ନୂଆଦିଲ୍ଲୀ: ପାଇକାରୀ ମୂଲ୍ୟଭିତ୍ତିକ ମୁଦ୍ରାସ୍ଫୀତି (ଡବ୍ଲ୍ୟୁପିଆଇ)୯ ମାସର ସର୍ବୋଚ୍ଚ ସ୍ତରରେ ରହିଛି। ନଭେମ୍ବରରେ ଏହା ୧.୫୫% ସ୍ତର ଛୁଇଁଛି। ମାନୁଫାକ୍ଚର ସାମଗ୍ରୀ ଦର ଉଚ୍ଚରେ ରହିବା ଯୋଗୁ ଏଭଳି ସ୍ଥିତି ଉପୁଜିଛି। ଏହି ସମୟରେ ଖାଦ୍ୟ ସାମଗ୍ରୀ ଦରଦାମ ସ୍ବାଭାବିକ ରହିଛି। ଚଳିତ ବର୍ଷ ଅକ୍ଟୋବରେ ଡବ୍ଲ୍ୟୁପିଆଇ ୧.୪୮% ସ୍ତରରେ ରହିଥିଲା। ଗତ ବର୍ଷ ନଭେମ୍ବରରେ ଏହା ୦.୫୮%ରେ ଥିଲା। ଫେବୃୟାରୀ ପରଠାରୁ ପାଇକାରୀ ମୂଲ୍ୟଭିତ୍ତିକ ମୁଦ୍ରାସ୍ଫୀତି ସର୍ବୋଚ୍ଚ ସ୍ତର ରହିଛି। ଫେବୃୟାରୀରେ ଏହା ୨.୨୬% ସ୍ତରରେ ରହିଥିଲା।
ନଭେମ୍ବର ମାସରେ ଖାଦ୍ୟ ସାମଗ୍ରୀ ବର୍ଗରେ ମୁଦ୍ରାସ୍ଫୀତି ୩.୯୪% ସ୍ତରରେ ରହିଛି। ଏହା ଅକ୍ଟୋବର ମାସରେ ୬.୩୭% ସ୍ତରରେ ରହିଥିଲା। ପନିପରିବା ଏବଂ ଆଳୁର ଦର ଯଥାକ୍ରମେ ୧୨.୨୪% ଏବଂ ୧୧୫.୨% ବୃଦ୍ଧି ପାଇଛି। ନଭେମ୍ବର ମାସରେ ଅଣ ଖାଦ୍ୟ ସାମଗ୍ରୀ ଦାମ ୮.୪୩% ସ୍ତରରେ ରହିଛି। ସେହିଭଳି ଇନ୍ଧନ ଏବଂ ଶକ୍ତି ବାସ୍କେଟରେ ଏହା -୯.୮୭% ସ୍ତରରେ ରହିଛି। ଏହି ପରିପ୍ରେକ୍ଷୀରେ ଇକ୍ରାର ଅର୍ଥନୀତିଜ୍ଞ ଆଦିତି ନାୟାର କହିଛନ୍ତି, କୋର୍ ଡବ୍ଲ୍ୟୁପିଆଇ ୨୨ ମାସର ସର୍ବୋଚ୍ଚ ସ୍ତର ୨.୬% ରହିଛି।
ରିଜର୍ଭ ବ୍ୟାଙ୍କ ଗତ ମୁଦ୍ରାନୀତି ସମୀକ୍ଷା ବୈଠକରେ ରେପୋକୁ ଅପରିବର୍ତ୍ତିତ ରଖିଛି। ଜିଡିପି ଅଭିବୃଦ୍ଧିକୁ ଉତ୍ସାହିତ କରିବା ଲାଗି କେନ୍ଦ୍ରୀୟ ବ୍ୟାଙ୍କ ବିଭିନ୍ନ ପଦକ୍ଷେପ ଘୋଷଣା କରିଛି। ସେହିଭଳି ଆଗାମୀ ଦିନରେ ମଧ୍ୟ ମୁଦ୍ରାସ୍ଫୀତି ବଢିବ ବୋଲି ଆର୍ବିଆଇ ପୂର୍ବରୁ ଆକଳନ କରିଛି। ଡିସେମ୍ବର ତ୍ରୈମାସ ଲାଗି ଖୁଚୁରା ମୁଦ୍ରାସ୍ଫୀତି ୬.୮% ଏବଂ ମାର୍ଚ୍ଚ ତ୍ରୈମାସ ଲାଗି ୫.୮% ରହିବା ଲାଗି ଅନୁମାନ କରାଯାଇଛି। ସେପ୍ଟେମ୍ବର ମାସରେ ଖୁଚୁରା ମୁଦ୍ରାସ୍ଫୀତି ୭.୩% ସ୍ତରକୁ ବଢିଛି। ଏହା ଅକ୍ଟୋବରରେ ୭.୬% ସ୍ତର ଛୁଇଁଛି।
