ଜଳେଶ୍ୱର,୪ା୧(ଡି.ଏନ.ଏ.): ପଶ୍ଚିମବଙ୍ଗରୁ ବ୍ରାଉନସୁଗାର ଅଣାଯାଇ ଓଡ଼ିଶାର ଜଳେଶ୍ୱର ଅଞ୍ଚଳରେ ଅବାଧରେ ଚୋରା କାରବାର କରାଯାଉଛି। ବ୍ରାଉନ୍ସୁଗାର ବ୍ୟବସାୟୀମାନେ ଏବେ ସହର ଛାଡି ଗ୍ରାମାଞ୍ଚଳର ଯୁବକମାନଙ୍କୁ କାର୍ଯ୍ୟରେ ଲଗାଉଛନ୍ତି। ଏଭଳି ନିଶା କାରବାରରେ ଲିପ୍ତ ଦୁଇଜଣ ଯୁବକଙ୍କୁ ଗ୍ରାମବାସୀ ଧରି ପୋଲିସ ଜିମା ଦେଇଛନ୍ତି।
ଜଳେଶ୍ୱର ଥାନା ଅଧୀନ ମହିଷାମୁଣ୍ଡା ଗାଁର ଦିଲୀପ କୁମାର ହୁଇ ବ୍ରାଉନସୁଗାର କାରବାରରେ ଲିପ୍ତ ଥିବା ଗ୍ରାମବାସୀ ଅଭିଯୋଗ କରି ଆସୁଥିଲେ। ପଶ୍ଚିମବଙ୍ଗର ମୁର୍ଶିଦାବାଦ ଅଞ୍ଚଳର ଜଣେ ଯୁବକ ଜଳେଶ୍ୱର ଥାନା ଆରୁହା ଗାଁରେ ଭଡାରେ ରହୁଥିଲେ। ସେ ମୁର୍ଶିଦାବାଦ ଅଞ୍ଚଳରୁ ମାଦକଦ୍ରବ୍ୟ ଆଣି ବେପାର କରୁଥିଲେ। ଏହି ଯୁବକ ମହିଁଷାମୁଣ୍ଡାସ୍ଥିତ ଦିଲୀପ ହୁଇଙ୍କ ଘରକୁ ଆସି ବ୍ରାଉନ୍ସୁଗାର ଦେବା ବେଳେ କେତେଜଣ ଗ୍ରାମବାସୀ ଦିଲୀପଙ୍କୁ ଅଟକ ରଖି ପଚରାଉଚରା କରିଥିଲେ । ପରେ ଆରୁହା ଗ୍ରାମରୁ ବଙ୍ଗୀୟ ଯୁବକଙ୍କୁ ପଚରାଉଚରା କରାଯାଇ ଜଳେଶ୍ୱର ପୋଲିସ ଜିମା ଦିଆଯାଇଛି। ଅଟକ ଦୁଇ ଯୁବକଙ୍କ ବୟାନ ଅନୁଯାୟୀ ମଙ୍ଗଳବାର ଅପରାହ୍ନରେ ଜଳେଶ୍ୱର ଷ୍ଟେଶନ ବଜାରରସ୍ଥିତ ମିଲ୍ କଲୋନୀରେ ଏକ ନିର୍ଦ୍ଦିଷ୍ଟ ଘର ଉପରେ ପୋଲିସ ଚଢାଉ କରିଛି ।
