ବାଲେଶ୍ୱର ଅଫିସ,୨।୧୧-ବାଲେଶ୍ୱର ବିଧାନସଭା ଉପନିର୍ବାଚନ ପାଇଁ ମଙ୍ଗଳବାର ଭୋଟଗ୍ରହଣ ହେବ। ଏଥିପାଇଁ ପୋଲିସ ପ୍ରଶାସନ ପକ୍ଷରୁ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ରବିବାର ମଧ୍ୟରାତିରେ ଦୁଇ ପ୍ରମୁଖ ଦଳର କର୍ମୀଙ୍କ ମଧ୍ୟରେ ନିର୍ବାଚନୀ ହିଂସା ଦେଖାଦେଇଛି। ଗୋଟିଏ ଗୋଷ୍ଠୀର ସଂଘବଦ୍ଧ ଆକ୍ରମଣରେ ଅନ୍ୟ ଗୋଷ୍ଠୀର ଦୁଇଜଣ ଗୁରୁତର ଆହତ ହୋଇଛନ୍ତି। ପୋଲିସ ପହଞ୍ଚତ୍ ପରିସ୍ଥିତିକୁ ନିୟନ୍ତ୍ରଣ କରିଛି। ଆହତ ୨ଜଣଙ୍କୁ ପ୍ରଥମେ ଉଦ୍ଧାର କରାଯାଇ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ଅବସ୍ଥା ଗୁରୁତର ହେବାରୁ ସେମାନଙ୍କୁ କଟକ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।
ଉପନିର୍ବାଚନ ପ୍ରଚାର ପାଇଁ ଅନ୍ୟ ଜିଲାର ବହୁ ନେତା ଚାନ୍ଦିପୁର ଥାନା ଅଧୀନ ଏକ ଘରୋଇ ହୋଟେଲରେ ରହିଥିଲେ। ନିର୍ବାଚନ ଆଚରଣ ବିଧି ରବିବାର ଅପରାହ୍ନ ୫ଟାରୁ ଲାଗୁ ହେବା ପରେ ବାହାର ନେତା ନିର୍ବାଚନମଣ୍ଡଳୀ ଛାଡ଼ିଯିବାର ନିୟମକୁ ମାନି ନ ଥିଲେ। ଏହାକୁ ଗୋଟିଏ ଗୋଷ୍ଠୀ ଅଭିଯୋଗ କରିବା ପରେ ଦୁଇ ରାଜନୈତିକ ଦଳ ମଧ୍ୟରେ ବଚସା ଓ ପରେ ଗଣ୍ଡଗୋଳ ହୋଇଥିଲା। ସ୍ଥାନୀୟ ଚାନ୍ଦିପୁର ଥାନା ଆଇଆଇସି ପ୍ରଭୁ କଲ୍ୟାଣ ଆଚାର୍ଯ୍ୟଙ୍କ କହିବାନୁସାରେ, ନିର୍ବାଚନ ଆଚରଣ ବିଧି ନିୟମ ଅନୁସାରେ ଚାନ୍ଦିପୁରସ୍ଥିତ ହୋଟେଲଗୁଡିକରେ ଥିବା ରାଜନୈତିକ ବ୍ୟକ୍ତିମାନଙ୍କୁ ଚାଲିଯିବାକୁ ନିର୍ଦ୍ଦେଶ ଦିଆଯାଇଥିଲା। ବହୁ ଦୂରରୁ ଆସିଥିବା କେତେଜଣ ବ୍ୟକ୍ତିଙ୍କ ଯିବାରେ ବିଳମ୍ବ ହୋଇଥିଲା। ମଧ୍ୟରାତ୍ର ସମୟରେ କେତେଜଣ ବ୍ୟକ୍ତି ହୋଟେଲ ଛାଡୁଥିବା ବେଳେ ସ୍ଥାନୀୟ ଏକ ରାଜନୈତିକ ଦଳର ଲୋକମାନେ ଏହାକୁ ବିରୋଧ କରିଥିଲେ। ଫଳରେ ପାଟିତୁଣ୍ଡ ଓ ଉଭୟ ଗୋଷ୍ଠୀଙ୍କ ମଧ୍ୟରେ ମାରପିଟ୍ ହୋଇଥିଲା। ଚାନ୍ଦିପୁର ପଞ୍ଚାୟତ ସମିତିସଭ୍ୟ ସଞ୍ଜୁ ଦଳେଇ ଏବଂ ଚମ୍ପୁଆ ଅଞ୍ଚଳରୁ ଆସିଥିବା ବିଜେଡି ନେତା ହରିଭକ୍ତ କୁନାଗିରି ଉଭୟେ ଏହି ଗଣ୍ଡଗୋଳରେ ଗୁରୁତର ହୋଇଥିଲେ। ଖବରପାଇ ସଙ୍ଗେ ସଙ୍ଗେ ଘଟଣାସ୍ଥଳରେ ପୋଲିସ ପହଞ୍ଚିଥିଲା। ଏନେଇ ଚାନ୍ଦିପୁର ଥାନାରେ ଏକ ମାମଲା (ନଂ. ୧୦୬/୨୦୨୦) ରୁଜୁ କରାଯାଇ ୫ଜଣଙ୍କୁ ଗିରଫ କରାଯାଇଛି। ଉତ୍ତେଜନାକୁ ଆଖି ଆଗରେ ରଖି ଉକ୍ତ ଅଞ୍ଚଳରେ ୨ ପ୍ଲାଟୁନ ଫୋର୍ସ ମୁତୟନ କରାଯାଇଛି। ପରିସ୍ଥିତି ନିୟନ୍ତ୍ରଣାଧୀନ ରହିଛି।
