ଅହମ୍ମଦାବାଦ,୩।୩ : ଭାରତୀୟ ଦଳର ସଫଳତା ପଛର କାରଣ ବୁଧବାର ସ୍ପଷ୍ଟ କରିଛନ୍ତି ଅଧିନାୟକ ବିରାଟ କୋହଲି। ଆମେ କଦାପି ପିଚ୍କୁ ସମାଲୋଚନା କରୁନାହିଁ। ପିଚ୍ରେ କେତେ ଘାସ ଅଛି କିମ୍ବା ବଲ କେଉଁଭଳି ଗତି କରୁଛି, ତାହା ପ୍ରତି ଆମେ କଦାପି ଧ୍ୟାନ ଦେଉ ନାହୁ। ଏହା ଆମ ସଫଳତା ପଛର କାରଣ। ଏକ ଦଳ ଭାବେ ଆମେ ଏହାକୁ ଜାରି ରଖିବୁ ବୋଲି ଅନ୍ତିମ ତଥା ଚତୁର୍ଥ ଟେଷ୍ଟ ପୂର୍ବରୁ ଆୟୋଜିତ ଭର୍ଚୁଆଲ ଖବରଦାତା ସମ୍ମିଳନୀରେ କୋହଲି କହିଛନ୍ତି। ୪ ମ୍ୟାଚ୍ ବିଶିଷ୍ଟ ସିରିଜ୍ର ତୃତୀୟ ମ୍ୟାଚ୍ ଭଳି ଅନ୍ତିମ ଟେଷ୍ଟ ମଧ୍ୟ ନରେନ୍ଦ୍ର ମୋଦି ଷ୍ଟାଡିୟମରେ ଖେଳାଯିବ।
ଉଲ୍ଲେଖଥାଉ କି, ନରେନ୍ଦ୍ର ମୋଦି ଷ୍ଟାଡିୟମରେ ଅନୁଷ୍ଠିତ ୩ୟ ମ୍ୟାଚ୍କୁ ଭାରତ ୧୦ ଉଇକେଟରେ ଦୁଇ ଦିନ ମଧ୍ୟରେ ଇଂଲଣ୍ଡକୁ ହରାଇ ଦେଇଥିଲା। ମ୍ୟାଚ୍ରେ ଉଭୟ ଭାରତ ଓ ଇଂଲଣ୍ଡ ବ୍ୟାଟ୍ସମ୍ୟାନ ସ୍ପିନ ବୋଲଙ୍କ ଦ୍ୱାରା ଆଉଟ୍ ହୋଇଥିଲେ। ପ୍ରାୟତଃ ସ୍ପିନ କରୁ ନ ଥିବା ବଲ ହିଁ ବ୍ୟାଟ୍ସମ୍ୟାନଙ୍କ ପାଇଁ ସମସ୍ୟା ଛିଡ଼ା କରିଥିଲା। ଏଥି ପାଇଁ ସମାଲୋଚକମାନେ ପିଚ୍କୁ ଦୋଷ ଦେଉଛନ୍ତି।
