ଶାରଜା,୧୩।୧୦: ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଆଇପିଏଲ୍ରେ କୋଲକାତା ନାଇଟ ରାଇଡର୍ସ (କେକେଆର୍) ବିପକ୍ଷରେ ଅଧିନାୟକତ୍ୱର ଶେଷ ମ୍ୟାଚ ଖେଳିଛନ୍ତି। ଏହି ଆଇପିଏଲ ସିଜନ ପରେ ସେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି) ର ଅଧିନାୟକ ପଦରୁ ଇସ୍ତଫା ଦେବେ ବୋଲି ବିରାଟ କୋହଲି ପୂର୍ବରୁ ଘୋଷଣା କରିଛନ୍ତି। ତାଙ୍କ ଅଧିନାୟକତ୍ୱର ଶେଷ ଆଇପିଏଲ ମ୍ୟାଚରେ କୋହଲି ହୃଦୟ ଭାଙ୍ଗିଥିଲେ। ଆଇପିଏଲ ୨୦୨୧ର ଏଲିମିନେଟର ମ୍ୟାଚରେ ଆରସିବି ଦଳ କୋଲକାତା ନାଇଟ ରାଇଡର୍ସ ବିପକ୍ଷରେ ୪ ଉଇକେଟ ହରାଇ ଫାଇନାଲ ଦୌଡ଼ରୁ ବାହାରିଛି। ଇଂଲଣ୍ଡର ପୂର୍ବତନ ଅଧିନାୟକ ମାଇକେଲ ଭନ କୋହଲିଙ୍କ କ୍ଷତ ଉପରେ ଲୁଣ ଛିଞ୍ଚିଛନ୍ତି।
ଭନଙ୍କ କହିବାନୁସାରେ, ବିରାଟ କୋହଲିଙ୍କୁ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁ (ଆରସିବି)ର ସବୁଠାରୁ ଅସଫଳ ଅଧିନାୟକ ଭାବେ ସ୍ମରଣ କରାଯିବ, ଯିଏକି ତାଙ୍କ ଦଳକୁ ଥରେ ମଧ୍ୟ ଆଇପିଏଲ ଟ୍ରଫି ଜିତିତାଇ ପାରି ନାହାନ୍ତି। ଭାରତୀୟ ଟେଷ୍ଟ ଦଳ ଏବଂ ଟେଷ୍ଟ କ୍ରିକେଟ ପାଇଁ ବିରାଟ ବହୁତ ଭଲ କାମ କରୁଛନ୍ତି। ଏହି କାରଣରୁ ଭାରତୀୟ କ୍ରିକେଟ ବହୁତ ବିକାଶ କରୁଛି, କିନ୍ତୁ ଆପଣଙ୍କୁ ସଚ୍ଚୋଟ ଭାବରେ କହିବାକୁ ପଡିବ ଯେ, ଅନ୍ତର୍ଜାତୀୟ ଟି-୨୦ ଏବଂ ଦିନିକିଆରେ ଭାରତ ଅଧିନାୟକତ୍ୱ ଏବଂ ଆଇପିଏଲରେ ରୟାଲ ଚ୍ୟାଲେଞ୍ଜର୍ସ ବେଙ୍ଗାଲୁରୁରର ଅଧିନାୟକଙ୍କ ମଧ୍ୟରେ ଅନେକ ପାର୍ଥକ୍ୟ ଅଛି ବୋଲି ସେ କହିଛନ୍ତି।
ବିରାଟ କୋହଲି ୭ ବର୍ଷ ଧରି ଆରସିବିର ଅଧିନାୟକ ରହିଆସିଛନ୍ତି, କିନ୍ତୁ ତାଙ୍କ ଅଧିନାୟକତ୍ୱରେ ଆରସିବି ଦଳ ଗୋଟିଏ ବି ଆଇପିଏଲ ଟାଇଟଲ ଜିତି ନାହିଁ। ଟ୍ରଫି ଜିତିବାର ସ୍ବପ୍ନ ଭାଙ୍ଗିବା ପରେ ବିରାଟ କୋହଲି କହିଛନ୍ତି ଯେ, ଯେପର୍ଯ୍ୟନ୍ତ ସେ ଆଇପିଏଲରେ ଖେଳିବେ,ଆରସିବି ଦଳ ସହ ଜଡିତ ହେବେ। ନ୍ବିଶ୍ୱର ଅନ୍ୟତମ ଶ୍ରେଷ୍ଠ ବ୍ୟାଟ୍ସମ୍ୟାନ ବିରାଟ କୋହଲି ଟି -୨୦ ବିଶ୍ୱକପ ୨୦୨୧ ପରେ ଭାରତୀୟ ଟି -୨୦ ଦଳର ଅଧିନାୟକତ୍ୱ ଛାଡିବେ ବୋଲି ଘୋଷଣା କରିଥିଲେ ଏବଂ ୧୯ ସେପ୍ଟେମ୍ବର ୨୦୨୧ରେ ସେ ରୟାଲର ଅଧିନାୟକତ୍ୱ ଛାଡିବାକୁ ଘୋଷଣା କରିଥିଲେ।
