ବ୍ରହ୍ମପୁର ଅଫିସ,୮ା୧୧: ବିଧାୟକ ପ୍ରଦୀପ ପାଣିଗ୍ରାହୀ ବିଜେଡିରୁ ବହିଷ୍କୃତ ହେବାର ୨ ବର୍ଷ ବିତିବାକୁ ଯାଉଛି। ତେଣୁ ଗୋପାଳପୁର ନିର୍ବାଚନମଣ୍ଡଳୀର ସାଙ୍ଗଠନିକ ଦାୟିତ୍ୱ ମୁଖ୍ୟମନ୍ତ୍ରୀଙ୍କ ରାଜନୈତିକ ସଚିବ ଗୋପବନ୍ଧୁ ଦାଶଙ୍କୁ ଶାସକ ଦଳ ପକ୍ଷରୁ ନ୍ୟସ୍ତ କରାଯାଇଛି। ଦଳର କାର୍ଯ୍ୟକ୍ରମ ଅନୁସାରେ ମାସକ ତଳୁ ଜନସମ୍ପର୍କ ପଦଯାତ୍ରା ଆରମ୍ଭ ହୋଇଛି। ବିଧାୟକ ପାଣିଗ୍ରାହୀ ସମର୍ଥକଙ୍କୁ ସାଥିରେ ନେଇ ବିଧାନସଭା କ୍ଷେତ୍ରର ବିଭିନ୍ନ ଅଞ୍ଚଳରେ ପଦଯାତ୍ରା ମାଧ୍ୟମରେ ଜନସମ୍ପର୍କ ବଢ଼ାଇବାରେ ଲାଗିଛନ୍ତି। ଫଳରେ ଗୋପାଳପୁରରେ ଜନସମ୍ପର୍କ ପଦଯାତ୍ରା ପ୍ରତିଯୋଗିତାମୂଳକ ହୋଇଯାଇଛି।
ବିଧାୟକଙ୍କ ସମର୍ଥକମାନେ ଗତ ସପ୍ତାହରେ ନୂଆ ସଂଗଠନ ପ୍ରଦୀପ ସେନା ଗଠନ କରିଛନ୍ତି। ଏହାର କର୍ମକର୍ତ୍ତା ମନୋନୀତ ହୋଇଛନ୍ତି। ବର୍ଷକ ପରେ ସାଧାରଣ ନିର୍ବାଚନ ହେବାକୁ ଥିବାରୁ ଏବେଠୁ ରଣନୀତି ପ୍ରସ୍ତୁତ ହେଉଥିବା ରାଜନୈତିକ ବିଶ୍ଲେଷକ ଆଲୋଚନା କରୁଛନ୍ତି। ଫଳରେ ଚତୁର୍ଥଥର ପାଇଁ ପାଣିଗ୍ରାହୀ ଗୋପାଳପୁର ଆସନରେ ନିର୍ବାଚନ ଲଢ଼ିବାର ସଂକେତ ବୋଲି ବିଶ୍ଲେଷକ କହୁଛନ୍ତି। ଏହା ଯଦି ହେବ ତେବେ ବିଜେଡିକୁ ମୁକାବିଲା ପ୍ରଦୀପ ସେନା କରିବ ବୋଲି ବିଭିନ୍ନ ମହଲ ଚର୍ଚ୍ଚା କରୁଛନ୍ତି। ସୂଚନାଯୋଗ୍ୟ, ବିଜେଡିରୁ ବହିଷ୍କୃତ ହେବା ପରେ ଦୀର୍ଘ ମାସ ଧରି ପ୍ରଦୀପ ନିର୍ବାଚନମଣ୍ଡଳୀ ଆସୁ ନ ଥିଲେ। ଗତ ସ୍ବାଧୀନତା ଦିବସରେ ପତାକା ଉତ୍ତୋଳନ ପାଇଁ ସେ କମଳାପୁର ଆସିଥିଲେ। ବିଜେଡିର ନୂଆ ପୁରୁଣା କର୍ମୀ ତାଙ୍କୁ ବିରୋଧ କରିବା ସହ ଠେଲାପେଲା ମଧ୍ୟ କରିଥିଲେ। ପରବର୍ତ୍ତୀ ପଯର୍ର୍ୟାୟରେ ଗଣେଶ ପୂଜାରେ ନିର୍ବାଚନମଣ୍ଡଳୀ ଅନ୍ତର୍ଭୁକ୍ତ ମହାନଗର ୪୦ନଂ. ୱାର୍ଡ ଆଙ୍କୁଲି ଆସିଥିଲେ। ଅରପରପକ୍ଷରେ ଆଗାମୀ ନିର୍ବାଚନରେ ଗୋପାଳପୁରରୁ ବିଜେଡି କାହାକୁ ବିଧାୟକ ପ୍ରାର୍ଥୀ କରିବ ତାହା ମଧ୍ୟ ଚର୍ଚ୍ଚାର ବିଷୟ ପାଲଟିଛି। ଦଳର ମୁଖିଆ ତଥା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସବୁକ୍ଷେତ୍ରରେ ମହିଳାଙ୍କୁ ଅଗ୍ରାଧିକାର ଦେଉଥିବାରୁ ମହିଳାଙ୍କୁ ପ୍ରାର୍ଥୀ କରିିପାରନ୍ତି ବୋଲି ଲୋକେ ଆଲୋଚନା କରୁଛନ୍ତି।
ସେପ୍ଟେମ୍ବର ୨୭ରେ ବିଧାୟକ ପାଣିଗ୍ରାହୀ ଗୋପାଳପୁର ସହରାଞ୍ଚଳରେ ଜନସମ୍ପର୍କ ପଦଯାତ୍ରା ପରିପ୍ରେକ୍ଷୀରେ କହୁ କହୁ କହିଲେ, ବିଜେଡି ସଭାପତି ଆଗାମୀ ନିର୍ବାଚନରେ ଏହି ନିର୍ବାଚନମଣ୍ଡଳୀରେ ମହିଳାଙ୍କୁ ବିଧାୟକ ପ୍ରାର୍ଥୀ କରିବେ। ଏହି ଟିପ୍ପଣୀ ରାଜନୈତିକ ମହଲରେ ଚର୍ଚ୍ଚାର ବିଷୟ ପାଲଟିଛି। ବିଜେଡି ଯଦି ମହିଳା ପ୍ରାର୍ଥୀ ଦେବ ତେବେ ପ୍ରଦୀପ ତାଙ୍କ ସ୍ତ୍ରୀ ସୁଜାତାଙ୍କୁ ଲଢ଼େଇର ମଇଦାନକୁ ଓହ୍ଲାଇବାର ସମ୍ଭାବନା ଥିବା ମଧ୍ୟ ଅଞ୍ଚଳବାସୀ ଚର୍ଚ୍ଚା କରୁଛନ୍ତି। ଆଉ କେତେକଙ୍କ ମତରେ ସୁଜାତା ବନାମ ସୁଜାତାଙ୍କ ମଧ୍ୟରେ ଲଢ଼େଇ ବେଶ୍ ରୋଚକ ହୋଇପାରିବ।
