କଣାସ,୨୦।୨(ସ୍ବ.ପ୍ର.): ପୁରୀ ଜିଲା ଚିଲିକା ଉପକୂଳରେ ଅବସ୍ଥିତ କଣାସ ବ୍ଲକରେ ଗୋଚରଜମି ଜବରଦଖଲ ହୋଇଥିବାବେଳେ ପଶୁଙ୍କ ପାଇଁ ଥିବା ପ୍ରାଣୀ ଚିକିତ୍ସା କେନ୍ଦ୍ରରେ ଆବଶ୍ୟକ କର୍ମଚାରୀ ନାହାନ୍ତି। ଫଳରେ ବ୍ଲକରେ ଦିନକୁ ଦିନ ପ୍ରାଣୀଙ୍କ ମୃତ୍ୟୁ ଘଟୁଛି ଏବଂ ପ୍ରାଣୀ ସମ୍ପଦ କମି ଯାଉଥିବାରୁ ଘୋର ସଙ୍କଟ ଦେଖାଦେଇଛି। ଅନୁସନ୍ଧାନରୁ ଜଣାପଡିଛି, କଣାସ ବ୍ଲକର ୨୮ଟି ପଞ୍ଚାୟତରେ ୧୩୯ଟି ରାଜସ୍ବ ଗ୍ରାମ ଓ ୧୦୮ପଡାଗ୍ରାମରେ ୪୫୪୩ ହେକ୍ଟର ପୂର୍ବରୁ ଅନାବାଦୀ ଓ ଗୋଚରଜମି ପ୍ରାଣୀମାନଙ୍କ ଚରିବା ପାଇଁ ଥିଲା। ହେଲେ ପ୍ରଶାସନର ଉଦାସୀନତା ଯୋଗୁଁ ଏହି ଗୋଚରଜମିକୁ ବିଭିନ୍ନ ପ୍ରଭାବଶାଳୀ ବ୍ୟକ୍ତିମାନେ ଜବରଦଖଲ କରି ସେଥିରେ ବଗିଚା, ପୋଖରୀ, କୋଠାବାଡି ନିର୍ମାଣ କରିଛନ୍ତି। ଗୋଚରଜମି ଅଭାବରୁ ଅନେକ ଚାଷୀ ଗୋ ପାଳନ କରିବା ପାଇଁ ଆଉ ଆଗଭର ହେଉନାହାନ୍ତି। ସେଥିଯାଗୁ ଗୋରୁ ଘାସ ଖାଇବା କଷ୍ଟକର ବ୍ୟାପାର ହୋଇପଡିଛି। ଅନ୍ୟ ଏକ ପ୍ରମୁଖ ସମସ୍ୟା ହେଉଛି ଏହି ବ୍ଲକ ଚିଲିକା ଉପକୂଳରେ ଥିବାରୁ ଏଠାରେ ପ୍ରତିବର୍ଷ ଗୋରୁ, ମଇଁଷିଙ୍କୁ ବଜବଜିଆ, ସାହାଣ ରୋଗ ହେଉଛି ଏବଂ ଅନେକ ଗୋରୁ ମୃତ୍ୟୁମୁଖରେ ପଡୁଛନ୍ତି। ବ୍ଲକର କଣାସଠାରେ ମୁଖ୍ୟ ପ୍ରାଣୀ ଚିକିତ୍ସା କେନ୍ଦ୍ର ଏବଂ ବ୍ଲକର ବିଭିନ୍ନ ପଞ୍ଚାୟତରେ ୧୧ଟି ସହାୟକ ପ୍ରାଣୀଚିକିତ୍ସା କେନ୍ଦ୍ର ରହିଛି। ହେଲେ ଆବଶ୍ୟକ କର୍ମଚାରୀ ଅଭାବରୁ ପ୍ରାଣୀମାନେ ଠିକ୍ ଚିକିତ୍ସା ପାଇପାରୁନାହାନ୍ତି। ଫଳରେ ସେମାନଙ୍କ ମୃତ୍ୟୁ ହେଉଛି। ଏଥିନେଇ ଚାଷୀ ଗୋ ପାଳନ କରିବାକୁ ମନ ବଳାଉ ନାହାନ୍ତି। ଏକ ସର୍ଭେରୁ ଜଣାପଡିଛି, ବ୍ଲକରେ ବର୍ତ୍ତମାନ ଗାଈ, ବଳଦ, ମଇଁଷିଙ୍କ ସଂଖ୍ୟା ୪୩ ହଜାର ୬୦୬ ରହିଥିବାବେଳେ ୫୮୧୧ ମେଣ୍ଢା, ୪୫୩୮ ଛେଳି, ୮୩୫୪ କୁକୁଡ଼ା ଓ ବତକ ଏବଂ ୩୧୪୧ କୁକୁର ଥିବା ଜଣାପଡିଛି। ପ୍ରାଣୀ ସମ୍ପଦ ସୁରକ୍ଷା ଓ ଜନସାଧାରଣଙ୍କ ଅର୍ଥନୈତିକ ବିକାଶ ପାଇଁ ଏ ଦିଗରେ ତୁରନ୍ତ ପଦେକ୍ଷ ନିଆଯିବା ଆବଶ୍ୟକ ହୋଇପଡିଛି। ଜବରଦଖଲ ଗୋଚର ଓ ଅନାବାଦୀ ଜମି ଉଦ୍ଧାର କରିବାକୁ ପ୍ରଶାସନ ପକ୍ଷରୁ ଉଦ୍ୟମ ହେବା ଆବଶ୍ୟକ ବୋଲି କଣାସ ଅଞ୍ଚଳର ବୁଦ୍ଧିଜୀବୀମାନେ ମତବ୍ୟକ୍ତ କରିଛନ୍ତି। ଏଥିସହ ପ୍ରାଣୀ ଚିକିତ୍ସା କେନ୍ଦ୍ରରେ ଖାଲିଥିବା ପଦବୀଗୁଡିକ ପୂରଣ କରିବାକୁ ଦାବି ହୋଇଛି।
