ଖରାପ ଜୀବନଶୈଳୀ, ଖାଦ୍ୟପେୟରେ ଅନିୟମିତତା ଏବଂ ଚାପଗ୍ରସ୍ତ ରହିବାରୁ ସୃଷ୍ଟ ଅନେକ ରୋଗ ମଧ୍ୟରୁ ହାଇ ବ୍ଲଡ ପ୍ରେସର(ଉଚ୍ଚ ରକ୍ତଚାପ) ଗୋଟିଏ। ଏହାକୁ ସାଇଲେଣ୍ଟ କିଲର୍ ବୋଲି ମଧ୍ୟ କୁହାଯାଏ। କାରଣ ଏହି ରୋଗର ଲକ୍ଷଣ ଶୀଘ୍ର ଜଣା ପଡ଼ି ନ ଥାଏ। ପ୍ରଥମେ ଏହା ବୃଦ୍ଧମାନଙ୍କୁ ହେଉଥିବା ବେଳେ ଆଜି ଯୁବବସ୍ଥାରେ ମଧ୍ୟ ଲୋକ ଏହି ରୋଗର ଶିକାର ହେଉଛନ୍ତି।
ଯେତେବେଳେ ଧମନୀରେ ରକ୍ତର ଚାପ ବଢ଼ିଥାଏ, ସେତେବେଳେ ଏହାକୁ ନିୟନ୍ତ୍ରଣକୁ ଆଣିବା ଲାଗି ହୃଦୟକୁ ଅଧିକ ପରିଶ୍ରମ କରିବାକୁ ପଡ଼ିଥାଏ। ଏହି କାରଣରୁ ଉଚ୍ଚ ରକ୍ତଚାପର ସମସ୍ୟା ଦେଖାଦେଇଥାଏ।
ଦୀର୍ଘଦିନ ଧରି ଏପରି ରହିଲେ ହୃଦ୍ରୋଗ ସାଙ୍ଗକୁ ଅନ୍ୟାନ୍ୟ କ୍ଷତିକାରକ ରୋଗର ବିପଦ ବଢ଼ିଥାଏ। କାରଣ ଏଥିଯୋଗୁ ହାର୍ଟ ଫେଲିୟର, ମଲ୍ଟିପୁଲ୍ ଅର୍ଗାନ ଫେଲିୟର ଏବଂ ବ୍ରେନ୍ ଷ୍ଟ୍ରୋକ୍ ଭଳି ମାରାତ୍ମକ ସ୍ଥିତି ଉତ୍ପନ୍ନ ହୋଇପାରେ। ଏଣୁ ଉଚ୍ଚ ରକ୍ତଚାପ କ’ଣ ତାହା ଜାଣିବା ଜରୁରୀ।
କାରଣ:
ଉକ୍ତ ରକ୍ତଚାପର ସମସ୍ୟା ହେବାର ଅନେକ କାରଣ ରହିଛି। କୀଡନୀ ରୋଗ, ଅତ୍ୟଧିକ ମଦ୍ୟପାନ, ନିଦରେ ସମସ୍ୟା, ଥାଇରଏଡ, ଆଡ୍ରେନାଲ ଗ୍ଲାଣ୍ଡ ଆଦିରେ ସମସ୍ୟା ଯୋଗୁ ଏହି ରୋଗ ହୋଇପାରେ। ଏହାଛଡ଼ା ଏହା ବଂଶଜ ମଧ୍ୟ। ବୟସ ବଢ଼ିବା ସାଙ୍ଗକୁ ମୋଟାପଣ, ଶର୍କରା ଏବଂ ଅବ୍ୟବସ୍ଥିତ ଜୀବନଶୈଳୀ କାରଣରୁ ଉଚ୍ଚ ରକ୍ତଚାପ ହୋଇପାରେ।
ଲକ୍ଷଣ:
ଉକ୍ତ ରକ୍ତଚାପ ଏଭଳି ଏକ ରୋଗ ଯାହାର ପ୍ରାରମ୍ଭିକ ଲକ୍ଷଣ ଦେଖାଯାଏନାହିଁ। ହେଲେ ପରେ ଏହା ହୃଦୟ, ମସ୍ତିଷ୍କ, ଆଖି ଏବଂ କିଡ୍ନୀ ଭଳି ଅଙ୍ଗ ଉପରେ ପ୍ରଭାବ ପକାଇଥାଏ। ଏହି କାରଣରୁ ନିଶ୍ୱାସ ନେବାରେ ଅସୁବିଧା ହେବା, ପରିସ୍ରାରେ ରକ୍ତ ପଡ଼ିବା, ମୁଣ୍ଡ ବୁଲାଇବା, ଛାତିରେ ଯନ୍ତ୍ରଣା, ଆଖିକୁ ଜାଲଜାଲ ଦିଶିବା, ମୁଣ୍ଡବିନ୍ଧା, ନାକରୁ ରକ୍ତ ପଡ଼ିବା ଭଳି ସମସ୍ୟା ଦେଖାଦେଇଥାଏ। ଏହାଛଡ଼ା ଏହି ରୋଗୀଙ୍କ ନିକଟରେ ହାଡର ରୋଗ ଅଷ୍ଟିଓପୋରୋସିସ୍ର ଲକ୍ଷଣ ମଧ୍ୟ ଦେଖା ଦେଇପାରେ।
କ’ଣ କରି ନିଜକୁ ରକ୍ଷା କରିପାରିବେ:
ଯେଉଁ ଲୋକ ଏଭଳି ସ୍ବାସ୍ଥ୍ୟ ସମସ୍ୟାରେ ପୀଡ଼ିତ, ସେମାନେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଉଚିତ। ଏଥିପାଇଁ ସେମାନେ ଔଷଧ ସେବନର ପରାମର୍ଶ ଦେଇପାରନ୍ତି। ଏହାସହ ନିଜର ଜୀବନଶୈଳୀ ଏବଂ ଖାଦ୍ୟପେୟରେ ପରିବର୍ତ୍ତନ କରି ଏହାକୁ ନିୟନ୍ତ୍ରଣରେ ଆଣିହେବ ବୋଲି ପରାମର୍ଶ ଦେଇପାରନ୍ତି।
