ଆବୁଧାବି,୯।୧୦: ଲଗାତାର ଦୁଇ ଅର୍ଦ୍ଧଶତକୀୟ ଇନିଂସ ଖେଳି ଫର୍ମକୁ ଫେରିଥିବା ସୂଚନା ଦେଇଛନ୍ତି ଯୁବ ଉଇକେଟକିପର ବ୍ୟାଟ୍ସମ୍ୟାନ ଇଶାନ କିଷନ। ସେ ଟି୨୦ ବିଶ୍ୱକପ୍ରେ ରୋହିତ ଶର୍ମାଙ୍କ ସହ ଓପନିଂ କରିବେ। ଏ ନେଇ ତାଙ୍କୁ ଅଧିନାୟକ ବିରାଟ କୋହଲି କହିସାରିଥିବା ହାଇଦ୍ରାବାଦ୍ ବିପକ୍ଷ ମ୍ୟାଚ୍ ପରେ କିଷନ କହିଛନ୍ତି। ୨୩ ବର୍ଷୀୟ କିଶାନ ମୁମ୍ବାଇର ଅନ୍ତିମ ଦୁଇ ଲିଗ୍ ମ୍ୟାଚ୍ରେ ୮୪ ଓ ୫୦* ରନ୍ର ବିସ୍ଫୋରକ ପାଳି ଖେଳିଥିଲେ।
ସମସ୍ତ ଫର୍ମାଟରେ ଭାରତୀୟ ଦଳ ପାଇଁ ରୋହିତ ଶର୍ମା ନିୟମିତ ଓପନିଂ କରୁଛନ୍ତି। ଟି୨୦ରେ ତାଙ୍କ ସହ ଲୋକେଶ ରାହୁଲ ଓ ଅଧିନାୟକ କୋହଲି ଓପନିଂ କରନ୍ତି। କିନ୍ତୁ ଅଗାମୀ ଟି୨୦ ବିଶ୍ୱକପ୍ରେ ରୋହିତଙ୍କ ସହ କିଷନଙ୍କୁ ଦେଖିବାକୁ ମିଳିପାରେ।
“ମୁଁ ଓପନିଂ କରିବାକୁ ଭଲ ପାଏ, ତାହା କରିବା ପାଇଁ ମୋତେ ବିରାଟ ଭାଇ କହିଛନ୍ତି। କିନ୍ତୁ ବଡ଼ ଇଭେଣ୍ଟରେ ତୁମକୁ ସବୁକିଛି ଲାଗି ପ୍ରସ୍ତୁତ ହେବାକୁ ପଡ଼ିବ। ବିଶ୍ୱକପ୍ ପୂର୍ବରୁ ଫର୍ମକୁ ଫେରିବା କେବଳ ମୋ ପାଇଁ ନୁହେଁ, ବରଂ ଦଳ ଲାଗି ମଧ୍ୟ ଭଲ କଥା” ବୋଲି କିଷନ କହିଛନ୍ତି।
