ବଲାଙ୍ଗୀର,୨୯।୯( ସୁନିଲ ମହାନ୍ତି): ଲଗାଣ ବର୍ଷା ଯୋଗୁ ଲୋୟର ସୁକତେଲ ଡ୍ୟାମ୍ରେ ଜଳସ୍ତର ବଢ଼ିବାରେ ଲାଗିଛି। ଏପରିକି ଶନିବାର ସକାଳୁ ଡ୍ୟାମ୍ର ଠେଲାପାଣି କୁମିଆପାଲି ଗାଁ ପାଖକୁ ଚାଲି ଆସିଥିବାରୁ ଗାଁ ଲୋକେ ଚିନ୍ତା ପ୍ରକଟ କରିଛନ୍ତି I ତେବେ ଗତ କିଛିଦିନ ହେଲା ଲଗାଣ ବର୍ଷା ହେବାରୁ ସୁକ୍ତେଲ ଜଳଭଣ୍ଡାରର ଜଳସ୍ତର ବଢ଼ିବାରେ ଲାଗିଛି। ଡ୍ୟାମ୍ର ଠେଲା ପାଣି ଏବେ କୁମିଆପାଲି ଗାଁ ନିକଟକୁ ଚାଲିଆସିଛି ।
କୁମିଆଁପାଲିର ସୁକ୍ତେଲ ନଦୀ ଖଣ୍ଡିରେ ଥିବା ଧବଳେଶ୍ବର ଶିବମନ୍ଦିରକୁ ଡ୍ୟାମ ଠେଲା ପାଣି ମନ୍ଦିର ଚାରିପଟରେ ଘେରି ହୋଇରହିଛି। ଫଳରେ ଲୋକଙ୍କ ମନ୍ଦିରକୁ ଯିବା ଆସିବା ବନ୍ଦ ହୋଇଯାଇଛି। ନଦୀ ଖଣ୍ଡିଠାରୁ ଗାଁ ପାଖକୁ ଲାଗିଥିବା ଧାନକ୍ଷେତ ଉପରେ ଡ୍ୟାମ୍ର ଠେଲା ପାଣି ଭର୍ତ୍ତି ହୋଇ ରହିଛି। ଧାନ ଚାଷ କରିଥିବା ଚାଷ ଜମି ଏବେ ପୁରା ନଷ୍ଟ ହୋଇଯାଇଛି। କୁମିଆଁ ପାଲି ଗାଁର କେତେକଙ୍କ ଘର ଭିତରକୁ ପାଣି ପଶିଆସିଛି l ସେମାନଙ୍କର ଘରେ ଥିବା ଖାଦ୍ୟ ସାମଗ୍ରୀ ପାଣିରେ ଭାସିଯାଇଛି l ରନ୍ଧା ବଢ଼ା ବନ୍ଦ କରିଦେଇଛନ୍ତି। ରାତି ସାରା ନ ଶୋଇ ବଢୁଥିବା ଡ଼୍ୟାମ ପାଣିକୁ ଅନାଇ ବସିଛନ୍ତି l ଏପରି ପରିସ୍ଥିତିରେ ଗାଁ ଲୋକଙ୍କ ବିଭିନ୍ନ ଦାବୀକୁ ସରକାର ପୂରଣ ନ କରି ଡ଼୍ୟାମ ପାଣି ବାନ୍ଧି ଛାଡ଼ୁ ଥିବାରୁ ଗାଁ ଲୋକଙ୍କ ମଧ୍ୟରେ ଭୟର ବାତାବରଣ ଦେଖାଯାଇଛି l
ରବିବାର ଅସନ୍ତୋଷ ପ୍ରକାଶ କରି କୁମିଆପାଲିର ଗ୍ରାମବାସୀ ପାଣି ଭିତରେ ପଶି ଜଳ ସତ୍ୟାଗ୍ରହ କରି ଆନ୍ଦୋଳନକୁ ଓହ୍ଲାଇଛନ୍ତି l ଜିଲା ପ୍ରଶାସନକୁ ଚେତାବନୀ ଦେଇ କହିଛନ୍ତି, ତାଙ୍କର ଦାବି ପୂରଣ ନ ହେବା ପର୍ଯ୍ୟନ୍ତ କୁମିଆ ପାଲିରେ ରହିଯାଇଥିବା ୭୦ ପରିବାରରୁ ଉଦ୍ଧର୍ବ ଗ୍ରାମବାସି ମରିଯିବେ ପଛେ ଗାଁ ଛାଡ଼ିବେ ନାହିଁ l ଦରକାର ପଡ଼ିଲେ ପାଣିରେ ବୁଡ଼ି ମରିଯିବେ ହେଲେ ଗାଁ ଛାଡ଼ିବେ ନାହିଁ ବୋଲି ଲୋକେ କହିଛନ୍ତି I କୁମିଆପାଲି ଗାଁର ୭୦ ରୁ ଉର୍ଦ୍ଧ ଆଦିବାସୀ ପରିବାରଙ୍କ ବିଭିନ୍ନ ଦାବି ପୂରଣ ହୋଇ ନ ଥିବାରୁ ସେମାନେ ଗାଁରୁ ବିସ୍ଥାପିତ ଏପର୍ଯ୍ୟନ୍ତ ହୋଇନାହାନ୍ତି। ସେମାନଙ୍କର ଦାବିପୂରଣ ନ ହେବା ପର୍ଯ୍ୟନ୍ତ ଗାଁ ଛାଡିବେ ନାହିଁ ପ୍ରଶାସନକୁ ଜଣାଇଛନ୍ତି l ବିଭିନ୍ନ ସମୟରେ କୁମିଆ ପାଲି ଗ୍ରାମର ପ୍ରତିନିଧି ଦଳ, ଜିଲା ପ୍ରଶାସନ ଓ ଲୋୟର ସୁକ୍ତେଲ ପ୍ରକଳ୍ପ ଅଧିକାରୀଙ୍କ ସହ ଆଲୋଚନା କରିସାରିଥିଲେ ମଧ୍ୟ ସମାଧାନ ବାଟ ଆଜି ପର୍ଯ୍ୟନ୍ତ ବାହାରିପାରି ନାହିଁ।
