ଧର୍ମଶାଳା,୨୬।୨(ଶିବ ପ୍ରସାଦ ମହାନ୍ତି): ଯାଜପୁର ଜିଲା ଧର୍ମଶାଳା ଥାନା ଅନ୍ତର୍ଗତ ସୁନ୍ଦୁରିଆ ପଞ୍ଚାୟତର ଏକ ପୋଖରୀ ନିକଟରୁ ବେଆଇନ ଗୋ ମାଂସ ନେଇ ଯାଉଥିବା ବ୍ୟବସାୟୀଙ୍କୁ ସ୍ଥାନୀୟ ଲୋକେ ଅଟକ ରଖି ପୋଲିସ ଜିମା ଦେଇଛନ୍ତି। ମିଳିଥିବା ସୂଚନା ଅନୁସାରେ ନେଉଳପୁର ଅଞ୍ଚଳର ଜଣେ ବ୍ୟବସାୟୀ ଏକ ବ୍ୟାଗରେ ୧୦କିଲୋରୁ ଅଧିକ ଗୋ ମାଂସକୁ ନେଇ ଯାଉଥିବାବେଳେ ସ୍ଥାନୀୟ ଲୋକେ ବ୍ୟବସାୟୀଙ୍କୁ କାବୁ କରି ନେଇଥିଲେ। ଖବରପାଇ ଘଟଣାସ୍ଥଳରେ ଲୋକେ ଜମା ହେବା ସହ ଉତ୍ତେଜନା ଦେଖିବାକୁ ମିଳିଥିଲା। ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରିବା ସହ ବ୍ୟବସାୟୀଙ୍କୁ ଥାନାକୁ ନେଇଯାଇଛି। ତେବେ ଅନ୍ୟପକ୍ଷରେ ଏହି ଗାଁର କାଲା ଖାଁ ନାମକ ଜଣେ ବ୍ୟକ୍ତି ଗୋ ଚାଲାଣ ଏବଂ ଗୋରୁମାନଙ୍କୁ କାଟି ବିକ୍ରି କରୁଥିବା ନେଇ ଅନେକ ସମୟରେ ଅଭିଯୋଗ ହୋଇଆସୁଛି ଏବଂ ଆଜିର ଘଟଣାରେ ଗୋ ମାଂସ ନେଇ ଯାଉଥିବା ବ୍ୟବସାୟୀ ଜଣଙ୍କ ମଧ୍ୟ ସ୍ଥାନୀୟ କାଲା ଖାଁ ନିକଟରୁ ଗୋ ମାଂସ ନେଇ ବିକ୍ରି କରୁଥିବା କହିଥିଲେ। ଏହିଭଳି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ନିନ୍ଦା କରାଯାଇଥିବା ବେଳେ ବଜରଙ୍ଗୀ ଦଳ ପକ୍ଷରୁ ବିରୋଧ କରାଯାଇଛି।
