ମୁମ୍ବାଇ,୧୨।୮: ବଲିଉଡର ୮୦ ଓ ୯୦ ଦଶକର ଲୋକପ୍ରିୟ ଅଭିନେତ୍ରୀ ଜୟା ପ୍ରଦା ଅସୁବିଧାରେ ପଡିଛନ୍ତି। ଶୁକ୍ରବାର ଜୟା ପ୍ରଦା ଚେନ୍ନାଇର ଏକ କୋର୍ଟ ଦ୍ୱାରା ଦୋଷୀ ସାବ୍ୟସ୍ତ ହୋଇଥିଲେ ଏବଂ ତାଙ୍କୁ ୬ମାସ ଜେଲ ଦଣ୍ଡାଦେଶ ହୋଇଥିଲା। ଅଭିଯୋଗ ଅନୁଯାୟୀ ତାଙ୍କ ଉପରେ ୫,୦୦୦ ଟଙ୍କା ଜରିମାନା ମଧ୍ୟ କରାଯାଇଛି। କୋର୍ଟ ତାଙ୍କ ବ୍ୟବସାୟିକ ସହଯୋଗୀ ରାମ କୁମାର ଏବଂ ରାଜା ବାବୁଙ୍କୁ ମଧ୍ୟ ଦୋଷୀ ସାବ୍ୟସ୍ତ କରିଛନ୍ତି ଏବଂ ସେମାନଙ୍କୁ ମଧ୍ୟ ଦଣ୍ଡିତ କରିଛନ୍ତି। ଉଲ୍ଲେଖନୀୟ କଥା ହେଉଛି, ଜୟା ପ୍ରଦା ତାଙ୍କ ଥିଏଟରରେ କାମ କରୁଥିବା ଲୋକଙ୍କୁ ଇଏସଆଇ ଟଙ୍କା ଦେଇ ନ ଥିବା ଅଭିଯୋଗ ହୋଇଥିଲା, ଯାହାକୁ କୋର୍ଟ ସଠିକ ବୋଲି ପ୍ରମାଣ ପାଇଛନ୍ତି।
ସୂଚନାଯୋଗ୍ୟ, ଜୟା ପ୍ରଦା ଚେନ୍ନାଇରେ ଏକ ଥିଏଟର ଚଳାଉଥିଲେ, ଯାହା ପରେ ସେ ବନ୍ଦ କରିଦେଇଥିଲେ। ଏଭଳି ପରିସ୍ଥିତିରେ ଥିଏଟରରେ କାର୍ଯ୍ୟ କରୁଥିବା କର୍ମଚାରୀମାନେ ଜୟାଙ୍କ ବିରୋଧରେ ସ୍ବର ଉତ୍ତୋଳନ କରିଥିଲେ ଏବଂ ତାଙ୍କୁ ଦରମା ଏବଂ ଇଏସଆଇ ଟଙ୍କା ଦେଇ ନ ଥିବା ଅଭିଯୋଗ କରିଥିଲେ। ତାଙ୍କ ଅଭିଯୋଗ ହେଉଛି ଯେ ସରକାରୀ ବୀମା ନିଗମକୁ ଇଏସଆଇ ଟଙ୍କା ଦିଆଯାଇ ନାହିଁ।
ଚେନ୍ନାଇର ଏଗମୋର ମାଜିଷ୍ଟ୍ରେଟ କୋର୍ଟରେ ଜୟା ପ୍ରଦା ଏବଂ ତାଙ୍କ ସହଯୋଗୀଙ୍କ ବିରୋଧରେ ‘ଶ୍ରମ ସରକାରୀ ବୀମା ନିଗମ’ ଏକ ମାମଲା ଦାୟର କରିଛି। ଏହା ପରେ ଜୟା ପ୍ରଦା ତାଙ୍କ ବିରୋଧରେ ଆସିଥିବା ଅଭିଯୋଗକୁ ଗ୍ରହଣ କରିଛନ୍ତି ଏବଂ ମାମଲା ରଦ୍ଦ କରିବାକୁ ଦାବି କରୁଥିବା ବେଳେ ଦେୟ ପ୍ରଦାନ କରିବାକୁ ମଧ୍ୟ ପ୍ରତିଶୃତି ଦେଇଛନ୍ତି। ତେବେ ଏହି ମାମଲାରେ କୋର୍ଟ ଏହି ଆବେଦନକୁ ପ୍ରତ୍ୟାଖ୍ୟାନ କରି ଜୟା ପ୍ରଦାଙ୍କୁ ଜୋରିମାନା ସହିତ ଜେଲ ଦଣ୍ଡାଦେଶ ଶୁଣାଇଛନ୍ତି।
