ଥୁଆମୂଳ ରାମପୁର,୨ା୯ (ଦୁର୍ଗା କୀର୍ତ୍ତି):କଳାହାଣ୍ଡି ଜିଲା ଥୁଆମୂଳ ରାମପୁର ବ୍ଲକ ବଡ଼ଛତ୍ରଙ୍ଗ ହାଇସ୍କୁଲ ସମ୍ପ୍ରତି ଘୋର ଅବ୍ୟବସ୍ଥା ମଧ୍ୟରେ ଗତିକରୁଛି। ୧୯୬୬ ମସିହାରେ ସ୍ଥାପିତ ଏହି ପୁରାତନ ବିଦ୍ୟାଳୟ ଏବେ ସରକାରୀ ଅବହେଳାର ଶିକାର ହୋଇଛି। ପୂର୍ବ ସରକାରଙ୍କ ସମୟରେ ୫-ଟି ଯୋଜନାରେ ବିଦ୍ୟାଳୟର ରୂପାନ୍ତରଣ କରାଯାଇଥିଲା। ହେଲେ ନିମ୍ନମାନର କାମ ଯୋଗୁ ଏବେ ବର୍ଷା ସମୟରେ ଶ୍ରେଣୀଗୃହ ଛାତରୁ ପାଣି ଝରିବା ସହ ପ୍ଲାଷ୍ଟର ଖସୁଛି। ଏହା ସତ୍ତ୍ୱେ ମଧ୍ୟ ଛତ୍ରୀଛାତ୍ରମାନେ ବିପଦସଙ୍କୁଳ ଅବସ୍ଥାରେ ସେଠାରେ ପଢ଼ୁଛନ୍ତି, ଯାହାକି ସେମାନଙ୍କ ଜୀବନ ପ୍ରତି ବିପଦ ସୃଷ୍ଟି କରୁଛି।
ବିଦ୍ୟାଳୟର ଭାରପ୍ରାପ୍ତ ପ୍ରଧାନ ଶିକ୍ଷକ ସୁବ୍ରତ ପ୍ରଧାନଙ୍କଠାରୁ ମିଳିଥିବା ସୂଚନା ଅନୁସାରେ ବିଦ୍ୟାଳୟରେ ବାଲବାଟିକାରୁ ଦଶମ ଶ୍ରେଣୀ ପର୍ଯ୍ୟନ୍ତ ମୋଟ ୩୯୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ସେଥିମଧ୍ୟରେ ପ୍ରାଥମିକ ଓ ଉଚ୍ଚ ପ୍ରାଥମିକରେ ୨୫୦ରୁ ଊର୍ଦ୍ଧ୍ୱ ଛାତ୍ରୀଛାତ୍ର ଅଛନ୍ତି। ତେବେ ପ୍ରଥମରୁ ଷଷ୍ଠ ଶ୍ରେଣୀ ପର୍ଯ୍ୟନ୍ତ ମାତ୍ର ୨ଟି ଶ୍ରେଣୀଗୃହ ରହିଥିବାରୁ ଗୋଟିଏ କୋଠରିରେ ବାଲ୍ ବାଟିକାରୁ ଚତୁର୍ଥ ଶ୍ରେଣୀ ପର୍ଯ୍ୟନ୍ତ ଏବଂ ଅନ୍ୟ ଏକ କୋଠରିରେ ପଞ୍ଚମ ଓ ଷଷ୍ଠ ଶ୍ରେଣୀ ପିଲାଙ୍କୁ ବସାଇ ଶିକ୍ଷାଦାନ କରାଯାଉଛି। ସପ୍ତମରୁ ଦଶମ ଶ୍ରେଣୀ ପର୍ଯ୍ୟନ୍ତ ପିଲାଙ୍କ ପାଇଁ ଆବଶ୍ୟକ ଶ୍ରେଣୀଗୃହ ରହିଛି। ପ୍ରାଥମିକ ଓ ଉଚ୍ଚ ପ୍ରାଥମିକ ବିଭାଗରେ ୩ ଜଣ ଶିକ୍ଷକ ନିଯୁକ୍ତ ଥିଲେ। ସେଥିରୁ ଜଣଙ୍କୁ ଡେପୁଟେଶନରେ ଅନ୍ୟତ୍ର ପଠାଯାଇଥିବାରୁ ବର୍ତ୍ତମାନ ମାତ୍ର ୨ ଜଣ ଶିକ୍ଷକଙ୍କ ଭରସାରେ ପାଠପଢ଼ା ଚାଲିଛି। ସେହିପରି ସପ୍ତମରୁ ଦଶମ ଶ୍ରେଣୀ ପିଲାଙ୍କ ପାଇଁ ମଧ୍ୟ ସମସ୍ତ ବିଷୟରେ ଶିକ୍ଷକ ନାହାନ୍ତି। ବିଦ୍ୟାଳୟରେ ଉଭୟ ବାଳିକା ଓ ବାଳକଙ୍କ ପାଇଁ ପୃଥକ୍ ଶୌଚାଳୟ ରହିଥିଲେ ସୁଦ୍ଧା ଅଧିକାଂଶ ସମୟରେ ପାଣି ସମସ୍ୟା କାରଣରୁ ପିଲାମାନେ ତାହାକୁ ବ୍ୟବହାର କରିପାରୁ ନାହାନ୍ତି। ପାନୀୟ ଜଳ କ୍ଷେତ୍ରରେ ମଧ୍ୟ ସମସ୍ୟା ରହିଛି। ବିଦ୍ୟାଳୟରେ କୌଣସି ବୋରିଂ ବ୍ୟବସ୍ଥା ନ ଥିବାରୁ କେବଳ ବସୁଧା ଯୋଜନା ପାଣି ଭରସାରେ ଚାଲିଛି। ହେଲେ ଅନେକ ସମୟରେ ପାଣି ଆସୁ ନ ଥିବାରୁ ପିଲାମାନେ ଜଳକଷ୍ଟ ମଧ୍ୟ ଭୋଗୁଛନ୍ତି। ବିଦ୍ୟାଳୟରେ କମ୍ପ୍ୟୁଟର ଉପଲବ୍ଧ ଥିଲେ ସୁଦ୍ଧା ଶିକ୍ଷକ କିମ୍ବା ତାଲିମ ବ୍ୟବସ୍ଥା ଅଭାବରୁ ଛାତ୍ରୀଛାତ୍ର କମ୍ପ୍ୟୁଟର ଶିକ୍ଷାରୁ ବଞ୍ଚତ୍ତ ରହୁଛନ୍ତି। ସବୁଠାରୁ ଗୁରୁତର ସମସ୍ୟା ହେଉଛି ଛାତରୁ ପାଣି ଝରିବା। ଏଥିଯୋଗୁ ଦଶମ ଶ୍ରେଣୀ ଛାତ୍ରୀଛାତ୍ରଙ୍କ ପାଠପଢ଼ାରେ ବ୍ୟାଘାତ ସୃଷ୍ଟି ହେଉଛି। ଏ ସମ୍ପର୍କରେ ଦଶମ ଶ୍ରେଣୀର ଜଣେ ଛାତ୍ରୀ କହିଛନ୍ତି, ବର୍ଷା ହେଲେ ଛାତରୁ ପାଣି ଗଳି ବେଞ୍ଚ ଓ ଖାତାବହି ଭିଜିଯାଉଛି, ଫଳରେ ବସିବା ଓ ଲେଖିବାରେ ଅସୁବିଧା ଭୋଗିବା ସହ ନିଜେ କ୍ଲାସ୍ରୁମ୍ ପୋଛୁଥିବା କହିଛନ୍ତି। ବିଭାଗୀୟ ଅଧିକାରୀ ପରିଦର୍ଶନରେ ଆସି ସମସ୍ୟା ନେଇ ଅବଗତ ହୋଇଥିଲେ ସୁଦ୍ଧା