ନୂଆଦିଲ୍ଲୀ,୧।୧୦: ପାକିସ୍ତାନ କ୍ରିକେଟ ବୋର୍ଡ (ପିସିବି)ର ଚେୟାରମ୍ୟାନ ମୋହସିନ ନକବି ଏବେ ଖୁବ ଚର୍ଚ୍ଚାରେ ଅଛନ୍ତି। ଦୁବାଇରେ ଗତ ରବିବାର ଏସିଆ କପ ୨୦୨୫ ଜିତିବା ପରେ ଭାରତୀୟ କ୍ରିକେଟ ଟିମ ନକବିଙ୍କଠାରୁ ଟ୍ରଫି ନେବାକୁ ମନା କରିଦେଇଥିଲା। ଏହାପରେ ଭାରତୀୟ ଖେଳାଳିମାନେ ବିନା ଟ୍ରଫିରେ ବିଜୟ ଉତ୍ସବ ମନାଇଥିଲେ। ଟ୍ରଫି ନ ନେବା କାରଣରୁ ନକବି ରାଗି ଯାଇଥିଲେ। ସେ ଟ୍ରଫି ଓ ପଦକ ଦୁଇଟିଯାକ ଭାରତୀୟ ଟିମଠାରୁ ଦୂରେଇ ରଖିଦେଇଥିଲେ। ଏହା ପରେ ବିବାଦ ଆରମ୍ଭ ହୋଇଯାଇଥିଲା। ବିସିସିଆଇର ଅଧିକାରୀମାନେ ନକବିଙ୍କୁ କହିଥିଲେ ଯେ ଟ୍ରଫି ଓ ପଦକ ବିଜୟୀ ଟିମ୍କୁ ଫେରାଇବା ଉଚିତ, କିନ୍ତୁ ସେ ଏହା ଦେବାକୁ ମନା କରିଦେଇଥିଲେ।
ତେବେ ୨୮ ସେପ୍ଟେମ୍ବରରେ ଦୁବାଇ ଇଣ୍ଟରନ୍ୟାସନାଲ ଷ୍ଟେଡିୟମ୍ରୁ ଏଶିୟା କପ ୨୦୨୫ର ଟ୍ରଫି ନିଜ ସହ ନେଇଯିବା ପାଇଁ ନକବି କଥିତ ଭାବେ କ୍ଷମା ମାଗିଛନ୍ତି, କିନ୍ତୁ ଟ୍ରଫି ଫେରାଇବା ପାଇଁ ସେ ଏପର୍ଯ୍ୟନ୍ତ ପ୍ରସ୍ତୁତ ନାହାନ୍ତି। ଭାରତୀୟ ଅଧିନାୟକ ସୂର୍ଯ୍ୟକୁମାର ଯାଦବ କହିଥିଲେ ଯେ ନକବି ପିସିବିର ଚେୟାରମାନ ହେବା ସହ ପାକିସ୍ତାନର ଏକ ପ୍ରମୁଖ ରାଜନୈତିକ ନେତା ମଧ୍ୟ ଅଛନ୍ତି, ତେଣୁ ସେ ସେମାନଙ୍କ ହାତରୁ ଟ୍ରଫି ନେଇପାରିବେ ନାହିଁ। ଯଦିଓ ପରେ ନକବି କହିଥିଲେ ଯେ ସୂର୍ଯ୍ୟକୁମାର ଯାଦବ ଦୁବାଇ ଆସି ଟ୍ରଫି ନେଇପାରନ୍ତି।
କିଏ ମୋହସିନ ନକବି?
