ନୂଆଦିଲ୍ଲୀ,୧୦।୧୦: ଆଇପିଏଲ ୨୦୨୧ ଶେଷ ପର୍ଯ୍ୟାୟରେ ପହଞ୍ଚିଛି। ଚଳିତ ବର୍ଷ ପ୍ଲେ ଅଫ ଖେଳୁଥିବା ଚାରିଟି ଦଳ ଟାଇଟଲ ଉଠାଇବାକୁ ପ୍ରସ୍ତୁତ ଅଛନ୍ତି। ପ୍ରତ୍ୟେକ ଦଳର ନିଜର ଶ୍ରେଷ୍ଠ ଅଧିନାୟକ ଅଛନ୍ତି। ସିଏସକେର ମହେନ୍ଦ୍ର ସିଂ ଧୋନୀ, ଆରସିବିର ବିରାଟ କୋହଲି, କେକେଆରର ଇଏନ ମୋର୍ଗାନ କିମ୍ବା ଦିଲ୍ଲୀ କ୍ୟାପିଟାଲ୍ସର ରିଷଭ ପନ୍ତ। ଏହି ସମଗ୍ର ଟୁର୍ନାମେଣ୍ଟରେ ଭଲ ଅଧିନାୟକତ୍ୱ କରି ସମସ୍ତେ ନିଜ ନିଜ ଦଳକୁ ଶୀର୍ଷକୁ ନେଇଛନ୍ତି। କିନ୍ତୁ ଏହି ଅଧିନାୟକଙ୍କ ମଧ୍ୟରେ କିଏ ଶ୍ରେଷ୍ଠ, ଟିମ ଇଣ୍ଡିଆର ପୂର୍ବତନ ବ୍ୟାଟ୍ସମ୍ୟାନ ଗୌତମ ଗମ୍ଭୀର ଏହାର ଉତ୍ତର ଦେଇଛନ୍ତି।
ଆଇପିଏଲ ପ୍ଲେ ଅଫରେ ପହଞ୍ଚିଥିବା ୪ ଜଣ ଅଧିନାୟକଙ୍କ ବିଷୟରେ ଗୌତମ ଗମ୍ଭୀର ନିଜର ମତ ଦେଇଛନ୍ତି ଏବଂ ସେ ମଧ୍ୟ କହିଛନ୍ତି ଯେ, ଏକ ନମ୍ବର ଅଧିନାୟକ କିଏ। କେକେଆର୍ ଅଧିନାୟକ ଇଏନ ମୋର୍ଗାନଙ୍କ ବିଷୟରେ କଥାବାର୍ତ୍ତା କରି ଗମ୍ଭୀର କହିଛନ୍ତି ଯେ ମୋର୍ଗାନ ପଡ଼ିଆରେ ଅଧିନାୟକତ୍ୱ କରନ୍ତି ନାହିଁ, ସେ କୋଡ ଶବ୍ଦ ଉପରେ ଅଧିକ ନିର୍ଭର କରନ୍ତି। ମୋର୍ଗାନଙ୍କ ଅଧିନାୟକତ୍ୱରେ ଇଂଲଣ୍ଡ ପ୍ରଥମ ଥର ପାଇଁ ବିଶ୍ୱକପ ଜିତିଥିଲା, କିନ୍ତୁ ଗମ୍ଭୀର ତଥାପି ତାଙ୍କୁ ଏକ ନମ୍ବରରେ ବିବେଚନା କରନ୍ତି ନାହିଁ।
ଗମ୍ଭୀରଙ୍କୁ ଆରସିବି ଅଧିନାୟକ ବିରାଟ କୋହଲିଙ୍କ ଅଧିନାୟକତ୍ୱ ବହୁତ ପସନ୍ଦ କରିଛନ୍ତି। ଗମ୍ଭୀର କହିଛନ୍ତି ଯେ, ଅଧିନାୟକ ଭାବରେ ଏହା କୋହଲିଙ୍କ ଶେଷ ସିଜନ, ତେଣୁ ସେ ଆହୁରି ଚମତ୍କାର ଅଧିନାୟକତ୍ୱ କରୁଛନ୍ତି। କୋହଲିଙ୍କ ନିଷ୍ପତ୍ତି ନେବା କ୍ଷମତାକୁ ମଧ୍ୟ ପ୍ରଶଂସା କରିଛନ୍ତି। ଏହା ବ୍ୟତୀତ ଦିଲ୍ଲୀ କ୍ୟାପିଟାଲ୍ସ ଅଧିନାୟକ ରିଷଭ ପନ୍ତଙ୍କ ବିଷୟରେ ୍ଗମ୍ଭୀର କହିଛନ୍ତି ଯେ, ଦିଲ୍ଲୀର ଦଳରେ ଅନେକ ଅଭିଜ୍ଞ ଖେଳାଳି ଅଛନ୍ତି। ଏହିକାରଣରୁ ପନ୍ତ ଉପକୃତ ହୋଇଛନ୍ତି। ଏଥିରେ ଗମ୍ଭୀର ଷ୍ଟିଭ ସ୍ମିଥ ଏବଂ ଆର ଅଶ୍ୱିନଙ୍କ ସମର୍ଥନ ବିଷୟରେ କହିଛନ୍ତି।
ଏଥିସହିତ ଗମ୍ଭୀର ସିଏସକେ ଅଧିନାୟକ ଧୋନୀଙ୍କୁ ଏକ ନମ୍ବର ଅଧିନାୟକ ବୋଲି ବର୍ଣ୍ଣନା କରିଛନ୍ତି। ଧୋନୀଙ୍କ ବିଷୟରେ ଆଲୋଚନା କରି ଗମ୍ଭୀର କହିଛନ୍ତି ଯେ, ଏହି ସମୟରେ ଚାପକୁ ନିୟନ୍ତ୍ରଣ କରିବା ଏବଂ ଜିନିଷକୁ ସଠିକ ଭାବରେ ନିୟନ୍ତ୍ରଣ କରିବାରେ ଧୋନୀଙ୍କଠାରୁ ଭଲ କେହି ନାହାଁନ୍ତି। ଧୋନୀ ଏବେ ୧ ନମ୍ବର ଅଧିନାୟକ ଅଟନ୍ତି। ଆଶ୍ଚର୍ଯ୍ୟର କଥା ହେଉଛି, ଅବସର ନେବା ପରଠାରୁ ଗମ୍ଭୀର ଧୋନୀଙ୍କ ବିଷୟରେ ଅନେକ ବିବାଦୀୟ ବିବୃତ୍ତି ଦେଇଛନ୍ତି ଏବଂ ଗମ୍ଭୀର ତାଙ୍କ ଅଧିନାୟକତ୍ୱ ବିଷୟରେ ଅନେକ ଥର କହୁଛନ୍ତି। କିନ୍ତୁ ସେ ତଥାପି ଧୋନୀଙ୍କୁ ଏକ ନମ୍ବର ଅଧିନାୟକ ଭାବରେ ବିବେଚନା କରିଛନ୍ତି।
