ନୂଆଦିଲ୍ଲୀ, ୪।୯ : ଦେଶରେ ଦରଦାମ ବୃଦ୍ଧି ପ୍ରସଙ୍ଗରେ ଭାଜପାକୁ ଘେରିବା ଲାଗି କଂଗ୍ରେସ ପକ୍ଷରୁ ରବିବାର ଦିଲ୍ଲୀର ରାମଲୀଳା ମଇଦାନରେ ଏକ ବଡ ରାଲିର ଆୟୋଜନ କରାଯାଇଛି। କଂଗ୍ରେସ ନେତା ରାହୁଲ ଗାନ୍ଧୀ ସମାବେଶକୁ ସମ୍ବୋଧିତ କରି କହିଛନ୍ତି, ଆମକୁ ଦେଶ ପାଇଁ ଛିଡ଼ା ହେବାକୁ ପଡ଼ିବ। ନହେଲେ ଦେଶ ବଞ୍ଚିବ ନାହିଁ। ଭାଜପା ନେତୃତ୍ୱାଧୀନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାର ଦେଶକୁ ଧ୍ୱଂସ କରିବାରେ ଲାଗିଛନ୍ତି। ଦେଶର ସାଧାରଣ ଜନତାଙ୍କ ସ୍ଥିତି ସଙ୍କଟ ଜନକ ହେବାରେ ଲାଗିଛି।
ମୋତେ ଇଡି ୫୫ ଘଣ୍ଟା ଧରି ପଚରାଉଚରା କରିଥିଲେ। କିନ୍ତୁ ଏହା ମୋ ପାଇଁ କିଛି ଗୁରୁତ୍ୱପୂର୍ଣ୍ଣ ନୁହେଁ। ଦେଶ କୁ ବଞ୍ଚାଇବାକୁ ପଡ଼ିବ। କାରଣ ଏହି ଦେଶ ହେଉଛି ଏକ ସମ୍ବିଧାନ। ଦେଶ ହେଉଛି ଲୋକଙ୍କ ସ୍ବର। ଦେଶ ହେଉଛି ଲୋକଙ୍କ ଭବିଷ୍ୟତ। ଏହି ଦେଶ ଦୁଇଟି ଶିଳ୍ପପତିଙ୍କର ନୁହେଁ ।
ଦେଶରେ ବେକାରୀ, ଦରଦାମ ବୃଦ୍ଧି, ମୁଦ୍ରାସ୍ଫୀତି ବଢ଼ି ଚାଲିଛି। ଦେଶର ସମସ୍ତ ସମ୍ପତ୍ତି ଦୁଇ ଶିଳ୍ପପତିଙ୍କ ହାତରେ ରହିଛି। ଏହି ଦୁଇ ଶିଳ୍ପପତି ନରେନ୍ଦ୍ର ମୋଦିଙ୍କ ପାଇଁ ଦିନକୁ ୨୪ ଘଣ୍ଟା କାମ କରନ୍ତି। ଏହି ଦୁଇ ଶିଳ୍ପପତିଙ୍କ ପାଇଁ ମୋଦି ମଧ୍ୟ ଦିନରାତି କାମ କରିଥାନ୍ତି। ମୋଦି ଦେଶର ପ୍ରଧାନମନ୍ତ୍ରୀ। କିନ୍ତୁ ସେହି ଦୁଇ ଶିଳ୍ପପତିଙ୍କ ବିନା ସେ ପ୍ରଧାନମନ୍ତ୍ରୀ ହୋଇପାରିବେ ନାହିଁ।
ରାହୁଲ ଗାନ୍ଧୀ କହିଛନ୍ତି, ମୁଁ ଏହା କହିବାକୁ ପସନ୍ଦ କରେ ନାହିଁ, କିନ୍ତୁ ଏହି ଦେଶ ଏହାର ଯୁବକମାନଙ୍କୁ ରୋଜଗାର ଯୋଗାଇ ପାରି ନାହିଁ । ଦୁଇ ଶିଳ୍ପପତି ଦେଶକୁ ରୋଜଗାର ଯୋଗାଇ ପାରିବେ ନାହିଁ। କ୍ଷୁଦ୍ର ଉଦ୍ୟୋଗଗୁଡିକ ଦେଶକୁ ରୋଜଗାର ଦିଅନ୍ତି। କୃଷକମାନେ ଦେଶର ରୋଜଗାର ପାଇଁ ଗୁରୁତ୍ୱ ପୂର୍ଣ୍ଣ। କିନ୍ତୁ ମୋଦି ସରକାର ସେମାନଙ୍କ ଆର୍ଥିକ ମେରୁଦଣ୍ଡ ଭାଙ୍ଗି ଦେଇଛନ୍ତି।
