ନୂଆଦିଲ୍ଲୀ,୩୧।୧: ରଣଜୀ ଟ୍ରଫିରେ ମଧ୍ୟ ବିରାଟ କୋହଲିଙ୍କ ଖରାପ ଫର୍ମ ଜାରି ରହିଛି। ରେଲୱେ ବିପକ୍ଷ ମ୍ୟାଚ୍ର ପ୍ରଥମ ଇନିଂସରେ କୋହଲି ମାତ୍ର ୬ ରନ କରି ଆଉଟ ହୋଇଥିଲେ। ତାଙ୍କୁ ହିମାଂଶୁ ସାଙ୍ଗୱାନ କ୍ଲିନ ବୋଲ୍ଡ କରିଛନ୍ତି। ବିରାଟ ଗତ ୧୨ ବର୍ଷ ମଧ୍ୟରେ ତାଙ୍କର ପ୍ରଥମ ରଣଜୀ ଟ୍ରଫି ମ୍ୟାଚ ଖେଳୁଥିଲେ, କିନ୍ତୁ କ୍ରିକେଟ ପଡ଼ିଆରେ ତାଙ୍କର ଖରାପ ଫର୍ମ ଜାରି ରହିଛି। ଦିଲ୍ଲୀ ବନାମ ରେଳବାଇ ମ୍ୟାଚ ଜାନୁଆରୀ ୩୦ରେ ଆରମ୍ଭ ହୋଇଥିଲା, କିନ୍ତୁ ବିରାଟ ପ୍ରଥମ ଦିନରେ ବ୍ୟାଟିଂ କରିବାକୁ ଆସି ନ ଥିଲେ।
ଦିଲ୍ଲୀ ଇନିଂସର ୨୪ତମ ଓଭରରେ ଯଶ ଧୁଲ ୩୨ ରନ କରି ଆଉଟ ହେବା ପରେ ବିରାଟ ବ୍ୟାଟିଂ କରିବାକୁ ଆସିଥିଲେ। ବିରାଟ କୋହଲି ପ୍ରାରମ୍ଭରେ ଭଲ ବ୍ୟାଟିଂ କରିଥିଲେ କିନ୍ତୁ ୨୮ତମ ଓଭରର ଚତୁର୍ଥ ବଲ୍ରେ ରେଲୱେର ଡାହାଣହାତୀ ପେସର ହିମାଂଶୁ ସାଙ୍ଗୱାନଙ୍କ ଦ୍ୱାରା ଆଉଟ ହୋଇଥିଲେ। ସବୁଠାରୁ ଆକର୍ଷଣୀୟ କଥା ହେଲା ଯେ ବିରାଟ ଆଉଟ ହେବା ପୂର୍ବରୁ ବଲ ଉପରେ ଏକ ଚୌକା ମାରିଥିଲେ। କିନ୍ତୁ ପରବର୍ତ୍ତୀ ବଲ ବିରାଟଙ୍କ ଆଶାଠାରୁ ଅଧିକ ସ୍ବିଙ୍ଗ ହୋଇଥିଲା, ଯାହା ଫଳରେ ତାଙ୍କର ଅଫ ଷ୍ଟମ୍ପ ଉପୁଡ଼ି ପଡ଼ିଥିଲା।
ଦିଲ୍ଲୀ ବନାମ ରେଳବାଇ ମ୍ୟାଚ ଜାନୁଆରୀ ୩୦ରେ ଆରମ୍ଭ ହୋଇଛି। ଯାହାକୁ ଦେଖିବା ପାଇଁ ପ୍ରଥମ ଦିନରେ ଅରୁଣ ଜେଟଲି ଷ୍ଟାଡିୟମରେ ୧୫,୦୦୦ରୁ ଅଧିକ ଲୋକଙ୍କ ଭିଡ଼ ଜମିଥିଲା। ପ୍ରଥମ ଦିନ, ସମଗ୍ର ରେଳବାଇ ଦଳ ୨୪୧ ରନରେ ଅଲଆଉଟ ହୋଇଯାଇଥିଲା, ଯାହାର ଜବାବରେ ଦିଲ୍ଲୀ ପ୍ରଥମ ଦିନର ଖେଳ ଶେଷ ସୁଦ୍ଧା ଗୋଟିଏ ଉଇକେଟ ହରାଇ ୪୧ ରନ କରିଥିଲା। ପ୍ରଥମ ଦିନ ଦର୍ଶକ ବିରାଟଙ୍କ ବ୍ୟାଟିଂ ଦେଖିବାକୁ ପାଇ ନ ଥିଲେ, କିନ୍ତୁ ଦ୍ୱିତୀୟ ଦିନରେ ମଧ୍ୟ ସେ ମାତ୍ର ୧୫ ବଲ ଖେଳି ନିଜର ଉଇକେଟ ହରାଇଥିଲେ।
