ଟୋକିଓ,୨୪।୭: ଟୋକିଓ ଅଲିମ୍ପିକ୍ସର ଦ୍ୱିତୀୟ ଦିନରେ ଷ୍ଟାର ଭାରୋତ୍ତୋଳକ ମିରାବାଇ ଚାନୁ ପଦକ ଜିତିବାରେ ସଫଳ ହୋଇଛନ୍ତି। ସେ ଶନିବାର ଚମତ୍କାର ପ୍ରଦର୍ଶନ କରି ରୌପ୍ୟ ପଦକ ଜିତି ଭାରତକୁ ପ୍ରଥମ ପଦକ ଦେଇଛନ୍ତି। ୪୯ କିଗ୍ରା ବର୍ଗରେ ସେ ଦ୍ୱିତୀୟ ସ୍ଥାନ ହାସଲ କରିଛନ୍ତି। ତେବେ ମିରାବାଇ ମୋଟ ୨୦୨ କିଗ୍ରା ଓଜନ ଉଠାଇଥିଲେ।
ଏହି ଇଭେଣ୍ଟରେ ଚାଇନାର ଜିହୋଇ ହୋ ମୋଟ ୨୧୦ କିଗ୍ରା ଭାର ଉଠାଇ ସ୍ବର୍ଣ୍ଣ ପଦକ ଜିତିଥିଲେ। ସେହିଭଳି ମିରାବାଇ ରୌପ୍ୟ ପଦକ ଜିତି ଇତିହାସ ସୃଷ୍ଟି କରିଥିଳେ। ଭାରୋତ୍ତୋଳନରେ ରୌପ୍ୟ ପଦକ ଜିତିଥିବା ସେ ପ୍ରଥମ ଭାରୋତ୍ତୋଳକ ହୋଇଛନ୍ତି। ୨୦୦୦ ମସିହା ସିଡନୀ ଅଲିମ୍ପିକ୍ସରେ କର୍ଣ୍ଣମ ଆଲଲେଶ୍ୱରୀ ବ୍ରୋଞ୍ଚ ପଦକ ଜିତିଥିଲେ।
ମିରାବାଇ ରୌପ୍ୟ ପଦକ ଜିତିବାପରେ ତାଙ୍କୁ ଚାରିଆଡୁ ଶୁଭେଚ୍ଛାର ସୁଅ ଛୁଟୁଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କୁ ବିଜୟ ପାଇଁ ଅଭିନନ୍ଦନ ଜଣାଇଛନ୍ତି। ଟୁଇଟରରେ ମିରାବାଇଙ୍କ ସହ ଏକ ପୁରୁଣା ଫଟୋ ଶେୟାର କରି ସେ ଲେଖିଛନ୍ତି, ଟୋକିଓ ଅଲିମ୍ପିକ୍ସରେ ଏହାଠାରୁ ଭଲ ଆରମ୍ଭ ଆଉ କ’ଣ ବା ହୋଇପାରିଥାନ୍ତି। ଦେଶ ଉତ୍ସାହିତ ଅଛି। ମିରାବାଇଙ୍କ ଦ୍ୱାରା ଭଲ ପ୍ରଦର୍ଶନ। ଭାରୋତ୍ତୋଳନରେ ରୌପ୍ୟ ପଦକ ଜିତିଥିବାରୁ ତାଙ୍କୁ ଅଭିନନ୍ଦନ। ଏହି ସଫଳତା ପ୍ରତ୍ୟେକ ଭାରତଙ୍କୁ ପ୍ରେରଣା ଦେବ ବୋଲି ସେ କହିଛନ୍ତି।
