ଭଦ୍ରକ ଅଫିସ,୨୬।୧୦: ଧାମନଗର ଉପନିର୍ବାଚନ ଯେତେ ପାଖେଇ ଆସୁଛି ହାର୍ଜିତ୍କୁ ନେଇ ରାଜନୈତିକ ମହଲରେ ଉତ୍କଣ୍ଠା ସେତେ ବଢ଼ିଚାଲିଛି। ଧାମନଗର ନିର୍ବାଚନମଣ୍ଡଳୀ ଅଧୀନ ତିହିଡ଼ି ବ୍ଲକର ୧୩ ପଞ୍ଚାୟତର ଭୋଟ୍ ଏହି ଉପନିର୍ବାଚନ ଫଳାଫଳର ନିର୍ଣ୍ଣାୟକ ହେବ ବୋଲି ଚର୍ଚ୍ଚା ହେଉଛି। ତିହିଡ଼ି ବ୍ଲକର ତଳଗୋପବିନ୍ଧା, ବାରୋ, କୁବେରା, କଁାପଡ଼ା, ବୋଡ଼କ, ବିଲଣା, ଶ୍ୟାମସୁନ୍ଦରପୁର, ଗୁଆମାଳ, ଅଚକ, ତାଳପଦା, ନୟାନନ୍ଦ, ଦୋଳସାହି ଓ ପାଳିଆବିନ୍ଧା ଏହି ୧୩ ପଞ୍ଚାୟତର ୬୩ ହଜାରରୁ ଊର୍ଦ୍ଧ୍ୱ ଭୋଟରଙ୍କ ନିର୍ଣ୍ଣାୟକ ଭୂମିକା ଉପରେ ନିର୍ବାଚନର ଫଳାଫଳ ନିର୍ଭର କରୁଛି।
ତିହିଡ଼ି ବ୍ଲକର ୭ ନଂ. ଜୋନ୍ କଁାପଡ଼ା ପଞ୍ଚାୟତରେ ବିଜେଡି ପ୍ରାର୍ଥତ୍ନୀ ଅବନ୍ତୀ ଦାସ ଓ ସ୍ବାଧୀନ ପ୍ରାର୍ଥୀ ରାଜେନ୍ଦ୍ର ଦାସଙ୍କ ଘର। ଗତ ପଞ୍ଚାୟତ ନିର୍ବାଚନରେ ଏହି ପଞ୍ଚାୟତର ୨,୭୬୬ ଖଣ୍ଡ ଭୋଟ୍ ବିଜେଡିକୁ ମିଳିଥିବା ବେଳେ ୧,୨୯୮ ଖଣ୍ଡ ଭାଜପା ସପକ୍ଷରେ ଥିଲା। ଏଥର କିନ୍ତୁ ବିଜେଡିର ବିଦ୍ରୋହୀ ରାଜେନ୍ଦ୍ର ସ୍ବାଧୀନ ପ୍ରାର୍ଥୀ ହୋଇଥିବାରୁ ଭୋଟ୍ ବିଭାଜନ ହେବା ସମ୍ଭାବନା ରହିଛି। ନିଜ ଗଁାରୁ ରାଜେନ୍ଦ୍ର ଅଧିକ ଭୋଟ ପାଇବେ ବୋଲି ଆଶା ରଖିଥିବା ବେଳେ ତାଙ୍କୁ ଚେକ୍ ଦେବା ପାଇଁ ବିଜେଡି ଗୋଟି ଚାଳନା ଆରମ୍ଭ କରିଛି। ଏହି ଜୋନ୍ରେ ଭାଜପା ପ୍ରାର୍ଥୀ ସୂର୍ଯ୍ୟବଂଶୀ ସୂରଜ, ଅବନ୍ତୀ ଓ ରାଜେନ୍ଦ୍ରଙ୍କ ମଧ୍ୟରେ ତ୍ରିମୁଖୀ ଟକ୍କର ହେବ ବୋଲି ଚର୍ଚ୍ଚା ହେଉଛି। ପଞ୍ଚାୟତ ନିର୍ବାଚନରେ ୧୩ ପଞ୍ଚାୟତରୁ ବିଜେଡି ୨୭,୮୨୫ ଭୋଟ ପାଇଥିବା ବେଳେ ଭାଜପା ୨୦,୮୧୫ ଭୋଟ ପାଇଥିଲା। ଯଦି ଏହି ୧୩ ପଞ୍ଚାୟତରୁ ଅଧିକ ଭୋଟ୍ ରାଜେନ୍ଦ୍ରଙ୍କୁ ମିଳେ, ତା’ହେଲେ ବିଜେଡି ପାଇଁ ଏହା ସମସ୍ୟା ହୋଇପାରେ। ଏଥିସହ ଧାମନଗର ବ୍ଲକ ଓ ଏନ୍ଏସିର ସଂଖ୍ୟାଲଘୁ ଭୋଟ୍ ସମସ୍ତଙ୍କ ନଜରରେ ରହିଛି। ଏନ୍ଏସି ଅଧୀନ ୧୧ ୱାର୍ଡରେ ୧୫ ହଜାର ଭୋଟର ରହିଛନ୍ତି। ସେହିପରି ବ୍ଲକର ଗୁଡ଼ୁପୋଖରୀ, ପନ୍ଦରବାଟିଆ, ପିତେଇପୁର, ଜାଫରପୁର, ବୟାଙ୍ଗଡିହୀ ଆଦି ଅଞ୍ଚଳରେ ୧୦ ହଜାରରୁ ଊର୍ଦ୍ଧ୍ୱ ସଂଖ୍ୟାଲଘୁ ଭୋଟର। ଏହି ସଂଖ୍ୟାଲଘୁ ଭୋଟ୍ ଓ ତିହିଡ଼ି ବ୍ଲକର ୧୩ ପଞ୍ଚାୟତର ଭୋଟର ଉପନିର୍ବାଚନରେ ପ୍ରାର୍ଥୀଙ୍କ ବିଜୟ ପାଇଁ ନିର୍ଣ୍ଣାୟକ ସାବ୍ୟସ୍ତ ହେବେ ବୋଲି ଆଲୋଚନା ହେଉଛି।
