ନୂଆଦିଲ୍ଲୀ ,୨୩।୧୧(ପି.ଟି.): ସାଧାରଣ ନିର୍ବାଚନ ଏବଂ ରାଜ୍ୟ ତଥା କେନ୍ଦ୍ରଶାସିତ ଅଞ୍ଚଳ ବିଧାନସଭା ନିର୍ବାଚନ ବର୍ଷରେ ଇଲେକ୍ଟୋରାଲ ବଣ୍ଡ୍ ବିକ୍ରି ସମୟସୀମା ଆଉ ୧୫ ଦିନ ବଢ଼ାଇବା ଲାଗି ନିକଟରେ ସରକାରଙ୍କ ବିଜ୍ଞପ୍ତିକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ଦାଏର ପିଟିଶନର ଶୁଣାଣି ଡିସେମ୍ବର ୫ରେ ହେବ। କଂଗ୍ରେସ ନେତା ଜୟ ଠାକୁରଙ୍କ ଉକ୍ତ ପିଟିଶନ ବ୍ୟତୀତ ୨୦୧୮ ଇଲେକ୍ଟୋରାଲ ବଣ୍ଡ ସ୍କିମ୍ର ବୈଧତାକୁ ଚ୍ୟାଲେଞ୍ଜ କରି ଦାଏର ହୋଇଥିବା ଅନ୍ୟ ପିଟିଶନଗୁଡ଼ିକର ଶୁଣାଣି ଡିସେମ୍ବର ୬ରେ ହେବ ବୋଲି ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼, ଜଷ୍ଟିସ୍ ହିମା କୋହଲି ଏବଂ ଜେ.ବି. ପର୍ଡିଓ୍ବାଲାଙ୍କ ଖଣ୍ଡପୀଠ କହିଛନ୍ତି। ରାଜନୈତିକ ପାଣ୍ଠି ସଂଗ୍ରହରେ ସ୍ବଚ୍ଛତା ଲାଗି ନଗଦ ଚାନ୍ଦାର ବିକଳ୍ପ ଭାବେ ଇଲେକ୍ଟୋରାଲ ବଣ୍ଡ୍ ପ୍ରଚଳନ କରାଯାଇଥିଲା। ଏନେଇ ସରକାର ୨୦୧୮ ଜାନୁୟାରୀ ୨ରେ ବିଜ୍ଞପ୍ତି ପ୍ରକାଶ କରିଥିଲେ। ଜଣେ ଭାରତୀୟ ନାଗରିକ କିମ୍ବା ଭାରତର କୌଣସି ସଂସ୍ଥା ଏହି ବଣ୍ଡ୍ କିଣିପାରିବେ। ଜନପ୍ରତିନିଧି ଆଇନ, ୧୯୫୧ର ଧାରା ୨୯ଏରେ ପଞ୍ଜୀକୃତ ହୋଇଥିବା ରାଜନୈତିକ ଦଳ ଏବଂ ଗତ ସାଧାରଣ ନିର୍ବାଚନ ଓ ରାଜ୍ୟ ବିଧାନସଭା ନିର୍ବାଚନରେ ୧ ପ୍ରତିଶତରୁ କମ୍ ଭୋଟ ପାଇ ନ ଥିବା ଦଳ ଇଲେକ୍ଟୋରାଲ ବଣ୍ଡ୍ ଗ୍ରହଣ କରିବାକୁ ଯୋଗ୍ୟ। ରାଜନୈତିକ ଦଳ ଉକ୍ତ ବଣ୍ଡ୍କୁ ଅଧିକୃତ ବ୍ୟାଙ୍କରେ ଏନ୍କ୍ୟାଶ୍ କରିଥାନ୍ତି। ନିକଟରେ କେନ୍ଦ୍ର ସରକାର ଉକ୍ତ ବଣ୍ଡ୍ ଯୋଜନାରେ ସଂଶୋଧନ କରି ସାଧାରଣ ନିର୍ବାଚନ ଓ ରାଜ୍ୟ ବିଧାନସଭା ନିର୍ବାଚନ ବର୍ଷରେ ଅଧିକ ୧୫ ଦିନ ବଣ୍ଡ୍ ବିକ୍ରି କରାଯିବା ବ୍ୟବସ୍ଥା କରିଥିଲେ। ଉକ୍ତ ବିଜ୍ଞପ୍ତିକୁ କଂଗ୍ରେସ ନେତା ଜୟ ଠାକୁର ସର୍ବୋଚ୍ଚ ଅଦାଲତରେ ଚ୍ୟାଲେଞ୍ଜ କରିଥିଲେ।
