ଜୁନାଗଡ/ଗୋଲାମୁଣ୍ଡା,୧୫।୨(ଡି.ଏନ.ଏ.): ତ୍ରିସ୍ତରୀୟ ପଞ୍ଚାୟତ ନିର୍ବାଚନ ଲାଗି ଆସନ୍ତା ୧୬ ତାରିଖରୁ ପ୍ରଥମ ପର୍ଯ୍ୟାୟ ମତଦାନ ଅନୁଷ୍ଠିତ ହେବ। ଏହିକ୍ରମରେ କଳାହାଣ୍ଡି ଜିଲାର ପ୍ରଥମ ପର୍ଯ୍ୟାୟରେ ଜୁନାଗଡ ନିର୍ବାଚନ ମଣ୍ଡଳୀରେ ମତଦାନ ହେବାକୁ ଯାଉଛି। ଜୁନାଗଡ ନିର୍ବାଚନମଣ୍ଡଳୀରେ ଜୁନାଗଡ ଓ ଗୋଲାମୁଣ୍ଡା ବ୍ଲକ ରହିଛି। ଚଳିତ ପଞ୍ଚାୟତ ନିର୍ବାଚନରେ ଜୁନାଗଡ ବ୍ଲକର ୩୪ଟି ପଞ୍ଚାୟତରେ ୩୯୦ଟି ବୁଥ୍ ହୋଇଥିବା ବେଳେ ଏଥିରେ ୧ ଲକ୍ଷ ୨୪ ହଜାର ୯୨୯ଜଣ ଭୋଟର ନିଜର ମତ ସାବ୍ୟସ୍ତ କରିବେ। ଜୁନାଗଡ ବ୍ଲକର ୩୪ଟି ପଞ୍ଚାୟତରେ ୩୯୬ ଜଣ ୱାର୍ଡମେମ୍ବର, ୧୬୩ ସରପଞ୍ଚ,୧୩୯ ସମିତିସଭ୍ୟା/ସଭ୍ୟ ଓ ୪ ଜୋନ୍ ପାଇଁ ୧୭ ଜଣ ଜିଲା ପରିଷଦ ପ୍ରାର୍ଥୀ ଛିଡା ହୋଇଛନ୍ତି।
ସେହିପରି ଗୋଲାମୁଣ୍ଡା ବ୍ଲକର ୨୨ଟି ପଞ୍ଚାୟତରେ ୩୨୭ଟି ବୁଥ୍ ହୋଇଥିବାବେଳେ ଏଥିରେ ୯୫ ହଜାର ୧୦୬ଜଣ ଭୋଟର ନିଜ ମତ ସାବ୍ୟସ୍ତ କରିବେ। ଗୋଲାମୁଣ୍ଡା ବ୍ଲକର ୨୮ଟି ପଞ୍ଚାୟତରେ ୪୮୪ଜଣ ୱାର୍ଡମେମ୍ବର, ୧୩୯ ସରପଞ୍ଚ, ୯୮ ସମିତିସଭ୍ୟା/ସଭ୍ୟ ଓ ୩ ଜୋନ୍ ପାଇଁ ୯ଜଣ ଜିଲା ପରିଷଦ ପ୍ରାର୍ଥତ୍ନୀ/ପ୍ରାର୍ଥୀ ଛିଡା ହୋଇଛନ୍ତି। ସମୂଦାୟ ଜୁନାଗଡ ନିର୍ବାଚନମଣ୍ଡଳୀରେ ଚଳିତ ପଞ୍ଚାୟତ ନିର୍ବାଚନରେ ୭୧୭ଟି ବୁଥ୍ ରହିଥିବା ବେଳେ ଏଥିରେ ୨ ଲକ୍ଷ ୨୦ ହଜାର ୩୫ଜଣ ଭୋଟର ନିଜର ମତ ସାବ୍ୟସ୍ତ କରିବେ। ବୁଧବାର ଜୁନାଗଡ ନିର୍ବାଚନ ମଣ୍ଡଳୀରେ ଭୋଟ ଗ୍ରହଣ ହେଉଥିବାରୁ ଏଥିପାଇଁ ସ୍ଥାନୀୟ ପ୍ରଶାସନ ପକ୍ଷରୁ ବୁଥ୍ଗୁଡିକ ପ୍ରସ୍ତୁତ ରଖାଯାଇଛି। ସେହିପରି ମତଦାନ ଲାଗି ମଙ୍ଗଳବାର ପୋଲିସ କର୍ମଚାରୀ, ପୋଲିଂ ଅଧିକାରୀମାନେ ମତଦାନ କେନ୍ଦ୍ର ଅଭିମୁଖେ ଗସ୍ତ କରିବେ ବୋଲି ଜଣାପଡିଛି। ପୂର୍ବ ନିର୍ବାଚନଗୁଡିକରେ ୨ଦିନ ପୂର୍ବରୁ ପୋଲିଂ ଅଧିକାରୀ, ପୋଲିସ କର୍ମଚାରୀମାନେ ମତଦାନ କେନ୍ଦ୍ରକୁ ଯାଉଥିବା ବେଳେ ଚଳିତବର୍ଷ କଳାହାଣ୍ଡି ଜିଲାରେ ତାହାର ବ୍ୟତିକ୍ରମ ଦେଖିବାକୁ ମିଳିଛି।