କୌଣସି ସ୍ଥାୟୀ ସମାଧାନ ହୋଇନାହିଁ। ଏ ସମ୍ପର୍କରେ ବିଦ୍ୟାଳୟ ପରିଚାଳନା କମିଟି ସଭାପତି ଭିକାରୀ ମାଝୀଙ୍କୁ ପଚାରିବାରୁ ସରକାର ସ୍କୁଲ ସମସ୍ୟା ପ୍ରତି ଦୃଷ୍ଟି ଦିଅନ୍ତୁ ନଚେତ୍ ଆମେ ପିଲାଙ୍କ ଭବିଷ୍ୟତ ପାଇଁ ରାଜରାସ୍ତାକୁ ଓହ୍ଲାଇବୁ ବୋଲି ଚେତାବନୀ ଦେଇଛନ୍ତି। ଅନ୍ୟପଟେ ପ୍ରଧାନ ଶିକ୍ଷକ କହିଛନ୍ତି, ବିଗତ ୫ବର୍ଷ ମଧ୍ୟରେ କେବଳ ୫-ଟି ଅଧୀନରେ ଯାହା ବିଦ୍ୟାଳୟ ରୂପାନ୍ତରଣ କାମ ହୋଇଥିଲା। ଏହାପରେ ଆଉ କିଛି କାମ ହୋଇ ନାହିଁ କିମ୍ବା ସରକାରଙ୍କ କୌଣସି ପାଣ୍ଠି ଆସି ନାହିଁ ବୋଲି କହିଥିଲେ। ସରକାର ବିଦ୍ୟାଳୟର ଛାତ ମରାମତି, ଅତିରିକ୍ତ ଶ୍ରେଣୀଗୃହ ନିର୍ମାଣ, ସ୍ଥାୟୀ ପାନୀୟ ଜଳ ବ୍ୟବସ୍ଥା, ଆବଶ୍ୟକ ଶିକ୍ଷକ ନିଯୁକ୍ତି ଦିଗରେ ପଦକ୍ଷେପ ନେବାକୁ ଅଭିଭାବକ ମହଲରୁ ଦାବି ହୋଇଛି। ଏନେଇ ଏବିଇଓ ଦାୟିତ୍ୱରେ ଥିବା ନରେନ୍ଦ୍ର କାମପାଲଙ୍କୁ ପଚାରିବାରୁ ପୂର୍ବରୁ ୫-ଟି ଅଧୀନରେ ବିଦ୍ୟାଳୟ ଛାତରୁ ପାଣି ଗଳିବା ସମସ୍ୟାର ସମାଧାନ ପାଇଁ ଟିଣ ଚାଦର ଲଗାଯାଇଥିଲା। ହେଲେ ବର୍ତ୍ତମାନ ବିଭାଗୀୟ ସ୍ତରରେ ଆମେ କିଛି କରିପାରିବୁ ନାହିଁ। ବିଦ୍ୟାଳୟ ପରିଚାଳନା କମିଟି ପ୍ରସ୍ତାବ ପାରିତ କରି ବିଡିଓଙ୍କୁ ଜଣାଇଲେ କିମ୍ବା ସରପଞ୍ଚ ଚାହିଁଲେ କିଛି ସମାଧାନ ହୋଇପାରିବ। ସେହିପରି ସରକାରଙ୍କ ପକ୍ଷରୁ କୌଣସି ନୂଆ ବିଜ୍ଞପ୍ତି କିମ୍ବା ପଦବୀ ବାହାରୁ ନ ଥିବାରୁ ଶିକ୍ଷକ ସମସ୍ୟା ଲାଗିରହିଛି ବୋଲି ସେ କହିଥିଲେ।
Dharitri – Odisha’s No.1 Odia Daily
