ଗୁଆହାଟୀ/ ନୂଆଦିଲ୍ଲୀ,୨୩ା୧୧(ପି.ଟି.): ମେଘାଳୟର ଓ୍ବେଷ୍ଟ ଜାଇନ୍ତିଆ ହିଲ୍ସର ମୁକ୍ରୋହ ଗ୍ରାମରେ ମଙ୍ଗଳବାର ଭୋର ସମୟରେ ବେଆଇନ କାଠ ଚାଲାଣକୁ ନେଇ ହିଂସାକାଣ୍ଡ ଘଟିଛି। କାଠଭର୍ତ୍ତି ଏକ ଟ୍ରକ୍କୁ ଆସାମ ବନ ବିଭାଗର ଏକ ଟିମ୍ ଅଟକାଇଥିଲା। ଟ୍ରକ୍ଟି ନ ଅଟକି ଦ୍ରୁତଗତିରେ ଫେରାର ହେବାକୁ ଉଦ୍ୟମ କରୁଥିବାବେଳେ ବନ ଅଧିକାରୀମାନେ ଗୁଳି କରି ଏକ ଟାୟାରକୁ ପଙ୍କଚର କରିଦେଇଥିଲେ। ଡ୍ରାଇଭର, ହେଲ୍ପର ଓ ଆଉ ଜଣେ ବ୍ୟକ୍ତିଙ୍କୁ ଧରାଯାଇଥିବାବେଳେ ଅନ୍ୟମାନେ ଖସି ପଳାଇବାରେ ସକ୍ଷମ ହୋଇଥିଲେ। ଫରେଷ୍ଟ ଗାର୍ଡମାନେ ଘଟଣା ସମ୍ପର୍କରେ ଜିରିକେଣ୍ଡିଂ ଥାନାକୁ ସୂଚନା ଦେଇ ପୋଲିସ ସହାୟତା ମାଗିଥିଲେ। ସେଠାରେ ପୋଲିସ ପହଞ୍ଚତ୍ବା ପରେ ସକାଳ ୫ଟାରେ ମେଘାଳୟ ସୀମାର ବହୁ ଗ୍ରାମବାସୀ ଅସ୍ତ୍ରଶସ୍ତ୍ର ଧରି ଆସିଥିଲେ। ସେମାନେ ଫରେଷ୍ଟ ଗାର୍ଡ ଓ ପୋଲିସ କର୍ମଚାରୀମାନଙ୍କୁ ଘେରାଉ କରିବା ସହ ଗିରଫ ବ୍ୟକ୍ତିମାନଙ୍କୁ ତୁରନ୍ତ ଛାଡ଼ିଦେବାକୁ ଦାବି କରିଥିଲେ। ଏତିକିରେ ଅଧିକାରୀମାନେ ସ୍ଥିତିକୁ ଆୟତ୍ତକୁ ଆଣିବା ପାଇଁ ଗୁଳି ଚଳାଇଥିଲେ। ଗୁଳିମାଡ଼ରେ ଆସାମର ଫରେଷ୍ଟ ଗାର୍ଡ ବିଦ୍ୟାସିଂ ଲେଖ୍ତେଙ୍କ ସମେତ ମେଘାଳୟର ଖାସି ସମ୍ପ୍ରଦାୟର ୫ ଜଣଙ୍କ ମୃତ୍ୟୁ ଘଟିଥିଲା। ସୀମାରେ ସ୍ଥିତି ଉତ୍ତେଜନାପୂର୍ଣ୍ଣ ରହିଛି କିନ୍ତୁ ନିୟନ୍ତ୍ରଣାଧୀନ ଥିବା ଓ୍ବେଷ୍ଟ କର୍ବି ଆଙ୍ଗଲୋଙ୍ଗ୍ ଏସ୍ପି ଇମ୍ଦାଦ୍ ଅଲୀ ସୂଚନା ଦେଇଛନ୍ତି। ତେବେ ଫରେଷ୍ଟ ଗାର୍ଡ ବିଦ୍ୟାସିଂଙ୍କ ଦେହରେ କିପରି ଗୁଳି ବାଜିଲା ତାହା ସ୍ପଷ୍ଟ ହୋଇ ନ ଥିବା ଏସ୍ପି କହିଛନ୍ତି। ମେଘାଳୟ ମୁ୍ଖ୍ୟମନ୍ତ୍ରୀ କନରାଡ୍ ସାଙ୍ଗ୍ମା ଘଟଣାକୁ ଦୁର୍ଭାଗ୍ୟଜନକ ବୋଲି ଅଭିହିତ କରିଛନ୍ତି। ଆସାମ ପୋଲିସ ପ୍ରଥମେ ଗୁଳି ଚଳାଇଥିବା ସେ କହିଛନ୍ତି। ହ୍ବାଟ୍ସଆପ୍, ଫେସ୍ବୁକ୍ ଓ ଟୁଇଟର ଭଳି ସୋସିଆଲ ମିଡିଆର ଦୁରୁପଯୋଗ ହେଲେ ଶାନ୍ତିଭଙ୍ଗ ହେବାର ଆଶଙ୍କା ରହିଛି। ଏହାକୁ ଦୃଷ୍ଟିରେ ରଖି ମେଘାଳୟ ସରକାର ୭ ଜିଲାରେ ମୋବାଇଲ ଇଣ୍ଟରନେଟ୍/ ଡେଟା ସେବାକୁ ମଙ୍ଗଳବାର ପୂର୍ବାହ୍ନ ୧୦ଟା ୩୦ରୁ ୪୮ ଘଣ୍ଟା ପାଇଁ ବନ୍ଦ କରିଦେଇଛନ୍ତି। ଏଥିସହ ଘଟଣାର ବିଚାରବିଭାଗୀୟ ତଦନ୍ତ ନିର୍ଦ୍ଦେଶ ଦେଇଛନ୍ତି। ସାଙ୍ଗ୍ମା ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ସହ ଫୋନ୍ରେ ଆଲୋଚନା କରିଛନ୍ତି।
