ଓ୍ବାଶିଂଟନ୍,୧୪।୧: ଇରାନରେ ଦେଶବ୍ୟାପୀ ପ୍ରତିବାଦ ମଧ୍ୟରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ତେହେରାନକୁ କଡ଼ା ଚେତାବନୀ ଦେଇଛନ୍ତି। ସେ କହିଛନ୍ତି, ଯଦି ଇରାନ ସରକାର ନିଜ ନାଗରିକଙ୍କ ବିରୋଧରେ ହିଂସାତ୍ମକ କାର୍ଯ୍ୟ ଜାରି ରଖେ, ତେବେ ଏହା ଗମ୍ଭୀର ପରିଣାମ ଭୋଗିବ। ଡେଟ୍ରଏଟରେ ଏକ କାର୍ଯ୍ୟକ୍ରମ ପରେ ସାମ୍ବାଦିକମାନଙ୍କ ସହ କଥାବାର୍ତ୍ତା କରି ଟ୍ରମ୍ପ କହିଛନ୍ତି, ଆମେରିକା ଇରାନର ପରିସ୍ଥିତି ଉପରେ କଡ଼ା ନଜର ରଖିଛି।
ଇରାନରେ ଚାଲିଥିବା ପ୍ରତିବାଦ ଏବେ ତୃତୀୟ ସପ୍ତାହରେ ପହଞ୍ଚିଛି। ମାନବାଧିକାର ସଂଗଠନ ଅନୁଯାୟୀ, ପିଲାମାନଙ୍କ ସମେତ ଶହ ଶହ ଲୋକଙ୍କ ମୃତ୍ୟୁ ହୋଇଛି। ଇରାନ ବିରୋଧରେ ଡୋନାଲ୍ଡ ଟ୍ରମ୍ପଙ୍କ କଡ଼ା ଚେତାବନୀ ଦେଇଥିଲେ। ଯଦିଓ ସେ କୌଣସି ନିର୍ଦ୍ଦିଷ୍ଟ କାର୍ଯ୍ୟାନୁଷ୍ଠାନ ଘୋଷଣା କରି ନ ଥିଲେ, ତାଙ୍କ ବିବୃତ୍ତି ସ୍ପଷ୍ଟ କରିଛି ଯେ ୱାଶିଂଟନ ଏହି ଘଟଣାକୁ ହାଲୁକା ଭାବରେ ନେଉନାହିଁ।
ଟ୍ରମ୍ପ କହିଛନ୍ତି ଯେ, ସେ ଇରାନର ପରିସ୍ଥିତିର ସମ୍ପୂର୍ଣ୍ଣ ସମୀକ୍ଷା କରିବା ପାଇଁ ହ୍ବାଇଟ ହାଉସକୁ ଫେରିବେ, ବିଶେଷକରି ହତ୍ୟା ରିପୋର୍ଟ ଉପରେ ସଠିକ ତଥ୍ୟ ସଂଗ୍ରହ କରିବେ। ଆମେରିକା ନିଶ୍ଚିତତା ବିନା ନିଷ୍କର୍ଷରେ ପହଞ୍ଚିବ ନାହିଁ, କିନ୍ତୁ ପରିସ୍ଥିତି ଚିନ୍ତାଜନକ।
ଇରାନରେ ପ୍ରତିବାଦ ସମୟରେ ଉଭା ହେଉଥିବା ସବୁଠାରୁ ଗମ୍ଭୀର ରିପୋର୍ଟ ମଧ୍ୟରୁ ଗୋଟିଏ ହେଉଛି ପ୍ରତିବାଦକାରୀଙ୍କ ହତ୍ୟା ଏବଂ ମୃତ୍ୟୁଦଣ୍ଡ। ଟ୍ରମ୍ପ ଏନେଇ କହିଛନ୍ତି,ଇରାନରେ ହଜାର ହଜାର ଲୋକଙ୍କୁ ହତ୍ୟା କରାଯାଉଛି ଏବଂ ଏବେ ମୃତ୍ୟୁଦଣ୍ଡର ରିପୋର୍ଟ ଆସୁଛି, ତେବେ ଏହା ଇରାନ ପାଇଁ ଭଲ ହେବ ନାହିଁ। ମାନବାଧିକାର ସଂଗଠନ ଅନୁଯାୟୀ, ନଅ ଜଣ ଶିଶୁ ସମେତ ଏପର୍ଯ୍ୟନ୍ତ ଅତି କମରେ ୫୦୫ ପ୍ରଦର୍ଶନକାରୀଙ୍କ ମୃତ୍ୟୁ ହୋଇଛି। ଏହା ବ୍ୟତୀତ, ୧୩୩ ସୁରକ୍ଷା ବାହିନୀ ସଦସ୍ୟ, ଜଣେ ପବ୍ଲିକ ପ୍ରସିକ୍ୟୁଟର ଏବଂ ଅନେକ ସାଧାରଣ ନାଗରିକ ମଧ୍ୟ ପ୍ରାଣ ହରାଇଛନ୍ତି। ଏହି ସଂଖ୍ୟାଗୁଡ଼ିକ ସୂଚାଇ ଦିଏ ଯେ ଏହି ଆନ୍ଦୋଳନ ଆଉ କେବଳ ସରକାର-ଜନତା ସଂଘର୍ଷ ନୁହେଁ, ବରଂ ସମଗ୍ର ଦେଶକୁ ପ୍ରଭାବିତ କରୁଥିବା ଏକ ସଙ୍କଟ ପାଲଟିଛି।
ଡିସେମ୍ବର ଶେଷ ଭାଗରୁ ଆରମ୍ଭ ହୋଇଥିବା ପ୍ରତିବାଦ ଏବେ ୧୮୭ଟି ସହରରେ ବ୍ୟାପିଛି, ୬୦୬ରୁ ଅଧିକ ସ୍ଥାନରେ ପ୍ରଦର୍ଶନ ରେକର୍ଡ କରାଯାଇଛି। ଏହି ଆନ୍ଦୋଳନକୁ ଇରାନର ସାମ୍ପ୍ରତିକ ଇତିହାସରେ ସବୁଠାରୁ ବ୍ୟାପକ ଭାବରେ ବିବେଚନା କରାଯାଏ। ଏହି ପ୍ରସଙ୍ଗରେ ଅନ୍ତର୍ଜାତୀୟ ପ୍ରତିକ୍ରିୟା ବିଭାଜିତ। କିଛି ଦେଶ ଏହାକୁ ବିଦେଶୀ ହସ୍ତକ୍ଷେପ ଦ୍ୱାରା ଅନୁପ୍ରାଣିତ ଅଶାନ୍ତି ବୋଲି କହୁଛନ୍ତି। ଅନେକ ପାଶ୍ଚାତ୍ୟ ଦେଶ ଏବଂ ମାନବାଧିକାର ସଂଗଠନ ଇରାନ ସରକାରଙ୍କୁ ଅତ୍ୟଧିକ ହିଂସା ପାଇଁ ଅଭିଯୋଗ କରୁଛନ୍ତି।
Dharitri – Odisha’s No.1 Odia Daily
