ଭାରତୀୟ ଅଧିନାୟକ ବିରାଟ କୋହଲି ନିକଟରେ କନ୍ୟା ସନ୍ତାନର ପିତା ହେବାର ସୌଭାଗ୍ୟ ଲାଭ କରିଛନ୍ତି। ଅଷ୍ଟ୍ରେଲିଆରେ ବିଜୟ ତାଙ୍କ ଦଳ ପାଇଁ ସବୁଠାରୁ ସ୍ବତନ୍ତ୍ର ସିରିଜ ଥିଲା ବୋଲି କୋହଲି ଇଲଂଣ୍ଡ ବିପକ୍ଷ ଟେଷ୍ଟ ସିରିଜ୍ ପୂର୍ବରୁ ସୂଚନା ଦେଇଛନ୍ତି। ଏକ ଭର୍ଚୁଆଲ ଖବରଦାତା ସମ୍ମିଳନୀରେ କୋହଲି କହିଛନ୍ତି, ତାଙ୍କ ସନ୍ତାନର ଜନ୍ମ ଜୀବନର ସବୁଠାରୁ ବଡ ମୁହୂର୍ତ୍ତ ଥିଲା। ଭାରତର ସବୁଠୁ ବଡ ସିରିଜ ବିଜୟର ଅଂଶ ନ ହେବା ପରେ ତାଙ୍କୁ କି ପ୍ରକାର ଅନୁଭବ ହୋଇଥିଲା ବୋଲି କୋହଲିଙ୍କୁ ପଚରାଯାଇଥିଲା। ଏହାର ଜବାବରେ କୋହଲି କହିଛନ୍ତି, ପ୍ରଥମ କଥା ମୁଁ ଭାବୁନାହିଁ ଯେ ଏ ଦୁଇଟି ଜିନିଷକୁ ତୁଳନା କରାଯାଇପାରିବ। ବାପା ହେବା ସର୍ବଦା ମୋ ଜୀବନର ସବୁଠାରୁ ବଡ ମୁହୂର୍ତ୍ତ ହୋଇ ରହିବ। କୋହଲି କହିଛନ୍ତି, ଅନ୍ତିମ ଟେଷ୍ଟରେ ଯେତେବେଳେ ଶାର୍ଦ୍ଦୁଲ ଠାକୁର ଏବଂ ୱାଶିଂଟନ ସୁନ୍ଦରଙ୍କ ମଧ୍ୟରେ ଭାଗିଦାରୀ ଚାଲିଥିବାବେଳେ ଡାକ୍ତର ମୋତେ ଫୋନ୍ କରିଥିଲେ। ଏହା ପୂର୍ବରୁ ମୁଁ ଫୋନରେ ମ୍ୟାଚ୍ ଦେଖୁଥିଲି। ପରେ ଆମକୁ ଡାକ୍ତରଖାନା ଯିବାକୁ ପଡିଲା। କିଛି ସମୟ ପରେ ଝିଅ ଜନ୍ମ ନେଇଥିଲା ବୋଲି କୋହଲି କହିଛନ୍ତି। ସୂଚନାଯୋଗ୍ୟ,ଆଡିଲେଡରେ ଚାଲିଥିବା ପ୍ରଥମ ଟେଷ୍ଟରେ ପରାଜୟ ପରେ କୋହଲି ନିଜ ସନ୍ତାନର ଜନ୍ମ ପାଇଁ ଘରକୁ ଫେରିଥିଲେ।