ମୋହସିନଙ୍କର ପୂର୍ଣ୍ଣ ନାମ ସୟଦ ମୋହସିନ ରଜା ନକବି। ନକବିଙ୍କ ଜନ୍ମ ୧୯୭୮ ଅକ୍ଟୋବର ୨୮ ତାରିଖରେ ଲାହୋରରେ ହୋଇଥିଲା। ପାକିସ୍ତାନରେ ପ୍ରାଥମିକ ଶିକ୍ଷା ପରେ ସେ ଆମେରିକାରେ ଉଚ୍ଚ ଶିକ୍ଷା ଗ୍ରହଣ କରିଥିଲେ। ନକବି ସ୍ନାତକ ଶିକ୍ଷା କରି ପାକିସ୍ତାନ ଫେରିବା ପରେ ସେ ମିଡିଆ ଉଦ୍ୟୋଗରେ ପାଦ ରଖିଥିଲେ ଏବଂ ଅଳ୍ପ ସମୟରେ ଖ୍ୟାତି ପାଇଥିଲେ। ସେ ସିଟି ମିଡିଆ ଗ୍ରୁପର ସ୍ଥାପନା କରିଥିଲେ। ନିଜର ମିଡିଆ ନେଟୱର୍କ ବ୍ୟବହାର କରି ନକବି ଏକ ସଫଳ ଉଦ୍ୟୋଗୀ ହୋଇଥିଲେ ଏବଂ ଦେଶର ସାମାଜିକ-ରାଜନୈତିକ କ୍ଷେତ୍ରରେ ନିଜର ପ୍ରଭାବ ବଢ଼ାଇଛନ୍ତି। ପାକିସ୍ତାନ ସରକାରରେ ତାଙ୍କ ପାଖରେ ଗୃହ ମନ୍ତ୍ରାଳୟ ଭଳି ଗୁରୁତ୍ୱପୂର୍ଣ୍ଣ ବିଭାଗ ଅଛି। ୨୦୨୪ ଫେବୃଆରୀରେ ନକବିଙ୍କୁ ପାକିସ୍ତାନ କ୍ରିକେଟ ବୋର୍ଡ (ପିସିବି)ର ଅଧ୍ୟକ୍ଷ ଚୟନ କରାଯାଇଥିଲା। ଏହି ଚୟନ ଏମିତି ସମୟରେ ହୋଇଥିଲା ଯେତେବଳେ ପିସିବି ଶାସନ, ଆନ୍ତର୍ଜାତୀୟ ସମ୍ପର୍କ ଏବଂ ଆର୍ଥିକ ସ୍ଥିରତା ଭଳି ଚ୍ୟାଲେଞ୍ଜର ସାମ୍ନା କରୁଥିଲା।
ନକବି, ଯିଏ ନିଜର ସଂଗଠନାତ୍ମକ କୌଶଳ ପାଇଁ ଜଣାଶୁଣା, ପିସିବିର ସଞ୍ଚାଳନକୁ ପ୍ରୋଫେସନାଲ କରିବାକୁ ଉଦ୍ୟମ ଆରମ୍ଭ କରିଛନ୍ତି। ସେ ଖେଳାଳିମାନଙ୍କର କଲ୍ୟାଣ, କ୍ରିକେଟ ଢାଞ୍ଚାର ଆଧୁନିକୀକରଣ ଏବଂ ପାକିସ୍ତାନ ଆଇସିସି ଏବଂ ଏସିସିରେ ସ୍ଥାନକୁ ମଜବୁତ କରିବା ଉପରେ ଧ୍ୟାନ କେନ୍ଦ୍ରୀଭୂତ କରିଛନ୍ତି। ନକବିଙ୍କର କାର୍ଯ୍ୟକାଳ ବିବାଦ ମୁକ୍ତ ନାହିଁ। ୨୦୨୫ରେ ସେ ଏସିୟାନ କ୍ରିକେଟ କାଉନ୍ସିଲ (ଏସିସି)ର ଅଧ୍ୟକ୍ଷ ମଧ୍ୟ ହୋଇଛନ୍ତି, ଯାହା ଦ୍ୱାରା ଅଞ୍ଚଳୀୟ କ୍ରିକେଟ ପରିଚାଳନାରେ ସେମାନଙ୍କର ପ୍ରଭାବ ଆହୁରି ବଢ଼ିଛି।
