ନ୍ୟୁୟର୍କ,୩୧।୭: କରୋନା ଭୁତାଣୁ ସାରା ବିଶ୍ୱରେ ହୁ ହୁ ହୋଇ ବଢି ଚାଲିଛି। ଏବେ ଏହାର ଟିକା ପାଇଁ ବିଭିନ୍ନ ଦେଶ ଚେଷ୍ଟା ଚଳାଇଛନ୍ତି। କିଛି ଟିକା ପରୀକ୍ଷଣର ଶେୟ ପର୍ଯ୍ୟାୟରେ ଅଛି। ତେବେ ଏହି ଟିକାର ସମ୍ପୂର୍ଣ୍ଣ ମାତ୍ରା ପ୍ରଥମେ କାହାକୁ ଦିଆଯିବ ତାହାକୁ ନେଇ ଦ୍ୱନ୍ଦ ଲାଗି ରହିଛି। ଏବେ ଆମେରିକା ସମେତ ଅନ୍ୟାନ୍ୟ ଦେଶ ଗୁଡିକ ଏମିତି ଲୋକଙ୍କୁ ଖୋଜିବା ଆରମ୍ଭ କରାଯାଉଛି, ଯାହାକୁ ପ୍ରଥମେ ଏହି ଟିକା ସମ୍ପୂର୍ଣ୍ଣ ମାତ୍ରା ଦିଆଯାଇପାରିବ। ଏହାର ପ୍ରସ୍ତୁତିରେ ବଡ ବଡ ଡାକ୍ତରଙ୍କ ସମେତ ୨୦୦୯ରେ ଏଚ୍୧ଏନ୍୧ ଇନଫ୍ଲୁଏଞ୍ଜା ସମୟରେ ଯୋଜନା ପ୍ରସ୍ତୁତ କରିଥିବା ବୈଜ୍ଞାନିକମାନେ ମଧ୍ୟ ସାମିଲ ହୋଇଛନ୍ତି। ଆମେରିକାରେ ସର୍ବପ୍ରଥମେ କରୋନା ଟିକା ସ୍ବାସ୍ଥ୍ୟକର୍ମୀ, ବୃଦ୍ଧାବୃଦ୍ଧ, ଆଇସିୟୁରେ ଭର୍ତ୍ତି ଥିବା ଲୋକ ଏବଂ ଅଧିକ ଅସୁସ୍ଥ ଥିବା ରୋଗୀଙ୍କୁ ଦିଆଯିବ ବୋଲି ଆଲୋଚନା ଚାଲିଛି। କିନ୍ତୁ ଏପର୍ଯ୍ୟନ୍ତ କୌଣସି ନିଷ୍ପତ୍ତି ନିଆଯାଇନାହିଁ। ଆମେରିକାରେ ୨ଟି କରୋନା ଟିକା ପ୍ରସ୍ତୁତ କରାଯାଇଛି। ଯାହାର ପରୀକ୍ଷଣ ଶେଷ ପର୍ଯ୍ୟାୟରେ ରହିଛି। ଚଳିତବର୍ଷ ଶେଷ ଆଡକୁ ଏହି ଟିକାର ପ୍ରଥମ ମାତ୍ରା ରୋଗୀଙ୍କୁ ଦିଆଯିବ ବୋଲି କୁହାଯାଉଛି। ଏବେ ଏହି ଟିକା କାହାକୁ ଦିଆଯିବ ସେମାନଙ୍କ ଏକ ତାଲିକା ପ୍ରସ୍ତୁତ କରାଯାଉଛି। ନ୍ୟାଶନାଲ୍ ଇନଷ୍ଟିଚ୍ୟୁଟ୍ ଅଫ୍ ହେଲଥ୍ର ନିର୍ଦ୍ଦେଶକ ଫ୍ରାନଶିଶ୍ କୋଲିନ୍ସ କହିଛନ୍ତି, କରୋନା ଟିକା ପ୍ରଥମେ କାହାକୁ ଦିଆଯିବ, ଏହା ଏକ ବଡ ବିବାଦ ସୃଷ୍ଟି କରିପାରେ।
