ଦୁବାଇ,୧୯।୯: ଭାରତୀୟ ଟି୨୦ ଦଳର ଅଧିନାୟକ ପଦରୁ ଓହରିବା ନେଇ ଘୋଷଣା କରିବା ପରେ ଆଉ ଏକ ବଡ଼ ନିଷ୍ପତ୍ତି ନେଇଛନ୍ତି ବିରାଟ କୋହଲି। ଏଠାରେ ଚାଲିଥିବା ଚଳିତ ଆଇପିଏଲ ସିଜନର ବଳକା ମ୍ୟାଚ୍ ଶେଷ ହେବା ପରେ କୋହଲି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଦଳର ଅଧିନାୟକ ପଦ ଛାଡ଼ିଦେବେ। ତାଙ୍କର ଏଭଳି ନିଷ୍ପତ୍ତି ସମ୍ପର୍କରେ ସେ ରବିବାର ସୂଚନା ଦେଇଛନ୍ତି।
୨୦୧୩ରେ ଡାନିଏଲ ଭିଟୋରିଙ୍କ ପରେ ଆରସିବି ଦଳର ନେତୃତ୍ୱ ଭାର ନେଇଥିଲେ କୋହଲି। ୯ଟି ଆଇପିଏଲ ସିଜନରେ କୋହଲିଙ୍କ ନେତୃତ୍ୱରେ ଆର୍ସିବି ଏପର୍ଯ୍ୟନ୍ତ ୧୩୨ ମ୍ୟାଚ୍ ଖେଳିଛି। ସେଥିରୁ ୬୨ ମ୍ୟାଚ୍ରେ ଦଳ ବିଜୟ ହାସଲ କରିଥିବା ବେଳେ ୬୬ଟି ମ୍ୟାଚ୍ରେ ଦଳକୁ ପରାଜୟର ମହଁ ଦେଖିବାକୁ ପଡ଼ିଥିଲା। ଫଳାଫଳ ଶୂନ୍ୟ ରହିଥିଲା ଅନ୍ୟ ୪ ମ୍ୟାଚ୍।
ପ୍ରତିଭାଶାଳୀ ଖେଳାଳିଙ୍କ ଗ୍ରୁପ୍ର ନେତୃତ୍ୱ ନେବା ମୋ ପାଇଁ ଏକ ପ୍ରେରଣାଦାୟୀ ଯାତ୍ରା ଥିଲା। ଲଗାତାର ଦଳର ଉନ୍ନତିରେ ସହଯୋଗ କରିଥିବା ଆର୍ସିବି ମ୍ୟାନେଜମେଣ୍ଟ, କୋଚ୍, ସପୋର୍ଟ ଷ୍ଟାଫ, ଖେଳାଳି ଓ ପୂରା ବାଙ୍ଗାଲୋର ପରିବାରକୁ ଧନ୍ୟବାଦ ଜଣାଉଛୁ। ଦଳର ନେତୃତ୍ୱ ଛାଡ଼ିବା ମୋ ପାଇଁ ସହଜ ନିଷ୍ପତ୍ତି ନ ଥିଲା। କିନ୍ତୁ ଫ୍ରାଞ୍ଚାଇଜର ହିତ ପାଇଁ ବହୁ ଚିନ୍ତା କରି ଏଭଳି ନିଷ୍ପତ୍ତି ନେଇଛି। ଆର୍ସିବି ପରିବାର ସର୍ବଦା ମୋ ହୃଦୟ ନିକଟରେ ରହିବ। ମୁଁ ଯେଉଁ ପର୍ଯ୍ୟନ୍ତ ସନ୍ନ୍ୟାସ ନେଇ ନାହିଁ, ସେପର୍ଯ୍ୟନ୍ତ କେବଳ ଆର୍ସିବି ପାଇଁ ଖେଳିବି ବୋଲି କୋହଲି କହିଛନ୍ତି।
ଉଲ୍ଲେଖଯୋଗ୍ୟ, କୋହଲିଙ୍କ ନେତୃତ୍ୱାଧୀନ ଆର୍ସିବି ଚଳିତ ଆଇପିଏଲର ଦ୍ୱିତୀୟ ପର୍ଯ୍ୟାୟର ପ୍ରଥମ ମୁକାବିଲାରେ କୋଲକାତା ନାଇଟ୍ ରାଇଡର୍ସ (କେକେଆର୍)କୁ ସୋମବାର ଭେଟିବ।
