ନୂଆଦିଲ୍ଲୀ,୨୫।୭: ଶିକ୍ଷାମନ୍ତ୍ରୀ ପଦରୁ ଇସ୍ତଫା ଦେଲେ ଧର୍ମେନ୍ଦ୍ର ପ୍ରଧାନ। Gen-Z ଆଗରେ ନଇଁଲେ କେନ୍ଦ୍ରମନ୍ତ୍ରୀ। NEET-UG ପରୀକ୍ଷାରେ ଅନିୟମିତତା, ପେପର ଲିକ ବିବାଦ ଏବଂ ଏହାର ପ୍ରତିବାଦରେ ସାରା ଦେଶରେ ଚାଲିଥିବା ଛାତ୍ର ଆନ୍ଦୋଳନ ଚାପରେ ଧର୍ମେନ୍ଦ୍ର ଇସ୍ତଫା ଦେଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ପଠାଇଥିବା ନିଜ ଚିଠିରେ ସେ ସ୍ପଷ୍ଟ କରିଛନ୍ତି ଯେ ଦେଶର କୋଟି କୋଟି ବିଦ୍ୟାର୍ଥୀଙ୍କ ଭବିଷ୍ୟତ ଏବଂ ଜାତୀୟ ପରୀକ୍ଷା ପ୍ରଣାଳୀର ବିଶ୍ୱସନୀୟତା କୌଣସି ବି ପଦ କିମ୍ୱା ବ୍ୟକ୍ତିଙ୍କଠାରୁ ଉର୍ଦ୍ଧ୍ୱରେ। ଜନ୍ତର-ମନ୍ତରରେ ଜାରି ରହିଥିବା ପ୍ରଦର୍ଶନ ଏବଂ ବିରୋଧୀ ଦଳଗୁଡ଼ିକର କ୍ରମାଗତ ବୃଦ୍ଧି ପାଉଥିବା ଚାପ ପରେ ସରକାରଙ୍କୁ ଏହି ବଡ଼ ପଦକ୍ଷେପ ନେବାକୁ ପଡ଼ିଛି।
ଶିକ୍ଷା ମନ୍ତ୍ରଣାଳୟର ଦାୟିତ୍ୱ ସମ୍ଭାଳୁଥିବା ଧର୍ମେନ୍ଦ୍ର ପ୍ରଧାନଙ୍କ ଉପରେ ଗତ କିଛି ସମୟ ହେବ ପ୍ରଶାସନିକ ଏବଂ ରାଜନୈତିକ ଚାପ କ୍ରମାଗତ ଭାବେ ବଢ଼ୁଥିଲା। ରାଜନୈତିକ ମହଲରେ ଚର୍ଚ୍ଚା ଡେଉଛି କି ତାଙ୍କୁ ଏହି କାରଣ ଯୋଗୁ ଇସ୍ତଫା ଦେଇଛନ୍ତି।
NEET-UG ପରୀକ୍ଷାରେ ବ୍ୟାପକ ଅନିୟମିତତା ଏବଂ ପେପର ଲିକ ଅଭିଯୋଗ ପୂରା ପ୍ରଣାଳୀ ଉପରେ ପ୍ରଶ୍ନବାଚୀ ସୃଷ୍ଟି କରିଥିଲା। ଲକ୍ଷ ଲକ୍ଷ ମେଡିକାଲ ପରୀକ୍ଷାର୍ଥୀଙ୍କ ଭବିଷ୍ୟତ ଅନିଶ୍ଚିତତା ଆଡ଼କୁ ଠେଲି ହୋଇଯାଇଥିଲା, ଯାହାଦ୍ୱାରା ମନ୍ତ୍ରଣାଳୟକୁ ସମାଲୋଚନାର ଶିକାର ହେବାକୁ ପଡିଥିଲା।
‘କକରୋଚ ଜନତା ପାର୍ଟି’ (CJP) ଏବଂ ବିଭିନ୍ନ ଛାତ୍ର ସଂଗଠନର ନେତୃତ୍ୱରେ ଜନ୍ତର-ମନ୍ତରରେ ବ୍ୟାପକ ବିରୋଧ ପ୍ରଦର୍ଶନ ଆୟୋଜିତ ହୋଇଥିଲା। ଶିକ୍ଷାମନ୍ତ୍ରୀ ଇସ୍ତଫା ନ ଦେବା ପର୍ଯ୍ୟନ୍ତ ଆନ୍ଦୋଳନ ଶେଷ ନ କରିବାକୁ ଛାତ୍ରମାନେ କଠୋର ଆଭିମୁଖ୍ୟ ଗ୍ରହଣ କରିଥିଲେ।
ପରୀକ୍ଷା ପରିଚାଳନା କରୁଥିବା ସଂସ୍ଥା NTAର କାର୍ଯ୍ୟଶୈଳୀ ଉପରେ ଗମ୍ଭୀର ପ୍ରଶ୍ନ ଉଠିଥିଲା। ଯଦିଓ ସରକାର ଦୃଢ଼ ପଦକ୍ଷେପ ନେଇ NTAର ୪୭ ଜଣ ଅଧିକାରୀଙ୍କୁ ବରଖାସ୍ତ କରିଥିଲେ, ତଥାପି ବିବାଦ ଥମି ନ ଥିଲା ଏବଂ ଚାପ ସିଧାସଳଖ ମନ୍ତ୍ରୀଙ୍କ ଉପରେ ଆସି ପଡ଼ିଥିଲା।
ସଂସଦର ମୌସୁମୀ ଅଧିବେଶନରେ ବିରୋଧୀ ଦଳଗୁଡ଼ିକ ଏକଜୁଟ ହୋଇ ଶିକ୍ଷାମନ୍ତ୍ରୀଙ୍କ ଇସ୍ତଫା ଦାବି କରିବା ସହ ଗୃହ କାର୍ଯ୍ୟ ବାଧାପ୍ରାପ୍ତ କରିଥିଲେ। ପେପର ଲିକ ଉପରେ ଆଲୋଚନା ପୂର୍ୱରୁ ମନ୍ତ୍ରୀଙ୍କ ନୈତିକ ଦାୟିତ୍ୱ ର୍ନିଦ୍ଧାରଣ କରାଯାଉ ବୋଲି ବିରୋଧୀ ସ୍ପଷ୍ଟ କରିଦେଇଥିଲେ।
