ମହାରାଷ୍ଟ୍ରରେ ବର୍ତ୍ତମାନ କରୋନା ଆକ୍ରାନ୍ତଙ୍କ ସଂଖ୍ୟା ବଢ଼ିଚାଲିଛି। ପ୍ରତିଦିନ ଏଠାରୁ ନୂଆ ଆକ୍ରାନ୍ତ ଚିହ୍ନଟ ହେଉଛନ୍ତି। ବିଶେଷକରି ମରାଠଓ୍ବାଡା ଏବଂ ପଶ୍ଚିମ ମହାରାଷ୍ଟ୍ରରେ ନୂଆ ପଜିଟିଭ୍ କେସ୍ ଅଧିକ ଆସୁଛି। ଏପରି ସ୍ଥିତିରେ ବିଡ୍ ଜିଲାରେ ଜଣେ ବର ନିଜର ବିବାହ ପାଇଁ ଭିନ୍ନ ଏକ ନିଷ୍ପତ୍ତି ନେଇଛନ୍ତି। କାରଣ କରୋନା ସଂକ୍ରମଣ ଯେପରି ନ ବ୍ୟାପିବ ସେ ଓଟ ଚଢ଼ି କନ୍ୟାଘରକୁ ବରଯାତ୍ରୀ ନେଇ ଯାଇଛନ୍ତି।
କରୋନା ସଂକ୍ରମଣର ଦ୍ୱିତୀୟ ଲହରି ଡର ସମସ୍ତଙ୍କ ମନରେ ରହିଛି। ବିଡ୍ ଜିଲାର ସାଲେଗାଓଁର ମହାଦେବ ସଖାରାମ ଓ୍ବରପେ ରୁହନ୍ତି। ତାଙ୍କ ପୁଅ ଓ୍ବରପେଙ୍କ ବିବାହ ବିଡ୍ ଜିଲାର ଐଶ୍ୱର୍ଯ୍ୟା ରଣଦିବେଙ୍କ ସହ ସମ୍ପନ୍ନ ହୋଇଛି। ୨୨ ବର୍ଷୀୟ ଅକ୍ଷୟ ପେସାରେ ଜଣେ ଖବରଦାତା। ସେ ୨୧ ବର୍ଷୀୟା ଐଶ୍ୱର୍ଯ୍ୟାଙ୍କୁ ବିବାହ କରିଛନ୍ତି। ଐଶ୍ୱର୍ଯ୍ୟା ବିଏଡ୍ କରିଛନ୍ତି। ସେ ଶିକ୍ଷକତାରେ କ୍ୟାରିୟର କରିବାକୁ ଚାହାନ୍ତି।
ସୂଚନାଯୋଗ୍ୟ, ସାଲେଗାଓଁରେ ଗୋଟିଏ ବି କରୋନା ପଜିଟିଭ୍ କେସ ନାହିଁ। ତେଣୁ ଅକ୍ଷୟ ଏବଂ ତାଙ୍କ ପିତା ବିଶେଷ ସତର୍କତା ଅବଲମ୍ବନ ପାଇଁ ଏପରି ନିଷ୍ପତ୍ତି ନେଇଥିଲେ। ଅକ୍ଷୟଙ୍କ ପିତା ମହାରାଷ୍ଟ୍ର ସରକାରଙ୍କ ନିୟମ ଅନୁଯାୟୀ, ୫୦ ଭିତରେ ଅତିଥିଙ୍କୁ ସାଙ୍ଗରେ ନେଇଥିଲେ। ଅକ୍ଷୟ ନିଷ୍ପତ୍ତି ନେଇଥିଲେ ଘୋଡ଼ା ବଦଳରେ ସେ ଓଟ ଚଢ଼ି ବର ହୋଇଯିବେ। କାରଣ ଓଟର ଉଚ୍ଚତା ଅଧିକ। ତେଣୁ କରୋନା ସଂକ୍ରମଣର ଭୟ କମ୍ ରହିବ। ଓଟ ସବାର ପାଇଁ ତାଙ୍କୁ ୧୨୦୦୦ ଟଙ୍କା ଦେବାକୁ ପଡ଼ିଛି। ଐଶ୍ୱର୍ଯ୍ୟାଙ୍କ ଘର ପକ୍ଷରୁ ମଧ୍ୟ ବିଶେଷ ସତର୍କତା ଅବଲମ୍ବନ କରାଯାଇ ଏହି ବିବାହ ସମ୍ପନ୍ନ ହୋଇଛି।
