କୋରେଇ,୫।୩(ଡି.ଏନ୍.ଏ): ଗ୍ରୀଷ୍ମ ପ୍ରବାହ ବଢ଼ିବା ସହ କୋରେଇ ବ୍ଲକ ଅଧୀନ ଏକାଧିକ ପଞ୍ଚାୟତରେ ଜଳ ସମସ୍ୟା ଚିନ୍ତା ବଢ଼ାଇଛି। ୨୦ ବର୍ଷ ପଛ ତଥା ପୂର୍ବଭଳି ଖୋଲା କୂପ ଉପରେ ଲୋକେ ଭରସା କରିଛନ୍ତି। ଏହି ବ୍ଲକ ଅଧୀନ ବିଭିନ୍ନ ପଞ୍ଚାୟତର ୮ଟି ପାଇପ୍ ଜଳ ଯୋଗାଣ ପ୍ରକଳ୍ପ ବନ୍ଦ ରହିଥିବାବେଳେ ଏହାର ମରାମତି ତଥା ପୁନଃ ଜଳଯୋଗାଣ ପାଇଁ ବ୍ଲକ କର୍ତ୍ତୃପକ୍ଷ କିମ୍ବା ଗ୍ରାମ ଜଳ ଯୋଗାଣ ଏବଂ ପରିମଳ ବିଭାଗ (ଆର୍ଡବ୍ଲ୍ୟୁଏସ୍ଏସ୍) ଚେଇଁ ଶୋଇଛି। ଅନ୍ୟପକ୍ଷରେ ବ୍ଲକର ତଳଗଡ଼ ପଞ୍ଚାୟତର ଉପୁଳେଇ ଗ୍ରାମ ଓ ମକୁନ୍ଦୁପୁର ପଞ୍ଚାୟତ ତଥା ମକୁନ୍ଦୁପୁର ଗ୍ରାମର ଓଭରହେଡ୍ ପାଣିଟାଙ୍କି ବିଦ୍ୟୁତ୍ ବିଲ୍ ପୈଠ ହୋଇ ନ ଥିବା କାରଣରୁ ବିଜୁଳି ବିଚ୍ଛିନ୍ନ ହୋଇ ଜଳଯୋଗାଣ ବନ୍ଦ ରହିଛି। ଜହ୍ନା ଓ ମୂଳାପାଳ ପଞ୍ଚାୟତର ଧନତ୍ରୀ ଗ୍ରାମରେ ଟ୍ରାନ୍ସଫର୍ମର ଫେଲ୍ ଯୋଗୁ ଜଳଯୋଗାଣ ହୋଇପାରୁନାହିଁ। ସେହିପରି ପାଣିକୋଇଲି ପଞ୍ଚାୟତ ଅଳତିରି ଓ ପାଣିକୋଇଲି ଗ୍ରାମରେ ମେଗା ଜଳ ପ୍ରକଳ୍ପ କାମ ଚାଲୁ ରହିଛି । ଯେଉଁଥିରେ ପୁରୁଣା ପାଇପ୍ଗୁଡ଼ିକ ନଷ୍ଟ ହୋଇ ଜଳ ଯୋଗାଣରେ ବ୍ୟାଘାତ ସୃଷ୍ଟି ହୋଇଛି । ଅନ୍ୟପକ୍ଷରେ ଅମୃତିଆ ପଞ୍ଚାୟତ ତଥା ଅମୃତିଆ ଗ୍ରାମ ଓ ପଛିକୋଟ ପଞ୍ଚାୟତ କଡମା ଗ୍ରାମରେ ଗ୍ରାମ୍ୟ ଉନ୍ନୟନ ରାସ୍ତା ସମ୍ପ୍ରସାରଣ ପାଇଁ ଠିକାଦାର ପାଇପ୍ଗୁଡ଼ିକ ତାଡ଼ି ନଷ୍ଟ କରିଥିବାରୁ ଜଳଯୋଗାଣ ବନ୍ଦ ରହିଛି। ଆର୍ଡବ୍ଲ୍ୟୁଏସ୍ଏସ୍ ପକ୍ଷରୁ ପାଇପ୍ଗୁଡ଼ିକ ୩ ଫୁଟ ତଳେ ପୋତିବାକୁ ଅନୁମତି ରହିଛି। ହେଲେ ନିର୍ମାଣ ସମୟରେ ଠିକାଦାର ଓ ଯନ୍ତ୍ରୀଙ୍କ ମଧୁଚନ୍ଦ୍ରିକା ଆଗରେ ସରକାରୀ ନିୟମ ଫିକା ପଡ଼ୁଛି। ଯନ୍ତ୍ରୀଙ୍କୁ ହାତକରି ଠିକାଦାରମାନେ ଏକାଧିକ ପ୍ରକଳ୍ପରେ କେଉଁଠି ୧ ଫୁଟ ତ କେଉଁଠି ମାଟି ଉପରେ ପାଇପ ବିଛାଇ ବିପୁଳ ଟଙ୍କା ଆତ୍ମସାତ୍ କରାଯାଇଛି। ଡମା ଗ୍ରାମରେ ରାସ୍ତା କାମ ଚାଲୁଥିବାବେଳେ ସାଇଡ୍ ଫିଲିଂ ପାଇଁ ଠିକାଦାର ରାସ୍ତା କଡ଼ରୁ ୧ଫୁଟ ଲେଖାଏ ଖନନ କରିଥିଲେ । ଯେଉଁଥିରେ ୪ଟି ଗ୍ରାମକୁ ଜଳ ଯୋଗାଣ ପାଇଁ ରଗଡିି ଛକ ମା’ କାମୁଡଇ ନିକଟରେ ଥିବା ଓଭରହେଡ୍ ପାଣିଟାଙ୍କିରୁ କଡ଼ମାକୁ ବିଛାଯାଇଥିବା ପାଇପ୍ଗୁଡ଼ିକ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯାଇଛି॥ ଫଳରେ କଡ଼ମାର ଆଇଚିପୁର, ମାଦଳା, ଉଆସପୋଖରୀ ଆଦି ୪ ବସ୍ତିର ପ୍ରାୟ ୪୮୦ ପରିବାର ୨ମାସ ହେବ ଜଳକଷ୍ଟ ଭୋଗୁଛନ୍ତି। ଗାଁରୁ ୧ କି.ମି ଦୂରରେ ଥିବା ଏକ ପୁରୁଣା କୂଅକୁ ଗ୍ରାମବାସୀ ଭରସା କରିଛନ୍ତି। ମହିଳାମାନେ ପାନୀୟ ଜଳ ପାଇଁ ଅନେକ ଅସୁବିଧାର ସମ୍ମୁଖୀନ ହେଉଥିବା ସହ ଗାଧୋଇବା ପାଇଁ ଏକ ଅପରିଷ୍କାର ପୋଖରୀ ଉପରେ ନିର୍ଭର କରୁଛନ୍ତି। ଏ ବିଷୟରେ ଗ୍ରାମ୍ୟ ଉନ୍ନୟନ ଠିକାଦାରଙ୍କ ସହିତ ଆଲୋଚନା କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିବା ଗ୍ରାମବାସୀ କହିଛନ୍ତି। ଆର୍ଡବ୍ଲ୍ୟୁଏସ୍ଏସ୍ କର୍ତ୍ତୃପକ୍ଷ ଏହାର ମରାମତି କରିବେ ବୋଲି ଠିକାଦାର କହୁଛନ୍ତି। କିନ୍ତୁ ଆର୍ଡବ୍ଲ୍ୟୁଏସ୍ଏସ୍ କର୍ତ୍ତୃପକ୍ଷ ଏଥିପ୍ରତି କର୍ଣ୍ଣପାତ କରୁ ନ ଥିବା ଗ୍ରାମବାସୀ ଅଭିଯୋଗ କରିଛନ୍ତି। ଏ ସଂକ୍ରାନ୍ତରେ ବିଭାଗୀୟ କନିଷ୍ଠ ଯନ୍ତ୍ରୀ ସୁଧାକର ପଣ୍ଡାଙ୍କୁ ପଚାରିବାରେ ଖୁବଶୀଘ୍ର ଏହାର ସମାଧାନ ହେବ ବୋଲି ସେ କହିଛନ୍ତି।
