ଡର୍ହାମ,୨୧।୭: ଭାରତୀୟ ଅଧିନାୟକ ବିରାଟ କୋହଲି ପିଠି ଜନିତ ସମସ୍ୟା ଲାଗି ଏଠାରେ ଚାଲିଥିବା କାଉଣ୍ଟି ସିଲେକ୍ଟ ଏକାଦଶ ବିପକ୍ଷ ଅଭ୍ୟାସ ମ୍ୟାଚ୍ରେ ଖେଳୁ ନାହାନ୍ତି। କୋହଲି ଓ ଉପ ଅଧିନାୟକ ଅଜିଙ୍କ୍ୟ ରାହାନେଙ୍କ ଅନୁପସ୍ଥିତିରେ ଅଭ୍ୟାସ ମ୍ୟାଚ୍ରେ ରୋହିତ ଶର୍ମା ଭାରତୀୟ ଦଳର ନେତୃତ୍ୱ ନେଉଛନ୍ତି। ତେବେ ଭାରତୀୟ ଦଳର ଫ୍ୟାନ୍ସଙ୍କ ଲାଗି ଆଶ୍ୱସ୍ତିଜନକ ଖବର ହେଲା ବୁଧବାର ନେଟ୍ସରେ ଫୁଲଦମ୍ରେ କୋହଲିଙ୍କୁ ବ୍ୟାଟିଂ କରୁଥିବା ଦେଖିବାକୁ ମିଳିଛି।
ଚଳିତ ୩ ଦିନିଆ ଅଭ୍ୟାସ ମ୍ୟାଚ୍ର ଦ୍ୱିତୀୟ ଦିନର ଲଞ୍ଚ ବ୍ରେକରେ କୋହଲି ଦୀର୍ଘ ସମୟ ଧରି ନେଟ୍ସରେ ବ୍ୟାଟିଂ କରିଥିଲେ। ନେଟ୍ସରେ କୋହଲିଙ୍କ ବ୍ୟାଟ୍ରୁ ଦେଖିବାକୁ ମିଳିଥିଲା ଉଭୟ ଡିଫେନ୍ସିଭ ଓ ଆଟାକିଂ ଶଟ୍। ଟୁଇଟରରେ ଏହାର ଭିଡିଓ ଶେୟାର କରିଛି ବିସିସିଆଇ। ଯୁବ ପେସର ଅଭେଶ ଖାଁଙ୍କୁ ଚଳିତ ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟରେ ସୁଯୋଗ ନ ମିଳିପାରେ। ଚଳିତ ଅଭ୍ୟାସ ମ୍ୟାଚ୍ରେ ପ୍ରତିପକ୍ଷ ସିଲେକ୍ଟ କାଉଣ୍ଟି ଏକାଦଶ ପକ୍ଷରୁ ଖେଳୁଥିବା ବେଳେ ତାଙ୍କ ବାମହାତ ବୁଢ଼ା ଆଙ୍ଗୁଠି ଫ୍ରାକ୍ଚର ହୋଇଯାଇଛି। ଏଣୁ ଓ୍ବାର୍ମ ଅପ୍ ମ୍ୟାଚ୍ର ଦ୍ୱିତୀୟ ଓ ୩ୟ ଦିନର ସେ ଖେଳିବେ ନାହିଁ ବୋଲି ବିସିସିଆଇ ପକ୍ଷରୁ କୁହାଯାଇଛି। ତେବେ ଉପଅଧିନାୟକଙ୍କ ଫିଟ୍ନେସ ଉପରେ ବିସିସିଆଇ ପକ୍ଷରୁ କୌଣସି ଅପଡେଟ୍ ଆସି ନାହିଁ। ତାଙ୍କ ବାମ ଗୋଡ଼ ମାଂସପେଶୀ ଫୁଲି ଯାଇଛି।
