ନୂଆଦିଲ୍ଲୀ,୮।୬:ଭାରତୀୟ କ୍ରିକେଟ୍ ଦଳର ପୂର୍ବତନ ଅଧିନାୟକ ବିରାଟ କୋହଲିଙ୍କ ବ୍ୟାଟ୍ ହୁଏତ ପଡ଼ିଆରେ ଚାଲୁନାହିଁ, କିନ୍ତୁ ସେ ସୋସିଆଲ ମିଡିଆରେ ପ୍ରାୟତଃ ଚର୍ଚ୍ଚାରେ ଅଛନ୍ତି। ଇନଷ୍ଟାଗ୍ରାମରେ ପ୍ରଥମ କ୍ରିକେଟର ଭାବେ ତାଙ୍କ ଫଲୋଅର୍ସ ସଂଖ୍ୟା ୨୦୦ ମିଲିୟନରେ ପହଞ୍ଚିଛି। ଏପରି ଉପଲବ୍ଧି ମହେନ୍ଦ୍ର ସିଂ ଧୋନୀ ଏବଂ ରୋହିତ ଶର୍ମା ମଧ୍ୟ ହାସଲ କରିପାରି ନାହାନ୍ତି।
କୋହଲି ୨୦୦ ମିଲିୟନ କିମ୍ବା ଅଧିକ ଫଲୋଅର୍ସ ଥିବା ବିଶ୍ୱର ତୃତୀୟ ଆଥ୍ଲେଟ ହୋଇଛନ୍ତି। ଏହି ପରିପ୍ରେକ୍ଷୀରେ କେବଳ ପର୍ତ୍ତୁଗାଲର ତାରକା ଫୁଟବଲର୍ ତଥା ଅଧିନାୟକ କ୍ରିଷ୍ଟିଆନୋ ରୋନାଲଡୋ ଏବଂ ଆର୍ଜେଣ୍ଟିନାର ତାରକା ଫୁଟବଲର୍ ତଥା ଅଧିନାୟକ ଲିଓନେଲ ମେସି ତାଙ୍କ ଆଗରେ ଅଛନ୍ତି।
ଇନଷ୍ଟାଗ୍ରାମରେ ରୋନାଲଡୋଙ୍କର ୪୫୧ ନିୟୁତ ଫଲୋଅର୍ସ ଅଛନ୍ତି। ସେ ପ୍ରଥମ ଆଥଲେଟ ଭାବରେ ୪୦୦ ନିୟୁତ ଫଲୋଅର୍ସ ଟପିଥିଲେ। ମେସିଙ୍କର ୩୩୪ ନିୟୁତ ଫଲୋଅର୍ସ ଅଛନ୍ତି। ୨୦୦ ନିୟୁତ ଫଲୋଅର୍ସ ହେବା ପରେ ବିରାଟ ତାଙ୍କ ଇନଷ୍ଟାଗ୍ରାମ ଆକାଉଣ୍ଟରୁ ଏକ ସ୍ବତନ୍ତ୍ର ଭିଡିଓ ଶେୟାର କରିଛନ୍ତି। ତାଙ୍କୁ ସମର୍ଥନ କରିଥିବାରୁ କୋହଲି ତାଙ୍କ ଫଲୋଅର୍ସଙ୍କୁ ଧନ୍ୟବାଦ ଜଣାଇଛନ୍ତି। କୋହଲି କହିଛନ୍ତି, ଆପଣ ସମସ୍ତଙ୍କୁ ଧନ୍ୟବାଦ। ସୋସିଆଲ ମିଡିଆ ହ୍ୟାଣ୍ଡେଲ ଫେସବୁକରେ ବିରାଟଙ୍କର ୪୯ ମିଲିୟନ ଫଲୋଅର୍ସ ମଧ୍ୟ ଅଛନ୍ତି।
