ମୁମ୍ବାଇ: ଯେବେ ବି-ଟାଉନ୍ର ଅବିବାହିତ ଯୋଡ଼ିଙ୍କ ବିଷୟରେ ଚର୍ଚ୍ଚା ହୁଏ, ସେତେବେଳେ ଅଭିନେତା ରଣବୀର କପୁର ଏବଂ କ୍ୟୁଟ୍ ଅଭିନେତ୍ରୀ ଆଲିଆ ଭଟ୍ଟଙ୍କ କଥା ପ୍ରଥମେ ଆସିଥାଏ। ଗତ ବର୍ଷ ଏକ ସାକ୍ଷାତକାରରେ ରଣବୀର ଆଲିଆଙ୍କ ସହ ତାଙ୍କ ସମ୍ପର୍କକୁ ସ୍ବୀକାର କରିଥିଲେ। ସେବେଠାରୁ ପରସ୍ପର ଅନେକ ଥର ନଜର ଆସୁଛନ୍ତି। ଏପରିକି ଉଭୟଙ୍କ ବିବାହ କଥାକୁ ନେଇ ମଧ୍ୟ ଜୋରଦାର ଚର୍ଚ୍ଚା ହେଉଛି।
ନିକଟରେ ଫିଲ୍ମ ଆରଆରଆରର ଟ୍ରେଲର ରିଲିଜ ଅବସରରେ ଆଲିଆ ମଧ୍ୟ ତାଙ୍କ ଜୀବନରେ ‘ଆର୍’ ଅକ୍ଷରକୁ ଅତ୍ୟନ୍ତ ସ୍ବତନ୍ତ୍ର ବିବେଚନା କରିଥିଲେ। ରଣବୀରଙ୍କ ନାମ ଇଂରାଜୀରେ ‘ଆର’ ଅକ୍ଷରରୁ ଆରମ୍ଭ। ରଣବୀର ଏବଂ ଆଲିଆ ଫିଲ୍ମ ‘ବ୍ରହ୍ମାସ୍ତ୍ର’ରେ ପ୍ରଥମ ଥର ପାଇଁ ପରସ୍ପର ସହ କାମ କରୁଛନ୍ତି। ନିକଟରେ ଏହି ଫିଲ୍ମ ମୋଶନ ପୋଷ୍ଟର ରିଲିଜ ହୋଇଥିଲା। ଏହି ସମୟରେ ଯତେବେଳେ ପ୍ରଶଂସକମାନେ ରଣବୀରଙ୍କୁ ଆଲିଆଙ୍କ ସହ ତାଙ୍କ ବିବାହ ବିଷୟରେ ପଚାରିଥିଲେ, ରଣବୀର ହସି ହସି କହିଥିଲେ, ‘ବର୍ଷକ ମଧ୍ୟରେ ଆମେ ଅନେକ ଲୋକଙ୍କୁ ବିବାହ କରିଥିବାର ଦେଖି ନାହୁଁ କି? ମୁଁ ଭାବୁଛି ସେଥିରେ ଆମେ ଖୁସି ହେବା ଉଚିତ୍।
ଏହା ପରେ ରଣବୀର ପୁନର୍ବାର ଆଲିଆଙ୍କୁ ପଚାରିଥିଲେ, ଆମେ କେବେ ବାହା ହେବୁ? ‘ଏହା ଉପରେ ତୁମେ କ’ଣ କହିବାକୁ ଚାହୁଁଛ? ରଣବୀରଙ୍କ ଏପରି ପ୍ରଶ୍ନ ଶୁଣି ସମସ୍ତଙ୍କ ସାମ୍ନାରେ ଲାଜେଇ ଯାଇଥିଲେ ଆଲିଆ। ଏହି କଥା ବେଶ୍ ହାସ୍ୟରୋଳ ସୃଷ୍ଟି କରିଥିଲା।
ରଣବୀର-ଆଲିଆ ଚଳିତ ବର୍ଷ ବିବାହ କରିବେ ବୋଲି ଶୁଣିବାକୁ ମିଳୁଥିଲା। କିନ୍ତୁ ବ୍ୟସ୍ତବହୁଳ କାର୍ଯ୍ୟ ହେତୁ ଉଭୟ ବିବାହକୁ ଆସନ୍ତା ବର୍ଷକୁ ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି। କୁହାଯାଉଛି, ୨୦୨୨ ଏପ୍ରିଲରେ ଦୁହେଁ ବିବାହ ବନ୍ଧନରେ ବାନ୍ଧି ହେବେ।
