ଭାରତୀୟ ଅଧିନାୟକ ବିରାଟ କୋହଲି ଏବେ ଆଇସିସି ବିଶ୍ୱ ଟେଷ୍ଟ ଚାମ୍ପିଅନସିପ (ଡବ୍ଲ୍ୟୁସି) ଫାଇନାଲ ମ୍ୟାଚ ପାଇଁ ପ୍ରସ୍ତୁତିରେ ବ୍ୟସ୍ତ ଅଛନ୍ତି। ୧୮ ରୁ ୨୨ ଜୁନ ମଧ୍ୟରେ ଇଂଲଣ୍ଡରେ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ଏହି ଐତିହାସିକ ଟାଇଟଲ ମ୍ୟାଚ ଖେଳାଯିବ। କୋହଲି ଏବେ ମୁମ୍ବାଇରେ କ୍ୱାରାଣ୍ଟାଇନରେ ଅଛନ୍ତି। ବ୍ୟସ୍ତ କାର୍ଯ୍ୟସୂଚୀରୁ ଅଳ୍ପ ସମୟ ନେଇ ସେ ଇନଷ୍ଟାଗ୍ରାମରେ ଏକ ପ୍ରଶ୍ନ ଏବଂ ଉତ୍ତର କାର୍ଯ୍ୟକ୍ରମ କରିଥିଲେ। ପ୍ରଶଂସକଙ୍କ ସହ କାର୍ଯ୍ୟକ୍ରମ ଆରମ୍ଭ କରିବାକୁ ଯାଇ କୋହଲି ତାଙ୍କ ପୋଷ୍ଟର କ୍ୟାପସନରେ ଲେଖିଛନ୍ତି ଯେ, କ୍ୱାରାଣ୍ଟାଇନ୍ରେ, ମୋତେ ତୁମର ପ୍ରଶ୍ନ ପଚାର।
ଏହି ସମୟ ମଧ୍ୟରେ ସେ ତାଙ୍କ ଝିଅ ଭାମିକାଙ୍କଠାରୁ ଆରମ୍ଭ କରି ଏମଏସ ଧୋନୀଙ୍କ ପର୍ଯ୍ୟନ୍ତ ଉତ୍ତର ଦେଇଥିଲେ। ଏହି ଅଧିବେଶନ ସମୟରେ ଜଣେ ପ୍ରଶଂସକ ତାଙ୍କୁ ଏକ ମଜାଦାର ପ୍ରଶ୍ନ ପଚାରିଥିଲେ। ପ୍ରଶଂସକ କୋହଲିଙ୍କୁ ପଚାରିଥିଲେ ଆପଶ ଶେଷଥର ଗୁଗୁଲ୍ରେ କ’ଣ ସର୍ଚ୍ଚ କରିଥିଲେ। କୋହଲି ପ୍ରକାଶ କରିଛନ୍ତି ଯେ, ସେ କିମ୍ବଦନ୍ତୀ ଫୁଟବଲର୍ ଖ୍ରିଷ୍ଟିଆନୋ ରୋନାଲଡୋଙ୍କ ଟ୍ରାନ୍ସଫର୍ ବିଷୟରେ ଗୁଗୁଲରେ ଶେଷ ଥର ପାଇଁ ସର୍ଚ୍ଚ କରିଥିଲେ। ଫୁଟବଲ ଇତିହାସରେ ରୋନାଲଡୋ ଏକମାତ୍ର ଖେଳାଳି ଯିଏକି ତିନୋଟି ପ୍ରମୁଖ ଲିଗ ପ୍ରିମିୟର ଲିଗ, ଲା ଲିଗା, ସେରି ଏରେ ସର୍ବାଧିକ ଗୋଲ ସ୍କୋରର। ପର୍ତ୍ତୁଗାଲ ଜାତୀୟ ଦଳର ମହାନ ଷ୍ଟ୍ରାଇକର ରୋନାଲଡୋ ସିରି ଏର ୨୦୨୦, ୨୦୨୧ ସିଜନରେ ୨୯ ଗୋଲ ସ୍କୋର କରିଥିଲେ। ତେବେ ରୋଭାଲ୍ଡୋଙ୍କ ଦଳ ଜୁଭେଣ୍ଟସ ସିରି ଏରେ ଚତୁର୍ଥ ସ୍ଥାନ ହାସଲ କରି ଚାମ୍ପିଅନ୍ସ ଲିଗର ପରବର୍ତ୍ତୀ ସିଜନରେ ନିଜ ସ୍ଥାନ ସୁରକ୍ଷିତ କରିଛି। ମଞ୍ଚେଷ୍ଟର ୟୁନାଇଟେଡ ଏବଂ ରିଅଲ ମାଦ୍ରିଦ ସହିତ ରୋନାଲଡୋ ପାଞ୍ଚଟି ଚାମ୍ପିଅନ୍ସ ଲିଗ ଟାଇଟଲ ଜିତିଥିଲେ।
