ମୁମ୍ବାଇ/ଭୋପାଳ, ୨୪।୨ : ମହାରାଷ୍ଟ୍ରର ମୁମ୍ବାଇ ଏବଂ ପୁଣେ ପରେ ଏବେ ବିଦର୍ଭ ଅଞ୍ଚଳ କରୋନା ସଂକ୍ରମଣର କେନ୍ଦ୍ରସ୍ଥଳ ପାଲଟିଛି। ଏହି ଅଞ୍ଚଳର ୟାଭତମାଲ, ଆକୋଲା, ଅମରାବତୀ ଏବଂ ଓ୍ବାର୍ଦ୍ଧା ଜିଲାରେ ଦୈନିକ ସଂକ୍ରମଣ ହାର ବଢ଼ିଚାଲିଛି। ସେଠାରେ ସଂକ୍ରମଣ ହାର ସେପ୍ଟେମ୍ବରର ସର୍ବୋଚ୍ଚ ସ୍ଥିତିଠାରୁ ଅଧିକ ବୋଲି କୁହାଯାଉଛି। ୟାଭତମାଲରେ ରବିବାର ସଂକ୍ରମଣ ହାର ୪୧.୪ ପ୍ରତିଶତ ଥିଲା, ଯାହାକି ସେପ୍ଟେମ୍ବର ୧୫ର ସଂକ୍ରମଣ ହାରର ଦୁଇଗୁଣ। ସେହିପରି ଅମରାବତୀରେ ସଂକ୍ରମଣ ହାର ୩୮ ପ୍ରତିଶତ ରହିଛି। ସେପ୍ଟେମ୍ବରରେ ସେଠାରେ ସଂକ୍ରମଣ ହାର ଥିଲା ୩୨.୫ ପ୍ରତିଶତ। ସେହିପରି ଓ୍ବାର୍ଦ୍ଧାରେ ସଂକ୍ରମଣ ହାର ସେପ୍ଟେମ୍ବରରେ ୮.୫ ପ୍ରତିଶତ ଥିବାବେଳେ ଏବେ ତାହା ୨୪ ପ୍ରତିଶତକୁ ବୃଦ୍ଧି ପାଇଛି। ଉପରୋକ୍ତ ଅଞ୍ଚଳରେ କୋଭିଡ୍ ପରୀକ୍ଷା ଦୁଇଗୁଣ ବଢ଼ାଇ ଦିଆଯାଇଛି।
ସୂଚନାଯୋଗ୍ୟ ସେପ୍ଟେମ୍ବର ୧୦ରୁ ୩୦ ମଧ୍ୟରେ ମହାରାଷ୍ଟ୍ରରେ କୋଭିଡ୍ ସଂକ୍ରମଣ ସର୍ବୋଚ୍ଚ ସ୍ତରରେ ପହଞ୍ଚତ୍ଥିଲା। ସେପ୍ଟେମ୍ବର ୧୫ରେ ସର୍ବାଧିକ ସଂକ୍ରମିତ ଚିହ୍ନଟ ହୋଇଥିଲେ। ବିଦର୍ଭ ଅଞ୍ଚଳର ୧୧ ଜିଲା ମଧ୍ୟରୁ ୬ଟିରେ ପଜିଟିଭ୍ ହାର ରାଜ୍ୟର ବର୍ତ୍ତମାନର ହାରାହାରି ହାରର ୩ରୁ ୪ ଗୁଣ ଥିଲା। ଜାନୁୟାରୀରେ ସଂକ୍ରମଣ ଅଧା କମିଥିବାବେଳେ ପୁଣି ଥରେ ବଢ଼ିବା ଆରମ୍ଭ କରିଛି। ମହାରାଷ୍ଟ୍ର ବାଦ୍ ଅନ୍ୟ ୭ ରାଜ୍ୟରେ ରବିବାର ସଂକ୍ରମଣ ୧୧ ପ୍ରତିଶତ ଛୁଇଁଥିଲା। ଏହିସବୁ ଜିଲାରେ ଗତ ଦୁଇସପ୍ତାହ ମଧ୍ୟରେ ହସ୍ପିଟାଲରେ ଭର୍ତ୍ତି ହେଉଥିବା କୋଭିଡ୍ ରୋଗୀ ସଂଖ୍ୟା ୨୦ରୁ ୩୦ ପ୍ରତିଶତ ବୃଦ୍ଧି ପାଇଛି। ୟାଭତମାଲ୍ ସରକାରୀ ମେଡିକାଲ କଲେଜରେ ଫେବୃୟାରୀ ୧୦ରେ ୭୧ କରୋନା ରୋଗୀ ଭର୍ତ୍ତି ହୋଇଥିବାବେଳେ ଏବେ ଦିନକୁ ୨୦୦ରୁ ଅଧିକ ରୋଗୀ ଆସୁଛନ୍ତି। ସଂକ୍ରମଣ ବୃଦ୍ଧି ସରକାରଙ୍କ ଚିନ୍ତା ବଢ଼ାଇଥିବାବେଳେ ଏହାକୁ ରୋକିବା ଲାଗି ବିଭିନ୍ନ ପଦକ୍ଷେପ ଗ୍ରହଣ କରାଯାଉଛି। ପୁଣେରେ ନାଇଟ୍ କର୍ଫ୍ୟୁ ଲାଗୁ ହେବା ସହ ସ୍କୁଲ କଲେଜ ବନ୍ଦ କରିଦିଆଯାଇଛି। ସେହିପରି ଅମରାବତୀରେ ଆଂଶିକ ଲକ୍ଡାଉନ୍ ଲାଗୁ ହୋଇଛି।
ମହାରାଷ୍ଟ୍ର ସୀମାବର୍ତ୍ତୀ ମଧ୍ୟପ୍ରଦେଶର ବାଲାଘାଟ ଜିଲାରେ ସଂକ୍ରମଣ ବଢ଼ୁଥିବାରୁ ସେଠାରେ ରାତ୍ରିକାଳୀନ କର୍ଫ୍ୟୁ ଜାରି ହେବା ସହ ୫ କିମ୍ବା ତା’ଠାରୁ ଅଧିକ ଲୋକ ଏକାଠି ହେବା ଉପରେ କଟକଣା ଲଗାଯାଇଛି। ଜରୁରୀ ଆବଶ୍ୟକତା ବ୍ୟତୀତ ଅନ୍ୟ ସମସ୍ତ ଗାଡ଼ି ଚଳାଚଳ ରାତି ୧୦ଟାରୁ ସକାଳ ୬ଟା ପର୍ଯ୍ୟନ୍ତ ବନ୍ଦ କରାଯାଇଛି। ସେହିପରି କେରଳରୁ କର୍ନାଟକ ଆସୁଥିବା ଯାତ୍ରୀଙ୍କ ପାଇଁ ଆର୍ଟି-ପିସିଆର୍ ପରୀକ୍ଷା ରିପୋର୍ଟ ବାଧ୍ୟତାମୂଳକ କରାଯାଇଛି। ପଞ୍ଜାବ ମୁଖ୍ୟମନ୍ତ୍ରୀ ଅମରିନ୍ଦର ସିଂ ସମାବେଶ ଉପରେ କଟକଣା ଲଗାଇଛନ୍ତି। ମାର୍ଚ୍ଚ ୧ରୁ ଇନ୍ଡୋର ସମାବେଶକୁ ୧୦୦ ଏବଂ ବାହାର ସମାବେଶକୁ ୨୦୦ ଲୋକରେ ସୀମିତ ରଖିବାକୁ କୁହାଯାଇଛି।
କେନ୍ଦ୍ର ସ୍ବାସ୍ଥ୍ୟ ମନ୍ତ୍ରଣାଳୟର ରିପୋର୍ଟ ଅନୁଯାୟୀ କେବଳ କେରଳ ଓ ମହାରାଷ୍ଟ୍ରରେ ସକ୍ରିୟ ମାମଲା ସଂଖ୍ୟା ୭୫ ପ୍ରତିଶତ। ଦେଶର ମୋଟ ସକ୍ରିୟ ମାମଲା ମଧ୍ୟରୁ କେରଳରେ ୩୮ ପ୍ରତିଶତ ରହିଥିବାବେଳେ ମହାରାଷ୍ଟ୍ରରେ ୩୭, କର୍ନାଟକରେ ୪ ଏବଂ ତାମିଲନାଡୁରେ ୨.୭୮ ପ୍ରତିଶତ ରହିଥିବା କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ କହିଛନ୍ତି। ଏପର୍ଯ୍ୟନ୍ତ ମୋଟ ୧,୧୭,୬୪,୭୮୮ ଜଣଙ୍କୁ କୋଭିଡ୍ ଟିକା ଦିଆଗଲାଣି। ୬୮ ପ୍ରତିଶତ ସ୍ବାସ୍ଥ୍ୟକର୍ମୀ ଟିକାର ପ୍ରଥମ ଡୋଜ୍ ନେଇଥିବାବେଳେ ୬୨ ପ୍ରତିଶତ ଦ୍ୱିତୀୟ ଡୋଜ୍ ନେଇସାରିଲେଣି। ସେହିପରି ୪୧ ପ୍ରତିଶତରୁ ଊର୍ଦ୍ଧ୍ୱ ଆଗଧାଡ଼ିର କର୍ମଚାରୀ ପ୍ରଥମ ଡୋଜ୍ ନେଇଛନ୍ତି।
