ନନ୍ଦପୁର, ୧୧ା୨: ନନ୍ଦପୁର ବ୍ଲକ ପାଡୁଆ ପଞ୍ଚାୟତର ୮ ନମ୍ବର ୱାର୍ଡ ତଥା ଦୁର୍ଗମ ଗତରକଣ୍ଡା ଗ୍ରାମବାସୀ ପାନୀୟ ଜଳକଷ୍ଟ ଭୋଗୁଛନ୍ତି। ଖରାଦିନ ପୂର୍ବରୁ ଅନୁଭୂତ ହେଉଥିବା ଏହି ଜଳକଷ୍ଟ ଖରାଦିନେ ଆହୁରି ଅଧିକ ଅସହ୍ୟ ହେବ ବୋଲି ଗ୍ରାମବାସୀ ଆଶଙ୍କା ପ୍ରକାଶ କରିଛନ୍ତି। ୨୫ ପରିବାରର ୭୫ରୁ ଊର୍ଦ୍ଧ୍ୱ ଲୋକ ବସବାସ କରୁଥିବା ଏହି ଗ୍ରାମରେ ନଳକୂପଟିଏ ନାହିଁ। ଗ୍ରାମକୁ ରାସ୍ତା ନ ଥିବାରୁ କିଛିଦିନ ତଳେ ନଳକୂପ ଖନନ କରିବାକୁ ଆସିଥିବା ଗାଡ଼ି ଅଧାବାଟରୁ ଫେରିଯାଇଥିବା ଗ୍ରାମବାସୀ ପ୍ରକାଶ କରିଛନ୍ତି। କିଛି ଉପାୟ ନ ଥିବାରୁ ସେମାନେ ଜଙ୍ଗଲରେ ଥିବା ଝରପାଣି (ଚୁଆପାଣି) ବ୍ୟବହାର କରୁଛନ୍ତି। ଏହି ପାଣିକୁ ବ୍ୟବହାର କରି ବିଶୋଧନ ପ୍ରଣାଳୀରେ ସ୍ପ୍ରିଙ୍ଗ୍ ବେସ୍ ଜଳ ଯୋଗାଣ ବ୍ୟବସ୍ଥା କରିବାକୁ ଗ୍ରାମବାସୀ ଦାବି କରିଛନ୍ତି। ଏ ସମ୍ପର୍କରେ ପଞ୍ଚାୟତ ପିଇଓ ଗୌରାଙ୍ଗ ଦିଶାରି ଓ ଗ୍ରାମ୍ୟ ଜଳଯୋଗାଣ ଯନ୍ତ୍ରୀ କାହୁଁଚରଣ ସେଠୀଙ୍କ ଦୃଷ୍ଟି ଆକର୍ଷଣ କରିବାରୁ ଉଭୟେ କହିଲେ, ଗତରକଣ୍ଡା ଗ୍ରାମଟି ପାହାଡ଼ ଉପରେ ରହିଛି। ଆସନ୍ତା ଆର୍ଥିକ ବର୍ଷ ମାର୍ଚ୍ଚ ମାସ ବେଳକୁ ପାଣ୍ଠି ବ୍ୟବସ୍ଥା କରି ଗ୍ରାମରେ ଜଳ ଯୋଗାଣ ବ୍ୟବସ୍ଥା କରାଯିବ ବୋଲି କହିଛନ୍ତି।
