ନୂଆଦିଲ୍ଲୀ, ୨୦।୧୨: ଦଳୀୟ ସଂଗଠନରେ ସମ୍ପୂର୍ଣ୍ଣ ପରିବର୍ତ୍ତନ ପାଇଁ ଚିଠି ଲେଖିଥିବା ବରିଷ୍ଠ କଂଗ୍ରେସ ନେତାମାନଙ୍କୁ ଅନ୍ତରୀଣ ଅଧ୍ୟକ୍ଷା ସୋନିଆ ଗାନ୍ଧୀ ଦୀର୍ଘ ମାସ ପରେ ଶନିବାର ଭେଟିଥିଲେ। ରାହୁଲ ଗାନ୍ଧୀ ପୁଣି ଥରେ କଂଗ୍ରେସର ଅଧ୍ୟକ୍ଷ ପଦ ସମ୍ଭାଳିବା ପାଇଁ ଦିଆଯାଇଥିବା ପ୍ରସ୍ତାବକୁ କେହି ବିରୋଧ କରି ନ ଥିଲେ। ତେବେ ଖୁବ୍ଶୀଘ୍ର ଦଳରେ ଚିନ୍ତନ ଶିବିର ଲାଗି ପ୍ରସ୍ତାବ ଦିଆଯାଇଥିଲା। ଦଳ ପାଇଁ ସମସ୍ତେ ଯାହା ଚାହିଁବେ ସେ କରିବାକୁ ପ୍ରସ୍ତୁତ ବୋଲି ବୈଠକରେ ରାହୁଲ ଗାନ୍ଧୀ କହିଛନ୍ତି। ଦଳ ଏକ ପରିବାର ଭଳି ଏବଂ ସମସ୍ତେ ଏକାଠି କାମ କରିବେ ବୋଲି ସୋନିଆ କହିଥିଲେ।
ସୂଚନାଯୋଗ୍ୟ ଗତ ଅଗଷ୍ଟରେ ୨୩ ଜଣ ଅସନ୍ତୁଷ୍ଟ କଂଗ୍ରେସ ନେତା ସୋନିଆଙ୍କୁ ପତ୍ର ଲେଖି ସାଂଗଠନିକ ସ୍ତରରେ ସମ୍ପୂର୍ଣ୍ଣ ପରିବର୍ତ୍ତନ ପାଇଁ ପ୍ରସ୍ତାବ ଦେଇଥିଲେ। ଏଥିସହିତ ଦଳରେ ଏକ କାର୍ଯ୍ୟକାରୀ ଅଧ୍ୟକ୍ଷ ପଦ ସୃଷ୍ଟି ଲାଗି ସେମାନେ ଲେଖିଥିଲେ। ନୂଆ ବର୍ଷରେ ରାହୁଲ ପୁଣି ଥରେ ଦଳର ମଙ୍ଗ ଧରିପାରନ୍ତି ବୋଲି କଳ୍ପନାଜଳ୍ପନା ପ୍ରକାଶ ପାଇଆସୁଛି। ୪ ମାସ ପରେ ସୋନିଆ ତଥାକଥିତ ବିଦ୍ରୋହୀ ନେତାମାନଙ୍କୁ ଭେଟିଥିଲେ। ଅନ୍ତରୀଣ ଅଧ୍ୟକ୍ଷାଙ୍କ ୧୦ ଜନପଥ ବାସଭବନରେ ଅନୁଷ୍ଠିତ ଏହି ବୈଠକରେ ରାହୁଲ ଓ ପ୍ରିୟଙ୍କା ଗାନ୍ଧୀ ଭଦ୍ରା ମଧ୍ୟ ଉପସ୍ଥିତ ଥିଲେ। ଗତବର୍ଷ ସାଧାରଣ ନିର୍ବାଚନରେ ଦଳର ପରାଜୟ ପାଇଁ ନିଜକୁ ଦାୟୀ କରି ରାହୁଲ ଅଧ୍ୟକ୍ଷ ପଦରୁ ଇସ୍ତଫା ଦେବାରୁ ନୂଆ ନେତା ନିର୍ବାଚିତ ହେବା ପର୍ଯ୍ୟନ୍ତ ସୋନିଆ ଅନ୍ତରୀଣ ଅଧ୍ୟକ୍ଷ ପଦ ଗ୍ରହଣ କରିଥିଲେ।
ଦଳରେ ମତଭେଦ ନାହିଁ। ରାହୁଲ ଅଧ୍ୟକ୍ଷ ହେବାରେ କାହାର ସମସ୍ୟା ନାହିଁ ବୋଲି ବୈଠକ ପରେ ବରିଷ୍ଠ ନେତା ପଓ୍ବନ ବଂଶଲ କହିଛନ୍ତି। ଅନ୍ୟପକ୍ଷରେ ଦଳକୁ ସୁଦୃଢ଼ କରିବା ନେଇ ବୈଠକରେ ଆଲୋଚନା ହୋଇଥିଲା। ଭବିଷ୍ୟତ କାର୍ଯ୍ୟପନ୍ଥା ସ୍ପଷ୍ଟ ହୋଇନାହିଁ। ଶିମ୍ଲା ଓ ପଞ୍ଚମଢ଼ିରେ ଚିନ୍ତନ ଶିବିର ଅନୁଷ୍ଠିତ ହେବ ବୋଲି ପୃଥ୍ବୀରାଜ ଚଭନ କହିଛନ୍ତି।
