ଗୁଆହାଟୀ,୧।୫ : ଆସାମ ସରକାର ବର୍ତ୍ତମାନ ମଦ୍ୟପ ପୋଲିସ ପାଇଁ ଏକ ନୂତନ ଯୋଜନା ପ୍ରସ୍ତୁତ କରିଛନ୍ତି। ଏହା ଅନ୍ତର୍ଗତ ଅଭ୍ୟାସଗତ ମଦ୍ୟପ ପୋଲିସ କର୍ମଚାରୀ ଏବଂ ଅଧିକାରୀଙ୍କୁ ସରକାର ସେୱଚ୍ଛାକୃତ ଅବସର ଦେବେ। ଆସାମର ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ଏହା ଘୋଷଣା କରିଛନ୍ତି। ସେ କହିଛନ୍ତି, ଅଭ୍ୟାସଗତ ମଦ୍ୟପ ପୋଲିସଙ୍କୁ ଭିଆରଏସ ଦିଆଯିବ ଏବଂ ସେମାନଙ୍କ ସ୍ଥାନରେ ନୂତନ ନିଯୁକ୍ତି ପ୍ରକ୍ରିୟା ମଧ୍ୟ ଆରମ୍ଭ ହୋଇଛି।
ଉଲ୍ଲେଖନୀୟ ଆସାମର ମୁଖ୍ୟମନ୍ତ୍ରୀ ଗୃହ ମନ୍ତ୍ରଣାଳୟକୁ ମଧ୍ୟ ନିଜ ପାଖରେ ରଖିଛନ୍ତି। ସେ କହିଛନ୍ତି, ପ୍ରାୟ ୩୦୦ ଅଧିକାରୀ ଏବଂ ଯବାନମାନେ ଅଭ୍ୟାସଗତ ମଦ୍ୟପ। ସେମାନଙ୍କ ଶରୀର ଅତ୍ୟଧିକ ମଦ୍ୟପାନ ଦ୍ୱାରା କ୍ଷତିଗ୍ରସ୍ତ ହୋଇଛି। ସରକାର ସେମାନଙ୍କ ଭିଆରଏସ ପାଇଁ ଏକ ପ୍ରସ୍ତାବ ଆଣିଛନ୍ତି। ଆସନ୍ତା ମେ’ ୧୦ ତାରିଖ ଆସାମରେ ହିମନ୍ତ ସରକାର ଦୁଇ ବର୍ଷ ପୂରଣ କରିବା ପୂର୍ବରୁ ମୁଖ୍ୟମନ୍ତ୍ରୀ ପ୍ରଶାସନରେ ଏହି ପରିବର୍ତ୍ତନକୁ କାର୍ଯ୍ୟକାରୀ କରିବା ପାଇଁ ଯୋଜନା କରିଛନ୍ତି।
ପୋଲିସ ଫୋର୍ସକୁ ଫିଟ ରଖିବା ପାଇଁ ଏଭଳି ପଦକ୍ଷେପ ଗ୍ରହଣ କରାଯାଇଛି। ମୁଖ୍ୟମନ୍ତ୍ରୀ କହିଛନ୍ତି ପୋଲିସ ବିଭାଗ ପାଇଁ ଏହିପରି ଯୋଜନା ଅନ୍ୟ କେତେକ ରାଜ୍ୟରେ ମଧ୍ୟ ରହିଛି। ତେବେ ଆସାମରେ ଏହା ପ୍ରଥମ ଥର ପାଇଁ କରାଯାଉଛି। ଏହା ଏକ ପୁରୁଣା ନିୟମ, କିନ୍ତୁ ଆମେ ଏହା ପୂର୍ବରୁ କାର୍ଯ୍ୟକାରୀ କରିନାହୁଁ। ଭିଆରଏସ ନେବା ପରେ ମଧ୍ୟ ଏହି ଅଭ୍ୟାସଗତ ମଦ୍ୟପ ଯବାନମାନେ ପୂର୍ଣ୍ଣ ଦରମା ପାଇବେ। କେବଳ ନୂତନ ଯବାନ ସେମାନଙ୍କ ସ୍ଥାନ ନେବେ।
