ଢେଙ୍କାନାଳ ଅଫିସ/ଭୁବନ, ୧୫।୩(ଡି.ଏନ୍.ଏ.)କୋଲକାତାରୁ ଆସୁଥିଲା ସ୍ପିରିଟ୍। ସେଥିରେ ଏସେନ୍ସ ମିଶାଇ ତିଆରି ହେଉଥିଲା ନକଲି ମଦ। ନାମୀଦାମୀ କମ୍ପାନୀର ଠିପି, ଷ୍ଟିକର ଲଗାଇ ଅନାୟାସରେ ଚାଲିଥିଲା ଏହି ନିଷିଦ୍ଧ ନିଶା କାରବାର। ଗ୍ରାମାଞ୍ଚଳରୁ ସହରରେ ପହଞ୍ଚତ୍ବା ପରେ ଚଢ଼ା ଦରରେ ଏହାକୁ ବିକ୍ରି କରାଯାଉଥିଲା। ଢେଙ୍କାନାଳ ଜିଲା ଭୁବନ ଥାନା ଅନ୍ତର୍ଗତ କହ୍ନେଇପାଳ ଗ୍ରାମରୁ ଏଭଳି ଏକ ନକଲି ମଦ ବଟିଲିଂ ପ୍ଲାଣ୍ଟକୁ ଠାବ କରିଛି କଟକ ଅବକାରୀ ବିଭାଗର ଫ୍ଲାଇଂ ସ୍କ୍ବାଡ୍। ଘଟଣାରେ ମାଷ୍ଟର ମାଇଣ୍ଡ୍ ବିଷ୍ଣୁ ଚରଣ ବେହେରା ଗିରଫ ହୋଇଥିବାବେଳେ ତାଙ୍କ ଘରୁ ଜବତ ହୋଇଛି ଲକ୍ଷାଧିକ ଟଙ୍କାର ସ୍ପିରିଟ୍ ଏବଂ ନକଲି ମଦ ପ୍ରସ୍ତୁତିରେ ବ୍ୟବହୃତ ସରଞ୍ଜାମ।
ଅନୁଗୋଳ-ଢେଙ୍କାନାଳ-କଟକ-ଭୁବନେଶ୍ୱରରେ ନକଲି ବିଦେଶୀ ମଦ କାରବାର ର଼୍ୟାକେଟ୍ ସକ୍ରିୟ ଥିବା ଜଣାପଡ଼ିବା ପରେ ଅବକାରୀ ବିଭାଗ ସଜାଗ ହୋଇଉଠିଛି। ଗତ ମାସରେ ଅନୁଗୋଳ ରାଣୀଗୁଡ଼ାର ଜୟପ୍ରକାଶ ଗୁପ୍ତାଙ୍କ ଘରୁ ବିପୁଳ ପରିମାଣର ବିଦେଶୀ ମଦ ପ୍ରସ୍ତୁତିରେ ବ୍ୟବହୃତ ସାମଗ୍ରୀ ଜବତ ହୋଇଥିଲା। ଅଭିଯୁକ୍ତ ଜୟପ୍ରକାଶ କୋର୍ଟରେ ଆତ୍ମସମର୍ପଣ କରିବାକୁ ଯାଉଥିବାବେଳେ ପୋଲିସ ତାଙ୍କୁ ଗିରଫ କରି ହେପାଜତ୍କୁ ନେଇଥିଲା। ସେହିପରି ଅରୁଣାଚଳପ୍ରଦେଶରେ ବିକ୍ରି ପାଇଁ ଉଦ୍ଦିଷ୍ଟ ୭୫ ଲକ୍ଷ ଟଙ୍କାର ବିଦେଶୀ ମଦ କଣ୍ଟେନରରେ ଅନୁଗୋଳ ଚାଲାଣ ବେଳେ ଢେଙ୍କାନାଳ ଜିଲା ଅବକାରୀ ବିଭାଗ ହାତରେ ଧରାପଡ଼ିଥିଲା। ଏହି ଘଟଣାରେ ୫ଜଣ ଗିରଫ ହୋଇଛନ୍ତି। ଅଭିଯୁକ୍ତଙ୍କୁ ଜେରା ବେଳେ ନକଲି ମଦ କାରବାର ସମ୍ପର୍କରେ ବହୁ ତଥ୍ୟ ପଦାକୁ ଆସିଛି। କୋଲକାତାରୁ ଡ୍ରମ୍ରେ ସ୍ପିରିଟ୍ ଆଣି କହ୍ଲେଇପାଳରେ ନକଲି ମଦ ବଟଲିଂ ପ୍ଲାଣ୍ଟ ଚାଲିଥିବା ଗୋଇନ୍ଦା ସୂଚନା ମିଳିବା ପରେ କଟକ ଅବକାରୀ ବିଭାଗ ଫ୍ଲାଇଂ ସ୍କ୍ବାଡ୍ ଅତର୍କିତ ଚଢ଼ାଉ କରିଥିଲା। ଘଟଣାସ୍ଥଳରୁ ୬୦ ଲିଟର ନକଲି ବିଦେଶୀ ମଦ, ୩୬୦ ଲିଟର ସ୍ପିରିଟ୍, ୨୮୫୦ ନକଲି ହଲୋଗ୍ରାମ, ୨୪୦୦ ଠିପି, ୧୦୦୦ ଖାଲି ବୋତଲ, ୧ ଲିଟର କାରାମେଲ, ୧ ଲିଟର ଏସେନ୍ସ ଫ୍ଲେବର, ଗୋଟିଏ ମିନିଟ୍ରକ୍ ଏବଂ ଗୋଟିଏ ଡିପ୍ ଫ୍ରିଜ୍ ଜବତ ହୋଇଛି। କଟକ ଅବକାରୀ ଅଧୀକ୍ଷକ ଦେବାଶିଷ ପଟେଲଙ୍କ ନେତୃତ୍ୱରେ ଏହି ଚଢ଼ାଉ କରାଯାଇଥିଲା। ଗିରଫ ଅଭିଯୁକ୍ତଙ୍କୁ ଜେରା ପରେ ଏଭଳି ନକଲି ମଦ କାରବାରର ଚେର କୁଆଡ଼େ ଲମ୍ବିଛି ତାହା ଜଣାପଡ଼ିବ ବୋଲି ଅବକାରୀ ବିଭାଗ ପକ୍ଷରୁ କୁହାଯାଇଛି।
