ବଲସକୁମ୍ପା,୮।୫: କନ୍ଧମାଳ ଖଜୁରିପଡ଼ା ବ୍ଲକ ବିଡିଓ ରବୀନ୍ଦ୍ରନାଥ କହଁର ୭ କିଲୋମିଟର ଜଙ୍ଗଲରେ ଚାଲି ଚାଲି ଯାଇ ଗ୍ରାମବାସୀଙ୍କ ସମସ୍ୟା ବୁଝିଛନ୍ତି। ୧୪ଟି ପଞ୍ଚାୟତକୁ ନେଇ ଖଜୁରିପଡ଼ା ବ୍ଲକ ଗଠିତ। ପ୍ରାୟ ୨ କିମ୍ବା ୩ଟି ପଞ୍ଚାୟତର ଗାଁ ଗୁଡିକ ଅତି ଦୁର୍ଗମ ଓ ଅପହଞ୍ଚ ଇଲାକାରେ ଅବସ୍ଥିତ। ସେଥିରୁ ବିଲାବାଡ଼ି ପଞ୍ଚାୟତ ସମ୍ପୂର୍ଣ୍ଣ ଦୁର୍ଗମ ଓ ଅପହଞ୍ଚ ଇଲାକା। ସେହି ଗାଁଗୁଡ଼ିକୁ ବିଡିଓ କହଁର ଜଙ୍ଗଲରେ ଚାଲିକି ଯାଇ ଲୋକଙ୍କ ସମସ୍ୟା ବୁଝୁଛନ୍ତି। ଗତ ରବିବାର ଛୁଟିଦିନ ଥିଲେ ମଧ୍ୟ ଖରାକୁ ଖାତିର ନକରି ବିଡିଓ ଏହି ବିଲାବାଡ଼ି ପଞ୍ଚାୟତକୁ ଗସ୍ତକରି ୭ କିଲୋମିଟର ବାଟ ଜଙ୍ଗଲରେ ଚାଲିକି ଯାଇ ମହାପାତ୍ର ଗ୍ରାମରେ ପହଞ୍ଚି ଆୟୋଜିତ ବୈଠକରେ ଲୋକଙ୍କ ସମସ୍ୟା ବୁଝିଥିବା ଦେଖିବାକୁ ମିଳିଛି। ରାସ୍ତାର ସମସ୍ୟା ପାଇଁ ଆବାସ ଯୋଜନାରେ କାର୍ଯ୍ୟାଦେଶ ମିଳିଥିଲେ ବି ଗୃହ ନିର୍ମାଣ ଉପକରଣ ନେଇ ପାରୁ ନ ଥିବାରୁ ଏପର୍ଯ୍ୟନ୍ତ ଲୋକେ ଗୃହ ନିର୍ମାଣ କରି ପାରୁନାହାନ୍ତି। ସେହିଭଳି ୧୦ କିଲୋମିଟର ବାଟ ଜଙ୍ଗଲ ରାସ୍ତାରେ ଚାଲିକି ଆସି ଚାଉଳ, କିରୋସିନ, ଅନ୍ୟାନ୍ୟ ଖାଦ୍ୟ ସାମଗ୍ରୀ ଜିନିଷପତ୍ର ନେଇ ଯାଉଛନ୍ତି। ଏହିସବୁ ସମସ୍ୟା ଗ୍ରାମବାସୀ ବିଡିଓଙ୍କୁ ଜଣାଇଥିଲେ। ବିଡିଓଙ୍କ ଏହି ଗସ୍ତ କାର୍ଯ୍ୟକ୍ରମରେ ସହକାରୀ ଯନ୍ତ୍ରୀ ସଲିଳ ସ୍ବାଇଁ, କନିଷ୍ଠ ଯନ୍ତ୍ରୀ ପ୍ରଦୀପ କୁମାର ପ୍ରଧାନ, ଓଡ଼ିଶା ଜୀବିକା ମିଶନ ବିଏଲ୍ସି ପରେଶ କୁମାର ଦିଗାଲ, ବିଏଫ୍ଟି ରଞ୍ଜନ କୁମାର ସେଠୀ, ବିଇଓ ତ୍ରିନାଥ ଠାକୁର ବିଶୋଇ, ସରପଞ୍ଚ ରବୀନ୍ଦ୍ର ଭକ୍ତା ପ୍ରମୁଖ ଉପସ୍ଥିତ ଥିଲେ। ପୂର୍ବରୁ ଏହି ପଞ୍ଚାୟତର ଦଡ଼ଗଣ୍ଡା ଗ୍ରାମକୁ ଜଙ୍ଗଲ ଚଢ଼ି ୬ କିଲୋମିଟର ବାଟ ଚାଲିକି ବିଡିଓ କହଁର ଯାଇ ଲୋକଙ୍କ ସମସ୍ୟା ସମ୍ପର୍କରେ ବୁଝିଥିଲେ। ବିଡିଓଙ୍କ ଏଭଳି କାର୍ଯ୍ୟକଳାପକୁ ବୁଦ୍ଧିଜୀବୀ ମହଲରେ ପ୍ରଶଂସା କରାଯାଇଛି।
