୍ତୁ ତାଲିକା ମଞ୍ଜୁର କରାଇନେବା ସରକାରଙ୍କ ଉଦ୍ଦେଶ୍ୟ ସ୍ପଷ୍ଟ ହେଉଥିବା ଜୟରାମ କହିଥିଲେ। ୧୫ଦିନ ପାଇଁ ହେବାକୁ ଥିବା ଏହି ଅଧିବେଶନ ସଂସଦ ଇତିହାସରେ ସବୁଠୁ ସଂକ୍ଷିପ୍ତ। ଏହି ସମୟ ମଧ୍ୟରେ ୧୩ଟି ବିଲ୍ ଗୃହୀତ କରାଇବାକୁ କେନ୍ଦ୍ର ସରକାର ତାଲିକା ପ୍ରସ୍ତୁତ କରିଛନ୍ତି। ସେଥିରୁ ଗୋଟିଏ ଅଧ୍ୟାଦେଶ ସ୍ଥାନରେ ଅଣାଯିବାକୁ ଥିବାବେଳେ ଅନ୍ୟ ଦୁଇଟି ଲୋକ ସଭା କମିଟି ଦେଇ ଯାଇଛି। ତେଣୁ ୧୦ଟି ବିଲ୍କୁ ସମ୍ପୃକ୍ତ ଷ୍ଟାଣ୍ଡିଂ କମିଟି ଅନୁଧ୍ୟାନ କରିବେ। ଏଥିସହିତ ହଠାତ୍ କୌଣସି ବିଲ୍କୁ ମଧ୍ୟ ସରକାର ଆଣିପାରନ୍ତି ବୋଲି କଂଗ୍ରେସ ନେତା କହିଛନ୍ତି। କଂଗ୍ରେସ ଏସ୍ଆଇଆର୍, ଜାତୀୟ ସୁରକ୍ଷା, ବାୟୁ ପ୍ରଦୂଷଣ, କୃଷକ ସମସ୍ୟା ସମେତ ବିଦେଶ ନୀତି ଉପରେ ଆଲୋଚନା ଚାହେଁ ବୋଲି ଲୋକ ସଭାରେ କଂଗ୍ରେସର ଉପନେତା ଗୌରବ ଗୋଗୋଇ କହିଛନ୍ତି।
ସେହିପରି ଏସ୍ଆଇଆର୍ ଉପରେ ଆଲୋଚନା ନ ହେଲେ ଗୃହକୁ ଚଳାଇ ଦିଆଯିବ ନାହିଁ ବୋଲି ସମାଜବାଦୀ ପାର୍ଟି ନେତା ରାମଗୋପାଳ ଯାଦବ କହିଛନ୍ତି। ଟିଏମ୍ସି ନେତା କଲ୍ୟାଣ ବାନାର୍ଜୀ କହିଥିଲେ, ତାଙ୍କ ଦଳ ପୂର୍ବରୁ ଏସ୍ଆଇଆର୍, ଏମ୍ଜିଏନ୍ଆର୍ଇଜିଏ ପ୍ରସଙ୍ଗ ଉଠାଇଥିଲେ ମଧ୍ୟ ଏହା ଉପରେ ଆଲୋଚନା ପାଇଁ ଅନୁମତି ମିଳି ନ ଥିଲା। ଯଦି ପାର୍ଲାମେଣ୍ଟ କେବଳ ସରକାରଙ୍କ ଇଚ୍ଛାରେ ଚାଲେ, ତେବେ ବିରୋଧୀ ଦଳ ରହିବାର ମୂଲ୍ୟ କ’ଣ ବୋଲି ସେ ପ୍ରଶ୍ନ କରିଛନ୍ତି। ସରକାର ୭୦ ପ୍ରତିଶତ ସମୟ ନେଉଥିବାବେଳେ ବିରୋଧୀଙ୍କୁ ଅଧିକ ସମୟ ମିଳୁ । ଭୋଟର ତାଲିକା ସଂଶୋଧନ ଚାଲିଥିବାବେଳେ ଅତ୍ୟଧିକ କାର୍ଯ୍ୟଚାପରୁ ବିିଭିନ୍ନ ରାଜ୍ୟରେ ୪୦ ଜଣ ବୁଥ୍ସ୍ତରୀୟ ଅଧିକାରୀ(ବିଏଲ୍ଓ)ଙ୍କ ମୃତ୍ୟୁ ଘଟିଲାଣି। ଏହା ଉପରେ ଆଲୋଚନା ପାଇଁ ସମୟ ଦିଆଯାଉ। ଭୋଟର ତାଲିକାରୁ ନାଁ ହଟାଇବା ଏସ୍ଆଇଆର୍ ପ୍ରକ୍ରିୟାର ଲକ୍ଷ୍ୟ ହେବା ଉଚିତ୍ ନୁହେଁ ବୋଲି ବାନାର୍ଜୀ କହିଛନ୍ତି। ସୂଚନାଯୋଗ୍ୟ, ଏସ୍ଆଇଆର୍ ଉପରେ ଆଲୋଚନା ପାଇଁ ବିରୋଧୀ ନିଷ୍ପତ୍ତି ନେଇଥିବାବେଳେ ନିର୍ବାଚନ କମିଶନ ରବିବାର ଏସ୍ଆଇଆର୍ କାର୍ଯ୍ୟସୂଚୀକୁ ସପ୍ତାହେ ବୃଦ୍ଧି କରିଛନ୍ତି। ଭୋଟର ଗଣନା ସମୟସୀମା ଡିସେମ୍ବର ୪ତାରିଖ ପରିବର୍ତ୍ତେ ୧୧ତାରିଖକୁ ବୃଦ୍ଧି କରାଯାଇଛି। ସେହିପରି ଚୂଡ଼ାନ୍ତ ଭୋଟର ତାଲିକା ଫେବୃଆରୀ ୧୪ରେ ପ୍ରକାଶ ପାଇବ ବୋଲି କୁହାଯାଇଛି।
Dharitri – The Largest & Most Trusted Odia Daily
