ବୁଗୁଡ଼ା,୨୩।୨(କାଳିଚରଣଦାଶ): ଗଂଜାମ ଜିଲା ବୁଗୁଡ଼ା ବ୍ଲକ ଗୋଲାବନ୍ଧ ପଞ୍ଚାୟତ ଅନ୍ତର୍ଗତ ସୁବୁଦ୍ଧିପଲ୍ଲୀ ଗ୍ରାମର ବିଧବା ଦମୟନ୍ତୀଙ୍କ ପାଇଁ ଏବେ ଆବାସ ପାଲଟି ଯାଇଛି ସାତ ସପନ । କେତେ ଗୁହାରି କଲେବି କେହି ଶୁଣୁ ନାହାନ୍ତି । ୧୫ବର୍ଷ ତଳେ ତାଙ୍କ ସ୍ୱାମୀଙ୍କ ନାମରେ କୁଆଡେ ଆବାସ ପାଇଁ କାର୍ଯ୍ୟାଦେଶ ମିଳିଥିଲା, ହେଲେ ଆବାସ ତିଆରି ନହୋଇ ସେହି ଟଙ୍କା ତାଙ୍କ ସ୍ୱାମୀକୁ ହାତ ବାରିସୀ କରି ଦଲାଲମାନେ ଖାଇଗଲେ ସେ କଥା ଦମୟନ୍ତୀ ଜାଣି ନାହାନ୍ତି ।
ଦମୟନ୍ତୀ ଯେତେଥର ଆବାସ ପାଇଁ ଆବେଦନ କରୁଛନ୍ତି ତାଙ୍କୁ ଆବାସ ମିଳି ସାରିଛି କହି ପ୍ରଶାସନିକ କର୍ମଚାରୀ ମାନେ ଖାରଜ କରିଦେଉଛନ୍ତି । ୫ ବର୍ଷ ହେଲା ସ୍ୱାମୀ ଅଲେଖ ଦାଶଙ୍କ ମୃତ୍ୟୁ ହୋଇ ସାରିଲାଣି । ଦମୟନ୍ତୀଙ୍କ ରାସନ କାର୍ଡ ଅଛି ବିଧବା ଭତ୍ତା ମଧ୍ୟ ପାଉଛନ୍ତି ହେଲେ ମୁଣ୍ଡ ଉପରେ ଛାତ ନାହିଁ ଫଳରେ ଗୋଟିଏ ବଖରା ବିଶିଷ୍ଟ ଭଙ୍ଗା କୁଡ଼ିଆରେ ଆଶ୍ରୟ ନେବାକୁ ବାଧ୍ୟ ହୋଇଛନ୍ତି । ଯେଉଁଠି ରୋଷଇ ସେଇଠି ଶୋଉଛନ୍ତି । ଶୌଚ ହେବାକୁ ପୋଖରୀ ହିଡ଼ ଭରସା । ପ୍ରାୟ ୫ବର୍ଷ ତଳେ କାକୁତି ମିନତି ହୋଇ ଯେଉଁ ପାଲ ଖଣ୍ଡେ ଆଣି ଚାଳ ଉପରେ ପକାଇଥିଲେ ତାହା ଏବେ ଖଣ୍ଡ ଖଣ୍ଡ ହୋଇଗଲାଣି ।
ଚାଳରୁ ଛପର ଉଡି ଠାଁଏ ଠାଁଏ କଣା ହୋଇ ଗଲାଣି ଫଳରେ ବର୍ଷା ହେଲେ କଥା ସରିଯାଉଛି । ନା ରୋଷଇ କରି ପାରୁଛନ୍ତି ନା ଘରେ ରହି ପାରୁଛନ୍ତି । ଦମୟନ୍ତୀଙ୍କ ଦୁଇଟି ଝିଅ ବାହା ହୋଇ ସାରିଥିବା ବେଳେ ଏକମାତ୍ର ପୁଅ ସୁନୀଲ(୨୭) ନିକଟରେ ଥିବା ଏକ ଧାନ ମିଲରେ ଶ୍ରମିକ ଭାବେ କାମ କରୁଥିବା ବେଳେ ଦମୟନ୍ତୀ କେଉଁଠି ଭୋଜି ଭାତ ହେଲେ ପରିବା କାଟିବା ପାଇଁ ଯାଉଛନ୍ତି । ଏମିତିରେ ଘର ଚଳିବାକୁ ସମ୍ଭବ ହେଉନଥିବା ବେଳେ ଘର ମରାମତି କରିବା ତାଙ୍କ ପକ୍ଷେ ଅସମ୍ଭବ ହୋଇ ପଡିଛି । ତାଙ୍କ ସ୍ୱାମୀ ହୁଅନ୍ତୁ କି ଦଲାଲ ସେମାନେ ଟଙ୍କା ଭାଗ ବାଣ୍ଟି ଦେଇ ଯିଏ ଯୁଆଡେ ଚାଲି ଗଲେଣି ହେଲେ ଏବେ ଦଶା ଭୋଗୁଛନ୍ତି ଦମୟନ୍ତୀ । ତେବେ ଘର ନହୋଇ ଟଙ୍କା କିପରି ଉଠା ଯାଇଥିଲା ଏ ନେଇ ପ୍ରଶାସନ ତଦନ୍ତ କରିବା ସହ ନିରୀହ ଗରିବ ବିଧବା ଦମୟନ୍ତୀଙ୍କୁ ଆବାସ ଯୋଜନାରେ ଘର ଖଣ୍ଡେ ଯୋଗାଇ ଦେବା ପାଇଁ ସାଧାରଣରେ ଦାବି ହେଉଛି ।
