ଦୁବାଇ, ୧୬।୯: କରୋନା ଭାଇରସ୍ ମଧ୍ୟରେ ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଆସନ୍ତା ୧୯ରୁ ୟୁଏଇରେ ଆରମ୍ଭ ହେବାକୁ ଯାଉଛି। କରୋନା ମହାମାରୀ ଲାଗି ଚଳିତ ବର୍ଷ ଆଇପିଏଲ୍କୁ ଭାରତରୁ ୟୁଏଇକୁ ସ୍ଥାନାନ୍ତର କରାଯାଇଛି। ଆଇପିଏଲ୍ ପ୍ରସ୍ତୁତି ଲାଗି ସମସ୍ତ ୮ଟି ଯାକ ଟିମ୍ ପ୍ରାୟ ଗୋଟିଏ ମାସ ପୂର୍ବରୁ ୟୁଏଇରେ ପହଞ୍ଚି ସାରିଛନ୍ତି। ୟୁଏଇରେ ଟାଣ ଖରାରେ ଅଭ୍ୟାସ କରିସାରିବା ପରେ ଖେଳାଳିମାନେ ସୁଇମିଂ ପୁଲ୍ରେ ମଜା ଉଠାଇବାର କୌଣସି ସୁଯୋଗ ହରାଇବାକୁ ଚାହୁଁନାହାନ୍ତି। ସୁଇମିଂ ପୁଲ୍ରେ ମସ୍ତି କରୁଥିବା ଖେଳାଳିଙ୍କ ମଧ୍ୟରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ବିରାଟ କୋହଲି ମଧ୍ୟ ସାମିଲ ହୋଇଛନ୍ତି। ପୁଲ୍ରେ ମଜା କରୁଥିବାର ଏକ ଭିଡିଓ କୋହଲି ତାଙ୍କ ଇନ୍ଷ୍ଟାଗ୍ରାମରେ ପୋଷ୍ଟ କରିଛନ୍ତି। ‘ସୁଇମିଂ ପୁଲ୍ ଲାଗି ବିଗତ ଦିନଗୁଡ଼ିକ ମଜାଦାର ରହିଥିଲା’ ବୋଲି କୋହଲି ଏହି ଭିଡିଓରେ କ୍ୟାପ୍ସନ ଦେଇଛନ୍ତି। କୋହଲିଙ୍କ ସମେତ ବାଙ୍ଗାଲୋରର ଅନ୍ୟ ସମସ୍ତ ଖେଳାଳିମାନେ ମଧ୍ୟ ପୁଲ୍ରେ ମଜା କରୁଥିବାର ଦେଖିବାକୁ ମିଳିଛି। ଏଠାରେ ଉଲ୍ଲେଖଯୋଗ୍ୟ, ବିରାଟଙ୍କ ନେତୃତ୍ୱରେ ବାଙ୍ଗାଲୋର ଚଳିତ ବର୍ଷ ଆଇପିଏଲ୍ ଚାମ୍ପିୟନ ହୋଇ ପ୍ରଥମଥର ଲାଗି ଟ୍ରଫି ଜିତିବା ଲକ୍ଷ୍ୟରେ ରହିଛି।
