କର୍ଲାମୁଣ୍ଡା: ୧୧।୪(ଡି.ଏନ୍.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ ଚୈତ୍ର ମାସ ନ ସରୁଣୁ ପାନୀୟ ଜଳ ସଙ୍କଟ ଦେଖା ଦେଇଛି। ବ୍ଲକରେ ଥିବା ଉତେଇ ନଦୀରେ ପାଣି ଶୁଖି ଯିବାରୁ ପାଇପ୍ ଜଳ ଯୋଗାଣ ଠପ୍ ହୋଇଯାଇଛି। ଫଳରେ ପାଣି ପାଇଁ ଲୋକେ ଡହଳବିକଳ ହେଉଛନ୍ତି।
ଅନ୍ୟପକ୍ଷେ ନଦୀ ଶୁଖି ଯିବାରୁ ସରଗୁଲ ମାଲପଡ଼ା, ଜୋରାଡବରା, ରେଗଡା, ବୋରପଦର, ରିଂଜା, ସାପଲହରା ପଞ୍ଚାୟତବାସୀ ପାଇପ୍ ପାଣି ପାଇବା ମୁସ୍କିଲ ହେଉଥିବା ଅଭିଯୋଗ କରିଛନ୍ତି। ଅନ୍ୟପକ୍ଷେ ବ୍ଲକର ପୌରକେଲା, ତେରେସିଙ୍ଗା, ଗଜବାହଲ, ରିଷିଡା, ରାଜପୁର, କର୍ଲାମୁଣ୍ଡା ପଞ୍ଚାୟତରେ ମଧ୍ୟ ପାନୀୟ ଜଳ ସମସ୍ୟା ଦେଖାଦେଇଛି।
ଜଳ ସମସ୍ୟା ଦୂର କରିବାକୁ ରିଂଜା ପଞ୍ଚାୟତ ପକ୍ଷରୁ ଉତେଇ ନଦୀରେ ଜେସିବି ସାହାର୍ଯ୍ୟରେ ଚହଲା ଖୋଲିଥିଲେ। ହେଲେ ଜଳ ସମସ୍ୟା ଦୂର ହେଉ ନାହିଁ ବୋଲି ରିଂଜା ସରପଞ୍ଚ ପଞ୍ଚାନନ ବାଗ କହିଛନ୍ତି। ଏହି ସମ୍ପର୍କରେ ବିଭାଗୀୟ ଗ୍ରାମ୍ୟ ଜଳ ଓ ପରିମଳ ମିଶନ ଯନ୍ତ୍ରୀ ବିଭୂତି କିଷାନଙ୍କୁ ପଚାରିବାରୁ ବ୍ଲକରେ ୭୭୯ଟି ନଳକୂଅ କାର୍ଯ୍ୟକ୍ଷମ ରହିଛି, ନଦୀରେ ପାଣି ଶୁଖିବାରୁ ପାଇପ୍ପାଣି ଯୋଗେଇବାରେ ସମସ୍ୟା ଦେଖାଦେଇଛି। ଟ୍ୟାଙ୍କର ଯୋଗେ ପିଇବା ପାଣି ଯୋଗେଇବାକୁ ସରପଞ୍ଚମାନଙ୍କୁ କୁହାଯାଇଛି ବୋଲି କହିଛନ୍ତି। ବ୍ଲକର ବଡଡୁଙ୍ଗୁରିଗୁଡା, କର୍ଲାମୁଣ୍ଡା, ରାଜପୁର, ଅଗାଧୁପୁର, କୁସୁରଲା, ରେଗଡା, ସାପଲହରା, ଭଟାପଲା,କଣ୍ଡରେଇ, ସିରାବହାଲ ଆଦି ଅଞ୍ଚଳରେ ପାନୀୟ ଜଳ ଯୋଗାଣ ପ୍ରକଳ୍ପ କାର୍ଯ୍ୟକୁ ଶେଷ କରାଗଲେ ଜଳ ଯୋଗାଣ ସମସ୍ୟା ଦୂର ହୋଇ ପାରିବ ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି।
